Chaishuj temacunapica Taita Dios ñallapacha cai alpapi nali gentecunata, nali cosascunata tucuchishpa saquinatami yachajuparcanchi. Shinapash ¿imamandata caicuna pactarinataca seguro capanchi? Porque Bibliapica cashna nishpami yachachin:

“Cai pachaca, tucui imapash nali munaicunandimi tucurijun” (⁠1 JUAN 2:17).

Tucurimui punllapi gentecuna salvarinataca seguromi capanchi. Porque cai textopica caitapashmi nin:

“Taita Dios munashcata rurajcunaca, causaitami causanga” nishpa.

Shinaca tucurimui punllapi salvaringapaca Taita Diosta cazushpa causanami minishtirin. Shinapash Taita Diosta cazungapaca primeroca paitami ali rijsina capanchi.

Jesusca cashnami nirca: “Na llullaj shujlla Taita Dios cashpami, cambaj Churi Jesucristotaca cachamuhuarcangui. Shina cajta rijsishpallami, pipash causaita causagringa” nishpa (Juan 17:3). Shinaca tucurimui punllapi salvaringapaj y para siempre cushilla causangapaca Taita Diostami ali rijsina capanchi. Shinapash Taita Dios tiajta y paimanda huaquin cosascunata yachanallaca na canllu. Ashtahuangarin paipa ali amigocunami cana capanchi. Imashinami pihuanbash ali amigo tucungapaj tiempota llujchina minishtirin, shinallatami Taita Dioshuanbash rurana capanchi. Cunanga Taita Dioshuan ali amigo cangapa imata rurana cashcata Bibliapi ricupashunchi.

Cada punlla imagutapash micunaca minishtirishcami can. Shinapash Jesusca cashnami nirca, “gentecunaca, na tandahuanlla causangachu. Ashtahuangarin Taita Dios rimashca tucuilla shimicunahuanmi causanga” nircami (Mateo 4:4).

Jehová Diospa yuyaicunaca Bibliapimi can. Chaimandami Bibliamanda yachajushpaca Taita Dios punda tiempocunapi imata rurashcata, shinallata cunan punllacunapi imata rurajushcata y shinallata jipa punllacunapi imata ruragrijushcatapashmi yachajuita ushapashun.

Taita Dios na gushtashca cosascunata saquina ñucanchipa shinlli cajpipash, Taita Diosta cazungapaca ¿imata ayudanga? Taita Diosta rijsinami ñucanchitaca ninanda ayudanga.

Sandra shuti huarmiguhuan ima pasashcata ricupashun. Cai huarmiguca huainayashpami causan carca. Pero shinapash Bibliata estudiashpami, ‘huainayana juchamanda anchurichi’ nishpa Taita Dios mandashcata yachajurca (1 Corintios 6:18). Chaimi Sandra huarmiguca chai nali causaita saqui ushangapaca Taita Diosta ayudahuai nishpa mañarca. Y shina mañashcamandami cai huarmiguca paipa causaipi cambiocunata rurai usharca. Paipa causaipi cambiocunata rurai ushashpapash cutinlla shina tentacionguna ricurimujpica chaicunapi ama urmangapami esforzarishpa catin. Cai huarmiguca ninmi, “imapash mapa pensamientocuna umaman shamujpica Taita Diostami tucui shunguhuan ayudahuai, ñucallaca caicunataca na mishai ushanichu nishpami mañani. Y shina mañaimandami Taita Diospaman ashtahuan quimirishcani” nin. Cunan punllacunapica Sandra huarmigushnami ashtaca ashtaca gentecunaca Taita Diosmanda yachajushpa, paicunapa causaipi Taita Dios ayudajpi ashtaca cambiocunata ruranajun (Filipenses 4:13).

Si Taita Diosta rijsingapa esforzarinchica paica ñucanchitaca ashtahuan rijsishpami paipa amigo tucushun (Gálatas 4:9; Salmo 25:14). Shinami tucurimui punlla chayamujpipash ñucanchica salvarita ushashun y shinallata paraíso alpagupipash para siempre cushilla causaiguta ushapashun. Paraíso alpagupi causanaca ¿imashinashi canga? Chaitaca cati temapimi yachajushun.