Thero dzo fhelaho dzo ri sumbedza uri Mudzimu u ḓo fhelisa vhathu vhavhi hu si kale na thaidzo dzoṱhe dze vha dzi bveledza. Ri nga vha na vhungoho ha uri zwi ḓo itea. Ndi ngani? Ngauri Ipfi ḽa Mudzimu Bivhili ḽi ri:

“Shango ḽi ḓo lovha.”​—1 YOHANE 2:17.

Ri nga vha na vhungoho ha uri hu ḓo vha na vhane vha ponyoka ngauri yeneyo ndimana ya Bivhili i dovha ya ri:

“Ane a ita zwine Mudzimu a zwi funa u ḓo dzula e hone lini na lini.”

Ngauralo, ri tea u ita zwine Mudzimu a zwi funa arali ri tshi ṱoḓa u ponyoka. Uri ri ḓivhe uri zwine Mudzimu a zwi funa ndi zwifhio, ri tea u thoma nga u mu ḓivha.

Yesu o ri: “Vha ḓo wana vhutshilo vhu sa fheli, arali vha ḓivha iwe Mudzimu wa ngoho.” (Yohane 17:3) Ri tea u “ḓivha” Mudzimu uri ri ponyoke vhufhelo na u tshila tshoṱhe. A zwi ambi u sokou tenda uri Mudzimu u hone kana u ḓivha zwiṅwenyana nga hae. Ri tea u vha khonani dzawe. Arali ri tshi ṱoḓa uri vhukonani vhune ra vha naho na khonani dzashu vhu khwaṱhe, ri tea u fhedza tshifhinga tshinzhi ri navho. Zwo tou ralo arali ri tshi ṱoḓa u vha khonani ya Mudzimu. Kha ri ambe nga ha ngoho ya ndeme ine ra i guda Bivhilini ine ya ḓo ri thusa u vhumba vhukonani na Mudzimu na u ita uri vhu dzule vhu hone.

Ri dzula ri tshi ḽa uri ri tshile. Fhedzi Yesu o ri: “Muthu ha tshili nga zwiḽiwa fhedzi, u tshila na nga maipfi oṱhe a bvaho mulomoni wa Yehova.”—Mateo 4:4.

Ṋamusi maipfi a Yehova a wanala Bivhilini. Musi ni tshi guda yeneyo bugu khethwa, ni ḓo ḓivha zwe Mudzimu a zwi ita tshifhingani tsho fhiraho, zwine a khou zwi ita zwino na zwine a ḓo zwi ita tshifhingani tshi ḓaho.

Ni nga ita mini arali ni tshi ṱoḓa u ita zwine Mudzimu a zwi ṱoḓa, fhedzi ni tshi wana zwi tshi ni konḓela u litsha zwithu zwine a ri zwo khakhea? Zwine zwa nga ni thusa ndi u ḓivha Mudzimu zwavhuḓi.

Kha ri ambe nga ha muṅwe mufumakadzi ane ra ḓo mu vhidza Sakura we a vha a tshi ḓifara luvhi nga zwa vhudzekani. Musi a tshi thoma u guda Bivhili, o vhala nga ha mulayo wa Mudzimu une wa ri: “Iledzani u ḓifara luvhi nga zwa vhudzekani.” (1 Vhakorinta 6:18) Sakura o rabela uri Mudzimu a mu fhe maanḓa nahone a kona u litsha yeneyo nḓowelo mmbi. Fhedzi u kha ḓi tea u imedzana na milingo. U ri: “Musi ndi tshi ḓelwa nga mihumbulo mivhi, ndi mbo ḓi amba na Yehova nga thabelo nga u ḓivha uri ndi nga si kone u lwisana nayo ndi ndoṱhe. Thabelo i na maanḓa nahone yo ntsendedza tsini na Yehova.” Vhathu vha dzimiḽioni vha khou guda nga ha Mudzimu u fana na Sakura. U khou vha ṋea nungo dzi ṱoḓeaho uri vha ite tshanduko vhutshiloni havho na u tshila nga nḓila ine ya mu takadza.—Vhafilipi 4:13.

Musi ni tshi ḓivha Mudzimu nga ho engedzeaho, ndi hone ni tshi ḓo “ḓivhiwa nga Mudzimu” nga ho engedzeaho na vha khonani i funwaho. (Vhagalata 4:9; Phisalema 25:14) Ndi hone ni tshi ḓo ponyoka na dzhena shangoni ḽiswa ḽa Mudzimu. Fhedzi ḽeneḽo shango ḽiswa ḽi ḓo vha ḽi hani? Zwi ḓo ṱalutshedzwa kha thero i tevhelaho.