Latè-a Kay Vini An Pawadi Tou Talè!
Bondyé fè latè-a pou moun ki fidèl sa viv asou’y pou tout tan. (Sam 37:29) I mété Adanm épi Èv, pwèmyé dé moun-nan, an jaden Éden. Bondyé osi bay yo èk désandan yo wèskonsabilité-a pou twavay tè-a èk gadé apwé’y.—Jennésis 1: 28; 2:15.
Latè-a ki la apwézan-an pa anyen kon Pawadi-a Bondyé té vlé-a. Kanmenm, Bondyé p’òkò chanjé lidé’y. I kay fè latè-a vini an pawadi. Ki mannyè i kay fè sa? Ében, kon nou ja apwann an sé atik-la avan-an, Bondyé pa kay détwi latè-a menm. Pito sa, i kay détwi lé méchan èk kité moun ki obéyisan viv asou’y. Lè Bondyé fè tout sa i pwonmèt, ki mannyè bagay kay yé asou latè?
Yon sèl gouvèdman pou tout latè-a
Touswit lè gouvèdman Bondyé ki an syèl kay kondwi lézòm, latè-a kay an bèl plas koté tout moun kay viv ansanm an lilyon. Moun kay osi fè twavay ki kay mennen yo satisfaksyon. Bondyé ja chwazi Jézi pou kondwi latè-a. Jòdi jou, an chay kondwitè pa mélé épi pèp yo. Okontwè, Jézi diféwan paski i kay toujou fè sa ki bon bay pèp li. I kay kondwi épi lanmityé, kon sa, i kay an Wa ki janti, ki jis èk ki ni mizéwikòd.—Izaya 11:4.
Tout lézòm kay viv an lilyon
Moun an latè nèf-la pa kay divizé a kòz di nasyon yo ében was yo. Tout lézòm kay an sèl fanmi. (Wévélasyon 7:9, 10) Tout moun asou latè kay enmen Bondyé èk yo kay enmen pwochen yo. Yo kay twavay ansanm an lapé pou gadé apwé latè-a mannyè Bondyé té vlé dépi an koumansman-an.—Sam 115:16.
La kay ni bèl bo tan toulé jou
Lè Wéyòm Bondyé pwan chaj latè-a, Kwéyatè-a kay kontwolé tan-an pou fè asiwé la pa kay ni pyès dézas natiwèl ankò. (Sam 24:1, 2) Lè Jézi té asou latè I kalmé an mové tan èk sa moutwé sa i sa fè épi pouvwa-a Bondyé ba li-a. (Mak 4:39, 41) Pyèsonn pa kay ni wézon pou pè mové dézas lè Jézi ka kondwi latè-a. Lè Wéyòm Bondyé ka kondwi, nou kay viv an lapé épi sé zannimo-a èk nou pa kay gaté nati ankò.—Hozéya 2:18.
Tout moun kay ni bon santé èk la kay ni manjé gwo lo
Tout moun kay pawfé. Pyèsonn pa kay tonbé malad, vini vyé ében mò. (Izaya 35:5, 6) La kay toujou ni bèl bo tan menm kon i té yé an jaden Éden ko Adanm èk Èv té ka wèsté. Menm kon tè-a an Éden té ka pwodwi an chay manjé, tè-a an latè nèf-la kay wann osi. Tout moun asou latè kay ni manjé alabondans. (Jennésis 2:9) Menm kon nasyon Izwayèl an tan lontan, tout moun an Pawadi-a “kay ni kont manjé pou yo manjé.”—Livitikòs 26:4, 5 NWT.
La kay ni lapé èk sikiwité pou vwé
Lè Wéyòm Bondyé ka kondwi tout latè-a, tout moun kay viv an lapé èk yo kay janti èk jis. La pa kay ni ladjè, pyèsonn pa kay pwan lavantaj asou lézòt, èk tout moun kay ni sa yo bizwen pou yo viv. Mi sa Bondyé pwonmèt: “Chak moun kay asiz anba pyé wézen yo èk pyé fig fwans yo èk pyèsonn pa kay fè yo pè.”—Mayka 4:3, 4 NWT.
Chak moun kay ni kay yo èk twavay yo enmen
Chak fanmi kay ni kay yo menm èk yo pa kay pè moun kay vini pwan’y anba yo. Tout twavay nou fè kay mennen nou satisfaksyon. Kon Bib-la di, sé moun-nan ki kay viv an latè nèf-la “pa kay twavay wèd pou anyen.”—Izaya 65:21-23 NWT.
Pli bon endikasyon moun sa janmen ni
Bib-la di tout moun asou latè kay konnèt Jéhova. (Izaya 11:9) Moun ki ka viv anba Wéyòm Bondyé kay apwann an lasajès Bondyé èk an sé bèl bagay-la i fè-a. Yo pa kay sèvi entèlijans yo pou fè zam ében pou fè lòt moun ditò. (Izaya 2:4) Andji sa, yo kay apwann mannyè pou viv an lapé épi yonn a lòt èk mannyè pou gadé apwé latè-a.—Sam 37:11.
Moun kay viv pou tout tan
Bondyé pwan tan’y pou byen pwépawé latè-a pou nou sa ni an bon viv chak jou. Antansyon’y sé pou lézòm viv asou latè pou tout tan. (Sam 37:29; Izaya 45:18) Alò, pou fè sa posib Bondyé “kay valé lanmò pou tout tan.” (Izaya 25:8 NWT) Bondyé pwonmèt: “La pa kay ni lanmò ankò. La pa kay ni lapenn ében pléwé ében soufwans ankò.” (Wévélasyon 21:4) Bondyé kay bay tout moun chans-lan pou viv pou tout tan, ni sa I sové lè i détwi lé méchan ni sa i kay wésisité an latè nèf-la.—Jan 5:28, 29; Twavay 24:15.
Dépi apwézan plizyè milyon moun ka pwépawé pou viv anba Wéyòm Bondyé ki kay koumansé kondwi latè-a tou talè. Magwé yo pa pawfé yo chak ka fè fòs kò yo pou vini kalité moun-nan Bondyé kay vlé viv an latè nèf li. Ki mannyè yo ka fè sa? Ében, yo ka vini konnèt Jéhova èk Jézi Kwi, moun-nan i voyé-a.—Jan 17:3.
Nou ka ankouwajé’w pou apwann pli konsèné mannyè ou sa chapé lafen di moun èk viv an latè nèf-la ki tou pwé. Aksèpté yon Létid Bib lanmen yon Témwen Jéhova. Liv-la ou kay sèvi ni tit-la, Ou Sa Ni An Bon Lavi Pou Tout Tan! Ou pa ni pou péyé pou létid-la.
