Chau Dios tañi Gobierno huenu mu mülelu, pürüm com Mapu ngünenieafi. Com pu che ayüucüleaingün ca tüngcüleaingün ca nieaingün ayühun-ngechi cüdau. Dios, Jesús üitufi ñi ngünenieafiel ti Mapu. Jesús trürlai ta pu che ñi gobierno mu, feita ayüniei ñi cümelcaleal ta caquelu pu che. Jesús piuqueyen mu ngünenieafi ti Mapu. Jesús rumel piuqueyecheai ca cutranpiuqueyecheai ca norngeai (Isaías 11:4).

Quisuque mülehuelayai tañi tuhun mu engün, doi mai com che quiñeucüleaingün (Apocalipsis 7:9, 10). Com che mülelu ti cüme Mapu mu, piuqueyeafingün ta Chau Dios ca piuqueyehuaingün. Com quiñentrür cüdahuaiñ taiñ cuidayafiel ti Mapu, chumngechi ñi ayünieel ta Chau Dios (Salmo 115:16).

Chau Dios ñi Gobierno ngünenietufile ti Mapu, tüngcületuai tañi huesalcanoafiel ta che (Salmo 24:1, 2). Jesús mülepalu Mapu mu, tüngcünutufi ti fütra cürüftucu mahun. Femngechi pengeli ñi femal Dios ñi nehuen mu (Marcos 4:39, 41). Cristo ñi ngünenieel mu inei no rume llicalayai ñi müleal quiñe fütra nüyün, quiñe fütra cürüftucu mahun ca quiñe fütra mangin co. Ca femngechi Dios ñi Gobierno mu, che engu culliñ tüngcüleaingu. Inei no rume huesalcahuelayafi ti Mapu (Oseas 2:18).

Tremoleai com che. Ngehuelayai cutran ca inei rume füchalayai ca lahuelayai (Isaías 35:5, 6). Ti Mapu lifcületuai ca ayüfalai, Adán ca Eva engu ñi mülen mu reque. Ti hue Mapu hulai fentrenque iyael, feimu inei no rume “iñche ngüñülen” pihuelayai, chumngechi ñi femquefel ti jardin de Edén (Génesis 2:9). Ti hue Mapu mu pu che huedalerpuai fente tañi iyael engün, chumngechi tañi feipicünufiel Chau Dios pu israelche cuifi mu (Levítico 26:4, 5).

Chau Dios ñi Gobierno mu, com Mapu mu müleai tüngcülen ca inei rume huesa femhuelayai, ca com che piuqueyehuai. Ngehuelayai aucan, ca inei no rume “iñche ta doi mandan” pihuelayai. Ca chem taiñ duamnieel com nieaiñ. Biblia feipicünui com pu che anüleai ta miñche ofad meu, ca miñche higuera meu, inei no rume llicalcahuelayayu engün (Miqueas 4:3, 4).

Com familia quisuque nieai tañi ruca engün, llicalelayai tañi ñamümal engün. Com ayühunquechi cüdahuaiñ. Femngechi ñi feipin ta Biblia, müleliyiñ ti hue Mapu mu, ngünam ta cüdaulayaiñ (Isaías 65:21-23).

Biblia feipi: “Tati Mapu apoleai Jehová ñi quimün meu” (Isaías 11:9). Pu che quimürpuaiñ Jehová tañi cüme quimeltun ca nentuaiñ quimün Jehová tañi deumael mu. Taiñ quimürpuel, deumalayafiyiñ ta arma taiñ huesa femafiel ta caquelu che (Isaías 2:4). Doi mai taiñ tüngcüleal ca taiñ cuidayafiel tati Mapu (Salmo 37:11).

Chau Dios ayüniei taiñ nieal rumel mongen ca taiñ mongen mu ayüucüleal fill antü, feimu cüme deumafi ti Mapu (Salmo 37:29; Isaías 45:18). Dios femürpuai tañi ayünieel, feimu apümafi ti lan dungu (Isaías 25:8). Biblia ta feipicünui: “Ngehuelayai ta lan, ngüman no rume, eyütun no rume, cutrantun no rume” (Apocalipsis 21:4). Ti hue Mapu mu müleai fentren che, ti pu montulu ca huiñomongetulu. Fei nor piuquengele engün, Dios eluñmayayu ñi nieal afnoachi mongen engün (Juan 5:28, 29; Hechos 24:15).

 Fachantü fentrenque che pepicaumequei ñi müleal ti hue Mapu mu. Culpafe chengefuingün rume, huelu nehuentuleingün tañi ayühuelafiel ta Chau Dios. ¿Chumngelu femqueingün? Quimfiel mu ta Dios ca tañi Fotüm Jesucristo (Juan 17:3).

Pichi faltai tañi afal tati huesaque dungu, fei re cümeque dungu mületuai Mapu mu. ¿Chem mülei taiñ femal taiñ mongetripayal? Doi ayülmi tami quimal, quimeltuen Biblia feipiafimi quiñe Dunguquelu Ineingen Jehová, fei ti lifru mu ¡Rumel ayüucüleaimi! quelluaimu. Cullilayaimi.