Аллаһын ҝөјдә гурдуғу јени һөкумәт тезликлә бүтүн бәшәријјәт үзәриндә һакимијјәт сүрәҹәк. О заман Јер күрәсиндә инсанлар хошбәхт, әмин-аманлыг ичиндә јашајаҹаг, һамы севдији ишләрлә мәшғул олаҹаг. Аллаһ Иса Мәсиһи бу һөкумәтин башчысы тәјин едиб. Бу ҝүн бир чох рәһбәрләр халгын гејдинә галмыр. Иса Мәсиһ исә инсанларын рифаһы үчүн чалышаҹаг. О, мәһәббәтлә һакимијјәт сүрәҹәк, хејирхаһ, рәһмли вә әдаләтли Падшаһ олаҹаг (Әшија 11:4).

Инсанлар арасында миллијјәтинә, етник мәншәјинә ҝөрә парчаланма олмајаҹаг. Бүтүн бәшәријјәт бир аилә кими бирләшәҹәк (Вәһј 7:9, 10). Јер үзүндә јашајан инсанлар һәм Аллаһы севәҹәк, һәм дә бир-биринә ҹан дејиб, ҹан ешидәҹәк. Онлар әл-әлә вериб Аллаһын Адәмлә Һәвваја вердији тапшырығы јеринә јетирәҹәкләр, јәни бүтүн дүнјаны ҹәннәтә чевирәҹәкләр (Зәбур 115:16).

Аллаһын Падшаһлығы јер үзәриндә һакимијјәт сүрмәјә башлајанда Аллаһ тәбиәт гүввәләрини идарә едәҹәк, тәбии фәлакәтләр олмајаҹаг (Зәбур 24:1, 2). Иса Мәсиһ јер үзүндә јашајанда бир дәфә ҝүҹлү фыртынаны асанлыгла јатырмышды. Бунунла да ҝөстәрмишди ки, Аллаһын она вердији ҝүҹлә нәләр етмәјә гадирдир (Марк 4:39, 41). Мәсиһин һакимијјәти алтында һеч кәс тәбии фәлакәт горхусу илә јашамајаҹаг. Һәмчинин инсанла тәбиәт арасында һармонија бәрпа олунаҹаг (Һушә 2:18).

Һамы там сағлам олаҹаг. Инсанлар нә хәстәләнәҹәк, нә гоҹалаҹаг, нә дә өләҹәк (Әшија 35:5, 6). Әдән бағында олдуғу кими әтраф аләм тәмиз олаҹаг, ҝөз охшајаҹаг, торпаг бол мәһсул верәҹәк, һеч кәс һеч нәдән корлуг чәкмәјәҹәк (Јарадылыш 2:9). Гәдимдә Аллаһын халгынын јашадығы Исраил торпағында олдуғу кими, Ҹәннәтдә дә һамы «дојунҹа чөрәк јејәҹәк» (Лавилиләр 26:4, 5).

Аллаһын һакимијјәти алтында бүтүн инсанлар сүлһ ичиндә јашајаҹаг. Һамы бир-биринә гаршы хејирхаһ олаҹаг, һеч кәс һагсызлыг етмәјәҹәк. Мүһарибәләр олмајаҹаг, һеч ким сәлаһијјәтиндән суи-истифадә етмәјәҹәк, һамынын ҝүзәраны хош олаҹаг. Мүгәддәс Китаб вәд едир: «Һәр кәс өз мејнәсинин, өз әнҹир ағаҹынын алтында отураҹаг, онлары горхудан олмајаҹаг» (Микә 4:3, 4).

Һәр аиләнин өз еви олаҹаг. Һеч кәс евини итирмәк горхусу илә јашамајаҹаг. Инсанлар ҝөрдүјү һәр ишдән зөвг алаҹаг. Аллаһын Кәламында дејилдији кими, Ҹәннәтдә јашајанлар «наһаг јерә әлләшмәјәҹәк», јәни зәһмәтинин бәһрәсини ҝөрәҹәк (Әшија 65:21—23).

Мүгәддәс Китаб вәд едир: «Дүнја башдан-баша Јеһова барәдә биликлә долаҹаг» (Әшија 11:9). Ҹәннәтдә инсанлар Јараданымыз Јеһованын сонсуз һикмәтиндән елм алаҹаг вә Онун јаратдыглары барәдә өјрәнәҹәк. Онлар биликләриндән силаһ дүзәлтмәк, јахуд башгаларына зәрәр јетирмәк мәгсәдилә истифадә етмәјәҹәкләр (Әшија 2:4). Әксинә, бир-бири илә јола ҝетмәји вә Јер күрәсини горумағы өјрәнәҹәкләр (Зәбур 37:11).

Аллаһ Јер күрәсини елә јарадыб ки, јашадығымыз һәр ҝүн бизә зөвг версин. О, инсанларын јер үзүндә әбәди јашамасыны истәјир (Зәбур 37:29; Әшија 45:18). Бу әзәли нијјәтини јеринә јетирмәк үчүн Аллаһ «өлүмү әбәдилик мәһв едәҹәк» (Әшија 25:8). «Артыг өлүм олмајаҹаг. Нә дәрд, нә фәрјад, нә дә ағры олмајаҹаг», — дејә Мүгәддәс Китаб вәд едир (Вәһј 21:4). Аллаһ бүтүн инсанлара, һәм бу залым дүнјаны мәһв едәркән хилас етдији кәсләрә, һәм дә Ҹәннәтдә дирилдәҹәји сонсуз сајда инсана әбәди јашамаг имканы верәҹәк (Јәһја 5:28, 29; Һәвариләрин ишләри 24:15).

 Артыг индидән бүтүн дүнјада милјонларла инсан Аллаһын Падшаһлығынын һакимијјәти алтында јашамаға һазырлашыр. Бу инсанлар ҝүнаһлы олсалар да, әлләриндән ҝәләни едирләр ки, Аллаһын разылығыны газаныб, јени дүнјада јашасынлар. Бунун үчүн онлар Јеһова Аллаһ барәдә вә Онун уғрумузда гурбан вердији Иса Мәсиһ барәдә билик алырлар (Јәһја 17:3).

Бу шәр дүнјанын сонунда сағ галмаг вә Аллаһын вәд етдији ҝөзәл дүнјада әбәди јашамаг үчүн даһа нә етмәк лазымдыр? Јеһованын Шаһидләриндән бири илә «Әбәди хошбәхт һәјат!» нәшри васитәсилә Мүгәддәс Китабы пулсуз өјрәнин.