Dai na mahahaloy, pag an bagong gobyerno nin Diyos sa langit namahala na sa bilog na katawuhan, an daga magigin maugmang lugar na diyan an mga tawo nagkakasararo asin igwa nin magayon saka nakakakontentong trabaho. Itinalaga nin Diyos si Jesu-Cristo na tagapamahala kan daga. Bakong arog kan dakul na tagapamahala ngunyan, an kapakanan kan saiyang mga sakop an pirming magigin nasa isip ni Jesus. Pirming mahihiling an pagkamuot sa pamamahala niya, asin magigi siyang mabuot, mahihirakon, saka patas na Hadi.—Isaias 11:4.

An bagong sosyedad nin mga tawo sa daga dai magkakabaranga nin nasyonalidad o lahi. An bilog na katawuhan magigin sarong nagkakasararong banwaan. (Kapahayagan 7:9, 10) An gabos na tawo na nabubuhay sa daga mamumutan an Diyos, saka an saindang kapwa, asin magtatarabangan sinda na maisagibo an orihinal na katuyuhan nin Diyos na pag-ataman kan saindang istaran, an daga.—Salmo 115:16.

Pag namahala na an Kahadian nin Diyos sa daga, magigin lubos nang kontrolado kan Kaglalang an panahon, asin gigibuhon niyang balanseng marhay iyan. (Salmo 24:1, 2) Kan si Jesus yaon sa daga, ipinahiling niya kun ano an kayang gibuhon kan kapangyarihan nin Diyos kan madalion niyang napapundo an makusugon na bagyo. (Marcos 4:39, 41) Sa pamamahala ni Cristo, mayo na nin dahilan an siisay man na matakot sa mga natural na kalamidad. Ibabalik man kan Kahadian nin Diyos an matuninong na relasyon kan mga tawo saka kan mga hayop, asin dai na nuarin man rarauton kan mga tawo an kapalibutan.—Oseas 2:18.

Magkakaigwa an gabos nin perpektong salud. Mayo na nin magkakahilang, magurang, o magagadan. (Isaias 35:5, 6) Maistar an mga tawo sa magayunon saka malinigon na kapalibutan arog kan inistaran kan inot na mag-agom sa hardin nin Eden. Arog sa Eden, mamumungang marhay an mga tinanom sa daga sa bagong kinaban. Kaya dakulon an magigin kakanon kan gabos na nakaistar duman. (Genesis 2:9) Arog sa suanoy na nasyon nin Israel nin Diyos, an gabos sa Paraiso ‘makakan kan saindang tinapay sagkod sa mabasog.’—Levitico 26:4, 5.

Sa pambilog na kinaban na gobyerno nin Diyos, an gabos na tawo makakamati nin katuninungan, asin magigin mabuot saka patas sa kada saro. Mawawara na an mga giyera, pag-abuso sa kapangyarihan, saka magkakaigwa an gabos kan kaipuhan ninda. Nangangako an Bibliya: “An lambang saro sa sainda matukaw sa sirong kan saiyang puon nin ubas asin kan saiyang puon nin higera, asin mayo nin siisay man na mantatakot sa sainda.”—Mikas 4:3, 4.

An gabos na pamilya magkakaigwa nin sadiring harong asin dai sinda mahahadit na mawara sainda iyan. Nakakaugma man an gabos na trabaho na gigibuhon ta. Arog kan sinasabi kan Bibliya, an mga nakaistar sa bagong kinaban nin Diyos “dai . . . magpapagal nin sayang sana.”—Isaias 65:21-23.

Nangangako an Bibliya: “An daga mapapano nanggad kan kaaraman manungod ki Jehova.” (Isaias 11:9) An mga miyembro kan bagong sosyedad nin mga tawo makakanuod sa daing katapusan na kadunungan kan saindang Kaglalang, si Jehova, saka manungod sa magagayon na linalang niya. Dai ninda gagamiton an kaaraman ninda para makagibo nin mga armas o makakulog nin iba. (Isaias 2:4) Imbes, makakanuod sinda kun paano magkakaigwa nin matuninong na relasyon sa kada saro asin kun paano aatamanon an daga.—Salmo 37:11.

Ginibo nin Diyos na magayunon an daga tanganing lubos kitang magin maugma sa kada aldaw. Gusto niya na mabuhay an mga tawo sa daga nin sagkod pa man. (Salmo 37:29; Isaias 45:18) Para mautob an orihinal na katuyuhan nin Diyos, “hahalunon niya an kagadanan sagkod lamang.” (Isaias 25:8) Ini an pangako kan Bibliya, “an kagadanan mawawara na. Dai na man magkakaigwa nin pagmundo, o nin pagtangis, o nin kulog.” (Kapahayagan 21:4) Tatawan nin Diyos an gabos na tawo—idtong mga ililigtas niya pag pinara niya na an maraot na kinaban na ini saka an dakulon na bubuhayon niya liwat sa maabot na bagong kinaban—nin oportunidad na mabuhay nin daing katapusan.—Juan 5:28, 29; Gibo 24:15.

 Dawa ngunyan, minilyon sa bilog na kinaban an naghahanda na para mabuhay sa sarong kinaban na pinapamahalaan kan Kahadian nin Diyos na haranihon na. Bako man sindang perpekto, pero ginigibo ninda an makakaya ninda para magin an klase nin mga tawo na gusto nin Diyos na mabuhay sa saiyang bagong kinaban. Paano? Nag-aadal sinda manungod sa Diyos na Jehova asin sa saro na saiyang isinugo, si Jesu-Cristo.—Juan 17:3.

Para maaraman kun ano pa an puwede mong gibuhon para makaligtas sa katapusan kan kinaban na ini saka mabuhay sa mas magayon na kinaban na madali nang mag-abot, akuon an libreng interactive na pag-adal sa Bibliya na inaalok kan mga Saksi ni Jehova, gamit an librong Mabuhay nin Maugma Sagkod Pa Man!