Nomba line fye, Ubufumu bwa kwa Lesa nga bwatendeka ukuteka isonde lyonse, abantu bonse bakaba aba nsansa, bakalaumfwana, kabili bakalabomba incito iisuma iikalabaletela insansa. Lesa alisonta Yesu Kristu ukuti e o akaleteka isonde. Yesu takabe nga bakateka abengi ababako pali ino nshita, pantu ena akalafwaya ukucitila abantu ifikalabawamina. Akaba ni Mfumu iyaba sana no kutemwa, icikuuku, uluse e lyo no mulinganya.—Esaya 11:4.

Pali ilya nshita, mwi sonde tamwakabe ifyalo ifyalekanalekana. Lelo isonde lyonse likaba icalo cimo. (Ukusokolola 7:9, 10) Abantu bonse pe sonde bakatemwa Lesa e lyo na banabo, ne ci cikalenga bakabe abaikatana kabili bakalebombela pamo ilyo balelenga isonde ukuba Paradaise nga fintu Lesa alefwaya libe pa kutendeka.—Amalumbo 115:16.

Pa nshita Ubufumu bwa kwa Lesa bukalateka isonde, Kabumba akalenga imiceele ukuwama sana. (Amalumbo 24:1, 2) Ilyo Yesu ali pano calo, alilangile amaka ayo Lesa amupeele lintu atalalike amabimbi ayakalamba. (Marko 4:39, 41) Na lintu Kristu akalateka, takwakaleba amasanso nangu yamo. Mu Bufumu bwa kwa Lesa, abantunse bakalaikala umutende ne nama kabili tabakalecita ifili fyonse ifingonaula isonde.—Hosea 2:18.

Bonse tukaba no bumi ubusuma. Takwakabe ukulwala, ukukota nelyo ukufwa. (Esaya 35:5, 6) Abantu mwi sonde bakalaikala mu calo icisuma kabili ica busaka kwati ni filya abafyashi besu aba kubalilapo baleikala mwi bala lya Edeni. Mu calo cipya, isonde likalamesha ifya kulya ifingi kabili bonse abakalaikalamo bakalakwata ifya kulya ifingi nga filya fine cali mwi bala lya Edeni. (Ukutendeka 2:9) Nga filya caleba ku luko lwa kwa Lesa ulwa bena Israele, abantu bonse mu Paradaise ‘bakalalya ifya kulya no kwikuta.’—Ubwina Lebi 26:4, 5.

Ilyo Ubufumu bwa kwa Lesa bukalateka isonde, abantu bonse bakalaumfwana kabili bakaba ne cikuuku. Takwakabe inkondo, takwakabe abakalafyenga abanabo kabili abantu bonse bakalakwata ifyo bakabila. Baibolo yatulaya ukuti: “Bakekala umuntu onse mwi samba lya mwangashi wakwe, na mwi samba lya mukunyu wakwe, tapakabe no wa kubatiinya.”—Mika 4:3, 4.

Abantu bonse bakakwata umwa kwikala kabili tabakalesakamana ukutila kuti babatamfyamo, bakalabomba ne ncito iikalalenga bakaleba ne nsansa. Nga filya Baibolo ilanda, abantu abakekala mu calo cipya ica kwa Lesa, “tabakaculile apa fye.”—Esaya 65:21-23.

Baibolo yatulaya ukuti: “Isonde likesulamo ukwishiba Yehova.” (Esaya 11:9) Abantunse abakaba mu calo cipya, bakalasambilila pali Kabumba wabo Yehova uwakwatisha amano e lyo na pa fintu ifisuma ifyo abumba. Tabakalebomfya ifyo bakasambilila ku kupanga ifyanso nelyo ku kucita ifyabipa ku bantu. (Esaya 2:4) Lelo bakalasambilila pa fya kwikala umutende na banabo e lyo ne fya kusunga bwino isonde.—Amalumbo 37:11.

Lesa alipangile bwino sana isonde pantu alefwaya tuleipakisha ukwikalamo cila bushiku. Afwaya abantu bakaleikala pe sonde umuyayaya. (Amalumbo 37:29; Esaya 45:18) Pa kuti ici cikacitike, Lesa “akamina imfwa umuyayaya.” (Esaya 25:8) Baibolo yatulaya ukuti: “Imfwa tayakabeko na kabili, takwakabe no kuloosha nangu ukuteta nangu ukukalipwa na kabili.” (Ukusokolola 21:4) Abantu abo Lesa akapususha ilyo cino calo cikapwa e lyo nabo akabuusha akabapeela ishuko lya kwikala umuyayaya.—Yohane 5:28, 29; Imilimo 24:15.

 Abantu abengi nga nshi baleipekanishisha ku kwikala mu calo cipya icili no kwisa nomba line. Nangu ca kuti tabapwililika, balesha na maka ukucita ifintu ifyo Lesa afwaya abantu abakaba mu calo cipya balecita. Bacita shani ifyo? Balasambilila pali Yehova Lesa e lyo na Yesu Kristu uo atumine.—Yohane 17:3.

Nga kuti mwatemwa ukwishiba ifya kucita pa kuti mukapusuke ilyo cino calo cikapwa no kwingila mu calo cipya icili no kwisa nomba line, ebeni Inte ya kwa Yehova ukuti mulefwaya ukulasambilila Baibolo, ukubomfya icitabo citila Kuti Mwaba ne Nsansa Umuyayaya!