Fyoro wer ḇa, Allah pamarentahan Ḇyedi ro nanggi nari ḇyepoik faro snonggaku sya kam. Allah kyinfir Yesus i kwar ḇe manfarkin ro pamarentahan ani. Imnis kuker manfarkin ḇebor ḇero kirine ḇa, Yesus iswar kaku snonggaku sya ma fyandun si. Nari ḇye Raja ḇepyum ma ḇenapes. Bon ya, supswan ine nari ḇye moḇ ḇepyum kaku. Snonggaku sya kam nari sikenem kuker payamyum ma sna fararur ḇepyum.​—Yesaya 11:4.

Ro dunya babo snonggaku sya nari sḇesisye ḇa snar srama ro er ḇaido keret ḇeḇesisye yae. Snonggaku sya kam nari siswar Allah ma min sesya. (Fasasna 7:9, 10) Nari sfararur kayam fa sfaduru ma smamwarek supswan, raris Allah marisen Ḇyena ro randak ya.​—Mazmur 115:16.

Rofyor Karajan Allah ḇyepoik ro supswan, Manseren ḇedaw supswan ine nari ifrur mnis cuaca na insama napyum pdef. (Mazmur 24:1, 2) Fyor Yesus ryo supswan, isya ifrur mnai wamdoḇer kuker papoik ro Allah. (Markus 4:39, 41) Inja kokyar kaku inari rim ḇeba nasya wer ḇa. Karajan Allah nari ifrur kaḇer roi ḇero supswan ine fa nambran mnis, ma snonggaku nari sikenem kayam kuker aiwan sya.​—Hosea 2:18.

Snonggaku sya kam nari siprei kaku. Nari ono sisya sidafduf ḇa, sḇemansar binsar ḇa, ma simar ḇa. (Yesaya 35:5, 6) Raris fafisu ro Yaf Eden fyor iwara, snonggaku sya nari sikenem ro moḇ ḇesren ma ḇepyum. Supswan ya kako nari byuk roḇean nabore. (Kejadian 2:9) Ma raris er Israel ḇero fyor iwara sya, snonggaku ḇero dunya babo sya kam nari ’san rawo sarbore’.​—Imamat 26:4, 5.

Snonggaku sya kam nari sifrur pyum yae si ma sifrur roi ḇenapes. Mamamun nari nasya wer ḇa, ma snonggaku ḇepoik pyum ḇa nari sisyaḇa. Osower ido, Refo doḇe, ”Snonggaku oser-oser nari kyain ro rokaker anggur ma ara knam ḇyena baḇ ya; roi oso ḇaḇeri nari ḇefnai fa simgake.”​—Mikha 4:3, 4.

Kina oser-oser nari sna rum ma simgak ḇa kwar na skakok na. Roi nakam sifrur kako nari nefromo ḇa. Raris Refo ikofen, snonggaku ḇero dunya babo sya ”nari fararur marḇak sena nadawer monda ḇa”.​—Yesaya 65:21-23.

Refo doḇe, ”Supswan ine nari ifo kuker fawawi ro Yahwe I.” (Yesaya 11:9) Manseren ḇedaw konya ima ifawinanem kaku. Inja, snonggaku sya kam nari sfarkor roi nabor ro I ma ḇraur ḇepyum Ḇyena. Ḇape, na sbuk fawawi sena ḇa fa sifrur romamun ḇaido sbukimun snonggaku ḇese. (Yesaya 2:4) Nari sfarkor nyan rariso sikenem pyum kuker snonggaku ḇesesya ma nyan rariso sfaduru supswan ine.​—Mazmur 37:11.

Manseren Allah ifrur supswan ine kuker pyum kaku insama kosmai marisen ro kenem koḇena ras ḇe ras. Manseren Allah imarisen kokenem ro supswan isof fyoro. (Mazmur 37:29; Yesaya 45:18) Iso ḇefnai fa ”nari doren marmar ya isof fyoro-fyoro”. (Yesaya 25:8) ”Marmarya isyaḇa kwar; sne ḇefafardun, kankanes, roḇa dafduf naisyaḇa kako.” (Fasasna 21:4) Osower ido, snonggaku milyar ḇemar kwar sya nari Manseren Allah ḇyawes si ro dunya babo. Manseren Allah nari byuk ḇe si ma snonggaku ḇemkei sya kam ro papupes ine sna swaf fa sikenem fyoro.​—Yohanes 5:28, 29; Farfyar 24:15.

 Fafisu ine, snonggaku riyuta ḇesya ro supswan ḇesiper sfasos manggunsi fa sikenem ro dunya babo. Sinapes ḇa rariryano, sḇesewar fa sfadwer kenem sena insama sifrur Manseren Allah imarisen. Nyan ya rariso? Kuker sfarkor Refo fa sfawi Allah Yahwe ma Yesus Kristus.​—Yohanes 17:3.

Wasewar fa wafawi nabor syadi wer kuker nyan insama wamkei ro papupes dunya ine ma wakenem ro dunya ḇepyum syadi. Wamarisen fyor Saksi-Saksi Yahwe sbuk farkarkor Refo ḇe Au ḇeyun ḇaḇyak ḇa, ḇaido swewar si ro situs web jw.org.