Pardis i Doni Enggo Ndeher!
Ciptaken Dibata doni enda gelah banci jadi ingan tading man kalak si benar seh rasa lalap. (Masmur 37:29) Mbarenda, tamaNa pasangen manusia si pertama eme Adam ras Hawa bas Taman Eden si mejile, janah suruhNa kalak e ras keturunenna mpebelang taman e ras ngurussa.—Kejadin 1:28; 2:15.
Keadan doni enda beda kel ras Taman Eden mbarenda. Tapi sura-sura Dibata lenga berubah, ibanNa ateNa doni enda jadi Pardis. Uga carana? Bagi si ibahas bas artikel sebelumna, doni enda labo ndigan pe ikernepken Dibata tapi banNa jadi ingan tading man kalak si benar. Ndigan si e terjadi janah uga pagi keadan doni paksa si e?
Sada ngenca pemerentahen i doni
Lanai ndekah, pemerentahen Dibata si i surga me si merentah kerina manusia. Paksa si e pagi, doni enda jadi ingan si erban meriah ukur, banci kalak tading ras-ras alu dame, ngelakoken si mehuli, ras puas bas ngelakoken pendahinna. Jesus Kristus enggo ilantik Dibata guna merentah doni enda. Gundari melala pemerentahen si la ermediate man rakyatna. Tapi pemerentahen Jesus beda kel, lalap pagi lakokenna si mehuli guna kepentingen rakyatna. Pemerentahenna erpalasken kekelengen janah ia Raja si mehuli, perkuah, ras adil.—Jesaya 11:4.
Kerina kalak si tading bas doni ersada pagi
Kerina manusia ersada pagi. Bas doni si mbaru lanai pagi lit perpecahen amin pe kalak si lit i je beda suku ras bangsa. (Ketangkasen 7:9, 10) Kerina kalak si tading i doni si mbaru engkelengi Dibata ras engkelengi kalak si deban. Ersada ka kalak e ngelakoken peraten Dibata eme ngurus doni ingan tading kalak e, bagi sura-sura Dibata si tangtangna.—Masmur 115:16.
Lingkungen si sempurna
Adi Kerajan Dibata pagi si merentah doni enda, Dibata pagi si ngendaliken cuaca janah banNa tetap stabil. (Masmur 24:1, 2) Sanga Jesus i doni, pernah petenangna angin badai. Si e banci lakokenna perban kuasa si bere Dibata man bana. (Markus 4:39, 41) Emaka, lanai pagi perlu kita mbiar nandangi bencana alam. Sanga Kerajan Dibata merentah pagi, enggo erdame kita ras binatang-binatang janah lanai lit kalak si ncedai lingkungenta.—Hosea 2:18.
Kesehaten si sempurna ras pangan si seh kel buena
Kerina pagi kalak ermeriah ukur perban enggo tuhu-tuhu sehat. La pagi lit kalak si sakit, metua ntah pe mate. (Jesaya 35:5, 6) Kerina pagi kalak ermeriah ukur perban lingkungen si mejile ras bersih, bali bagi si inanami Adam ras Hawa si mbarenda tading i Taman Eden. Bali bagi bas Taman Eden mbarenda, bas doni si mbaru pagi kerina sinuan-sinuan mbue buahna janah kerina kalak si tading i je mbue panganna. (Kejadin 2:9) Bali bagi kalak Israel si mbarenda, kerina kalak si tading bas doni si mbaru ‘puas pagi man’ panganna.—Imamat 26:4, 5.
Kedamen ras keamanen situhu-tuhu
Bas pemerentahen Dibata pagi kerina kalak ermeriah ukur perban lit kedamen janah mehuli perbahanenna man sada ras si debanna. Lanai pagi lit i je perang, penindasen, janah kerina keperlun kalak tercukupi. Lit janji bas Pustaka si ngataken, “Kundul pagi kalak e masing-masing i teruh batang anggurna bage pe batang arana, la lit si erban kalak e mbiar.”—Miha 4:3, 4.
Rumah si mejile ras pendahin si erban meriah ukur
Tiap keluarga lit pagi rumahna janah la kalak e mbiar la lit inganna tading. Kerina pagi pendahinta berhasil. Bagi si ikataken bas Pustaka, kalak si tading bas doni si mbaru ‘labo pagi sia-sia kerja kerasna.’—Jesaya 65:21-23.
Pendidiken si mehulina
Lit janji bas Pustaka si ngataken, “Dem pagi doni alu pemeteh kerna Jahwe.” (Jesaya 11:9) Kalak si tading bas pemerentahen Dibata, erlajar pagi kerna kepentaren si luar biasa arah Jahwe Si Nciptaken kalak e bage pe arah ciptanNa si mejile. Labo pagi ipake kalak e pemetehna guna erban senjata ntah pe erban kalak cilaka. (Jesaya 2:4) Tapi ipelajari kalak e pagi uga carana erdame ras kalak si deban ras ngurus doni enda.—Masmur 37:11.
Lanai pagi lit kematen
Melala kel si enggo lakoken Dibata guna nikapken doni enda gelah banci meriah siakap nggeluh tiap wari. Ate Dibata gelah nggeluh kita seh rasa lalap bas doni enda. (Masmur 37:29; Jesaya 45:18) Gelah sura-suraNa e banci terjadi “masapkenNa pagi kematen seh rasa lalap.” (Jesaya 25:8) Nina Pustaka, “Lanai pagi lit kematen ras ceda ate. Tangis ntah pe si mesui lanai pagi lit.” (Ketangkasen 21:4) Selain si e, miliaren kalak si enggo mate ipegeluh Dibata pagi bas doni si mbaru. Bere Dibata kesempaten man kalak e bage pe man kerina kalak si selamat arah kedungen doni enda guna nggeluh si rasa lalap.—Johanes 5:28, 29; Perbahanen Rasul-Rasul 24:15.
Gundari pe, enggo jutan kalak sangana ersikap guna nggeluh bas pemerentahen Dibata si nandangi reh. Amin pe lenga sempurna, usahaken kalak e jadi umat Dibata si mehuli guna mbuktiken maka merhat kalak e nggeluh bas doni si mbaru. Uga carana? Alu mpelajari kerna Jahwe ras Jesus Kristus si utusNa.—Johanes 17:3.
Pelajarilah terbuen kerna uga carana kam banci selamat arah kedungen doni si jahat enda janah banci nggeluh bas doni si mbaru si nandangi reh. Alokenlah pelajaren Pustaka arah salah sada Saksi-Saksi Jahwe alu la nggalar, nggunaken buku Ermeriah Ukur Seh Rasa Lalap!
Mungkin Menarik Ka Kapndu
SORA ERMOMO
Kai Pagi si Ilakoken Kerajan Dibata?
Iteh Jesus maka Kerajan Dibata ngenca si banci ndungi kerina masalah i doni enda. Kai si nggo ilakoken Kerajan Dibata si erban kita tek man Kerajan e?
