Yarafaali dan lun liabin Larúeihan Bungiu le siélubei, lun larúeihani sun Ubóu, ábameti hagundaarun sun gürigia, winwan hagíame lidan darangilaü ani hagundaaruba lau hawadigimari. Írida laali Bungiu, Hesukrístu, lun ligíaba lan arúeihawa. Mítaranti kei lurúeitegu ubóu ha añaheinbaña uguñe weyu. Súnwandan busén lani Hesusu le buítimabei houn amu. Ínsiñeniba lébuna larúeihan, súnwandan ábanbei lan urúei le óuserati lau ínsiñeni, úaraguati ani gudemehabuti (Isaíasi 11:4).

Mafanreinragun láañame línsiñehabu ageiraü ni harasan gürigia, ladüga sun hagía lidan hañame aban sunsuinagubei (Arufudúni 7:9, 10). Sun gürigia ha lúnbaña hawinwandun ubouagu hínsiñebei Bungiu houn ani hínsiñehabubaña hámagua. Sun hagía hawadigimariduba lidan aban luma lidan darangilaü lun lagunfulirun le labuserunbei Bungiu: lun wóunigiruni ubóu le ñein lubéi wawinwanda (Sálumu 115:16).

Danme le lábugiñehali Larúeihan Bungiu sun ubóu, gamaniharibei lau liñawan dan sunsuinagubei (Sálumu 24:1, 2). Dan meha ya lubéi Hesusu ubouagu aba meha lagalumadun aban lanarime liñawan dan, arufuda lumuti le liyaraabei adüga lau lubafu Bungiu (Márükosu 4:39, 41). Danme larúeihaniwa Kristu, úabei ni aban anufudeduti luéi lasuseredun liñawan dan. Lanwoun le, ladügüba Larúeihan Bungiu lun ñein lan darangilaü hadan gürigia hama animaalugu, ani úaalime ni aban agadeiruti ubóu (Oseasi 2:18).

Sun wagía buídubei wátuadi. Úaalime ni aban asandiruti, aweiyaduti o óunweti (Isaíasi 35:5, 6). Wabagariduba lidan aban ubóu harumati ani buídumeraüti, kei meha Adán tuma Ewa. Lídanme iseri ubóu, líchugubei múa lin, ñeinbei saragu éigini ubouagu, ani sun wagía wibihiba lóugiñe le wemegeirubei lun weigin, kei meha lasuseredun lidan fuluri-agei Edén (Agumesehani 2:9). Lídanme Paraísu lasusereduba le meha füramase lubéi Bungiu lun binadü néchani Ísüraeli: “Héigiba fein darí hakimuledun” (Fádirigu 26:4, 5).

Danme larúeihani Bungiu sun ubóu, ñeinbei darangilaü lidan sun ubóu, úabaña óuserutiña amu lau marichaü ani sun gürigia hóuseruba hámagua lau ínsiñehabuni. Úaalime wuribu, úabei ni aban ayusuruti ubafu lun lasufuriragüdüniña amu ani sun wagía wibihibei le wemegeirubei. Füramasetu Lererun Bungiu: “Haganóuba súngubei manufudeuga, gayaraabei hemeraagun lábugiñe tamuñadiri hanadürigu” (Mikeasi 4:3, 4).

Gábanbaña sun iduheñu ani manufudebaña luéi heferidirunun, ani sun wagía gúndaabadiwa lau wawadigimari. Ligía tariñagunbei Lererun Bungiu, ha lan lunbei hawinwandun lidan iseri ubóu “mawadigimaridunbaña luagu ni kata” (Isaíasi 65:21-23).

Füramasetu Lererun Bungiu: “Ítara luba labuinchun sun fulasu lau lasubudirúniwa luéirigun Wabureme” (Isaíasi 11:9). Wagía gürigia, wafurendeiruba lídangiñe lilulin-agei lichú lau Heowá, Bungiu le Adügübaliwa luma lídangiñe lubuidunmeraü katei le adüga láalibei. Mayusurun wabéi le lunbei wafurendeiruni lun wadaagun áruma, o lun wadügün damichi wóuniwagua, lubaragiñe lira, wafurendeiruba abagarida lidan darangilaü luma lun wóunigiruni Ubóu (Isaíasi 2:4; Sálumu 37:11).

Nadagimeinti Bungiu saragu lun laransehani Ubóu le, ladüga busén lan lun wabagaridun lidan lun súnwandan gúndaañu sagü weyu (Sálumu 37:29; Isaíasi 45:18). Lun libihini Bungiu, “lagünrinchagubei óunweni lun súnwandan” (Isaíasi 25:8). Ani füramasetu Lererun: “Úaalime óunweni, ni íruni ni ayahuni ni igarigu” (Arufudúni 21:4). Líchigayaba Bungiu chansi houn ha lúnbaña lasalbaruniña danme le lagumuchun lau ubóu wuribati le, lun hawinwandun lun súnwandan hama míñunu gürigia ha lúnbaña hásaarun lídangiñe óunweni, mini lan, sun ha lúnbaña hawinwandun lidan iseri ubóu (Huan 5:28, 29; Adügaü 24:15).

 Uguñe weyu haransehaña saragu míñunu gürigia lídangiñetiña sun ubóu lun hawinwandun aban iseri ibagari, danme le Larúeihani Bungiu sun ubóu. Íbini chará hamá, háfaaguña lun gürigia hamá hame aubei lagundaara Bungiu lidan iseri ubóu le lunbei ladügüni. Ida liña hadügüni? Lau hasubudiruni Bungiu Heowá luma lau hasubudiruni Hesusu le lóunahabei (Huan 17:3).

Murusunrügaali dan lun lagumuchuba lan ubóu le. Anhein busén hubéi hasubudiruni ka lan lunbei hadügüni lun hasalbarun, lunme hawinwandun lidan aban ubóu buítimati, amuriaha humá luma aban gefenti luagu Heowá lun líchugun aturiahani tídangiñeti Lererun Bungiu hun mafayeihanga lau tídehan líburu Winwan humá lau ugundani.