Ekiseló chék, atun án Kot we Mwú lón láng epwe nemenem wóón aramas meinisin, ei fénúfan epwe wiliti eú leeni mi apwapwa ikewe aramas ra tongeni manawfengen ie fán tipeeú me féri angang mi múrinné me apwapwa. Kot a ewisa ngeni Jesus Kraist an epwe wisen nemenem wóón fénúfan. Lón ei fansoun, chómmóng sounemenem rese kan áfánni aramas. Nge Jesus a sókkóló pún fansoun meinisin a ekieki met epwe échúiiti aramas. An nemenem epwe lóngólóng wóón tong, me i emén King mi kirekiréch, úméúméch, me ese lifilifil aramas.​—Aisea 11:4.

Ekkewe aramas lón ewe fénúfan séfé, resap kinikinfesen pokiten lewoor are einanger. Aramas repwe nónnómfengen fán tipeeú. (Pwärätä 7:9, 10) Meinisin iir repwe tongei Kot, me tongei chón ourur kewe, me repwe angangfengen fán kinamwe le apwénúetá minne Kot a tipeni seni lepoputáán ren ar túmúnú leenier ei, ei fénúfan.​—Kölfel 115:16.

Lupwen ewe Mwúún Kot epwe nemenem, Kot epwe unusen nemeni ásepwál, paten me pwichin fénúfan, me metakkan. (Kölfel 24:1, 2) Lupwen Jesus a amasésélóói ewe watteen mélúmél, i a pwári met a tufichin féri ren álillisin ewe manaman Kot a fang ngeni. (Markus 4:39, 41) Fán án Kraist nemenem, ese wor popun án emén epwe chúen niwokkusiti taifun, chechchechin fénú, me metakkan. Fán nemenemen ewe Mwúún Kot, sipwe manawfengen me ekkewe man fán kinamwe me sisap chúen ataieló masouen lón leeniach kewe.​—Osea 2:18.

Aramas meinisin repwe meefi péchékkúlen inisiir. Esap chúen wor emén epwe samaw, chinnapeló, are máló. (Aisea 35:5, 6) Aramas repwe pwapwaiti eú leeni mi ling me liméch usun chék met ewe áeúin pean pwúpwúlú ra piin pwapwaiti me lón ewe tánipiin Eten. Usun chék lón Eten, lón ewe ótót séfé ewe pwúl epwe awora chómmóng mwéngé fán iten aramas meinisin mi nóm wóón fénúfan. (Keneses 2:9) Usun chék néún Kot kewe aramasen Israel lóóm, meinisin chón nóm lón ewe Paratis epwe wor rer meinisin met ra mochen mwéngé.​—Lifitikos 26:4, 5.

Fán nemenemen án Kot we Mwú, aramas meinisin repwe kinamwefengen me kirekiréchfengen lefiler me esap wor lifilifil aramas. Esap chúen wor maun, nemenemengaw, me weiresin án aramas atufichi manawer rán me rán. Iei met Paipel a eáni pwon: “Eman me eman epwe nom lon an tanipin wain me fän an irä fiik fän kinamwe, nge esap wor eman epwe eniuokusu.”​—Mika 4:3, 4.

Meinisin famili epwe wor en me pwisin imwan me resap chúen lólileniiti an epwe péút seniir, me meinisin ekkewe angang sia féri epwe sópwéch me apwapwa. Paipel a apasa pwe chókkewe repwe manaw lón Paratis esap fókkun lamotongaw ar angang.​—Aisea 65:21-23.

Iei met Paipel a eáni pwon: “Än chon fanüfan silei ewe Samol mi Lapalap epwe alolol.” (Aisea 11:9) Ekkewe aramas mi nóm fán nemenemen ewe Mwúún Kot, repwe káé seni án Jiowa, ewe Chón Fériiretá, tipachem ese wor aúkúkún. Repwe pwal káé usun lingéchún ekkewe mettóch a fériiretá. Resap áeá sileier le ffér pisekin maun, are efeiengawa ekkewe ekkóch. (Aisea 2:4) Nge repwe fen káé ifa usun repwe nónnómfengen fán kinamwe me ifa usun repwe túmúnú fénúfan.​—Kölfel 37:11.

Kot a ammólnaéchúetá fénúfan pwe sipwe tongeni pwapwaiti manawach iteiten rán. A fókkun tipeni án aramas repwe manaw wóón fénúfan tori feilfeiló chék. (Kölfel 37:29; Aisea 45:18) Iwe, ren án Kot epwe apwénúetá minne a tipeni seni lepoputáán, I “epwe aükätiu mäla.” (Aisea 25:8) Iei met Paipel a eáni pwon: “Esap chüen wor mäla ika letipeta ika kechü ika cheuch.” (Pwärätä 21:4) Kot epwe fang ngeni aramas meinisin ewe tufichin ar repwe manaw tori feilfeiló chék. Chókkana, iir ekkewe Kot epwe amanawer atun epwe ataieló ei ótóten fénúfan mi ngaw me ekkewe epwe amanaweretá lón ewe fénúfan séfé.​—Johannes 5:28, 29; Föför 24:15.

 Pwal mwo nge lón ei fansoun, fite million aramas wóón unusen fénúfan ra ammólnatá ngeni ar repwe manaw fán nemenemen ewe Mwúún Kot, ewe epwele fis ekiseló chék. Inaamwo ika rese unuséch, nge ra achocho ar repwe wiliti ewe esin aramas Kot a tipeni ar repwe manaw lón ewe fénúfan séfé. Ifa usun? Ren ar káé usun Jiowa Kot me Jesus Kraist, ewe emén I a tiinaato ngeni fénúfan.​—Johannes 17:3.

Kútta pwal ekkóch pwóróus ren ifa usun ka tongeni manawewu seni sópwólóón ei fénúfan me manaw lón ewe fénúfan mi múrinné epwele fis. Etiwa eú káéén Paipel lón ewe puk Eáni Manaw mi Pwapwa Tori Feilfeiló! ren emén Chón Pwáraatá Jiowa.