Vawlei Paradis Cu A Nai Cang
Pathian nih vawlei kha a dingmi pawl zungzal an nun khawh nakhnga caah a ser. (Salm 37:29) Hmasa bik nuva a simi Adam le Evi kha aa dawh tukmi Eden dum ah a chiah hna i anmah le an tefa pawl kha vawlei ṭhanchoter awk le zohkhenh awkah rian a pek hna.—Genesis 1:28; 2:15.
Tuchan kan vawlei cu Pathian chimmi Paradis he cun aa thleidang tuk. Asinain Pathian lungput cu aa thleng lo. Pathian nih a hrampi aa tinhnak kha zeitindah a tlinter lai? A hmasa capar ah a langhter cang bantukin Pathian nih vawlei cu a hrawk lai lo. Mah canah zumhfekmi pawl cu hi vawlei cungah nunnak nawl a pek hna lai. Pathian nih aa tinhnak a tlinter tikah vawleicung thil sining cu zeidah a lawh lai?
Cozah Pakhat Nih Vawleicung Pumpi A Uk Lai
A rauhhlan ah Pathian i vancung cozah thar nih vawleicung mi vialte a uk hna tikah vawlei cu mi pawl lungrual tein um khawhnak hmun le a ṭhami le lungsinak a pemi rianṭuan khawhnak a nuam tukmi hmun ah a cang lai. Pathian nih Jesuh Khrih kha vawleicung dihlak uk awkah rian a pek. Tuchan ah, uktu tampi nih mi pawl kha an zawn an ruat hna lo. Asinain Jesuh cu mi pawl cungah thil ṭha a tuah zungzal caah aa thleidangmi a si. A uknak cu dawtnak cungah hram aa bunh lai i a nun a nemmi, zaangfahnak a ngeimi le a dingmi Siangpahrang a si lai.—Isaiah 11:4.
Vawleicung Pumpi I Mi Pawl Cu An Lung Aa Rual Lai
Mi pawl cu miphun ruangah an i ṭhen cheu ti lai lo. A lung aa rualmi miphun pakhat an si cang lai. (Biathlam 7:9, 10) Vawleicung ah a ummi mi vialte nih Pathian le an innpa kha an dawt hna lai. Cun an umnak inn vawlei zohkhenh ding timi a hrampi Pathian tinhnak a tlin khawh nakhnga hmunkhat ah rian an ṭuanṭi lai.—Salm 115:16.
Kokek Pawngkam He Lungrualnak
Pathian Pennak nih a uk tikah khuacaan kha a tlari tein a si nakhnga Pathian nih a uk lai. (Salm 24:1, 2) Vawleicung a um lioah Jesuh nih ṭih a nungmi thlichia a daihter tikah Pathian pekmi ṭhawnnak thawngin zeidah a tuah khawh ti kha a rak langhter. (Marka 4:39, 41) Khrih uknak tangah ahohmanh nih leiser ral kha an ṭih a hau ti lai lo. Pathian Pennak nih a uk tikah saram he dai tein kan umṭi hna lai i kan pawngkam thil hna cu an rawk ti lai lo.—Hosea 2:18.
A Tlingmi Ngandamnak Le Tirawl Tampi
Mi kip cu an ngan a dam cang lai i ahohmanh an zaw, an tar asiloah an thi ti lai lo. (Isaiah 35:5, 6) Hmasa bik nuva hna nih Eden dum ah an rak i nuamhpimi, aa dawh tukmi le a thiang tukmi pawngkam ah an um cang lai. Vawlei thar ahcun Eden dum bantukin vawlei nih rawl tampi a chuahter lai i vawleicung ah a ummi cu mi tampi an si lai. (Genesis 2:9) Pathian i hlanlio Israel mi hna bantukin Paradis ah a ummi hna kip nih “[an] rawl cu khim tein an ei lai.”—Levitikas 26:4, 5.
Daihnak Le Himnak Taktak
Pathian i vawlei cozah uknak tangah mi kip nih daihnak an hmuh lai i pakhat le pakhat zaangfahnak le dinnak he an i pehtlai lai. Raltuknak le nawlngeihnak ningcang loin hmannak a um ti lai lo i a hrampi a herhmi ca zongah fakpi in i zuam a hau ti lai lo. Baibal nih hitin bia a kan kamh: “Pakhat le pakhat ahohmanh hnahnawhnak i pe lo tein anmah le an mitsur ruang cio le an theipi kung toi cio ah khua an sa hna lai.”—Mikah 4:3, 4.
A Ṭhami Inn Le Lungsinak A Pemi Rian
Chungkhar kip nih umnak hmun kan ngei lai lo timi ṭihnak an ngei lai lo i an ṭuanmi rian paohah thluachuah an hmu lai. Baibal ah a chim bantukin Pathian vawlei thar ah a ummi hna cu “an ṭuanmi rian ah khua awng an pem lai” asiloah pakpalawng a si lai lo.—Isaiah 65:21-23.
A Ṭha Bikmi Fimcawnnak
Baibal nih hitin bia a kan kamh: “Ram cu Bawipa hngalhnak in a khat lai.” (Isaiah 11:9) Pathian Pennak tangah a ummi hna nih anmah a Sertu hna Jehovah i donghnak a ngei lomi a fimnak le aa dawh tukmi, a thil sermi hna in an cawn lai. An hngalhnak kha hriamnam sernak asiloah midang harnak peknak caah an hmang lai lo. (Isaiah 2:4) Mah canah pakhat le pakhat dai tein umṭi khawh ning kong le vawlei zohkhenh khawh ning kong kha an cawn lai.—Salm 37:11.
Zungzal Nunnak
Nifatin nunnak kha kan i nuamhpi khawh nakhnga Pathian nih vawlei kha ṭha tein a rak timhtuah. Minung pawl vawleicung ah zungzal in an nun khawh nakhnga tinhnak a rak ngei. (Salm 37:29; Isaiah 45:18) A hrampi aa tinhnak a tlin khawh nakhnga Pathian nih “thihnak cu zungzal ca in a hrawh lai.” (Isaiah 25:8) Baibal nih “thihnak a um ti lai lo, ngaihchiatnak le ṭahnak le fahnak zong a um ti lai lo” tiah bia a kan kamh. (Biathlam 21:4) Pathian nih a ṭhalomi hi vawlei a hrawh tikah a khamh hna dingmi hna le vawlei thar ah a tho ṭhan dingmi rel cawk lomi mi thi pawl zong nih zungzal nunnak caan ṭha an hmu lai.—Johan 5:28, 29; Lamkaltu 24:15.
Mi nuai tampi cu a nai tuk cangmi Pathian Pennak tangah an nun khawh nakhnga atu in an i timtuah. Mitling lo an si ko nain Pathian nih vawlei thar ah umter a duhmi hna phun an si khawh nakhnga fakpi in an i zuam. Zeitin in dah? Jehovah Pathian kong le amah nih a thlahmi Jesuh Khrih kong an cawnnak thawngin a si.—Johan 17:3.
Hi vawlei donghnak in zeitindah na luat khawh timi kong le a ra laimi a ṭha deuhmi vawlei ah zeitindah na nun khawh timi kong kha tam deuh in hlathlai. Jehovah Tehte pakhat he man loin Baibal cawnnak kha cohlang asiloah jw.org in man loin Baibal hlathlai awkah i zuam.
Mah Kong Hna Zong Hi Na Duh Khawh Men
VENNAK INNSANG
Pathian Pennak Nih Zeidah A Liim Lai?
Pathian Pennak lawng nih vawleicung buaibainak vialte a hrawh khawh dih ti kha Jesuh nih a hngalh. Kan zumhnak a feh nakhnga Pennak nih zeidah a tuah cang?
