Zaanɖé dìn ɔ, acɛkpikpa Mawu tɔn na kp’acɛ dó gbɛtɔ́ lɛ bǐ jí sín jixwé, bɔ ayikúngban ɔ na huzu fí ɖaaɖagbe e gbɛtɔ́ lɛ sixu nɔ bǔ bo wà azɔ̌ e jɛmɛ nú ye é ɖè é ɖé. Mawu ko sɔ́ Jezu Klisu bɔ é na kp’acɛ dó ayikúngban ɔ jí. Jezu gbɔn vo nú acɛkpatɔ́ égbé tɔn lɛ gegě, ɖó mɛ e jí é na kp’acɛ dó lɛ é sín nǔ na nɔ ɖu ayi mɛ n’i tawun. Wanyiyi jí wɛ acɛkpikpa tɔn na jinjɔn, b’ɛ na lɛ́ nyí Axɔ́su e nɔ nyɔ́ xomɛ, nɔ kú nǔblawu nú mɛ, bo nɔ lɛ́ wà nǔ jlɔjlɔ é ɖé.—Ezayíi 11:4.

Hwenɛnu ɔ, tò e mɛ è gosin é, abǐ akɔ e mɛ è gosin é sɔ́ na zɔ́n bɔ kínklán na tíìn ǎ. Gbɛtɔ́ lɛ bǐ na nɔ bǔ. (Nǔɖexlɛ́mɛ 7:9, 10) Gbɛtɔ́ e na nɔ gbɛ̀ ɖò ayikúngban ɔ jí lɛ é bǐ na yí wǎn nú Mawu kpo nɔzo yetɔn lɛ kpo, bo na w’azɔ̌ alɔ ɖò alɔ mɛ, ɖò fífá mɛ, bonu linlin e Mawu ɖó sín dò ɖɔ ye ni kpé nukún dó xwé yetɔn e nyí ayikúngban ɔ é wu é na jɛnu.—Ðɛhan 115:16.

Enyi Axɔ́suɖuto Mawu tɔn jɛ acɛ kpa jí dó ayikúngban ɔ jí ɔ, Gbɛɖotɔ́ ɔ na sú kún dó nú adla lɛ. (Ðɛhan 24:1, 2) Hwenu e Jezu ɖò ayikúngban jí é ɔ, é bló bɔ jɔhɔn e ɖò nyinyi wɛ syɛnsyɛn é ɖé xwɛ, dó xlɛ́ nǔ e é sixu sɔ́ hlɔnhlɔn e Mawu na ɛ é dó wà é. (Maki 4:39, 41) Ðò acɛkpikpa Klisu tɔn glɔ́ ɔ, mɛɖé sɔ́ na ɖi xɛsi nú adla ɖě ǎ. Axɔ́suɖuto Mawu tɔn na lɛ́ bló bɔ fífá na tíìn ɖò gbɛtɔ́ lɛ kpo kanlin lɛ kpo tɛntin, bɔ mɛɖé sɔ́ na nɔ lɛ́ hɛn ayǐ mɛ gblé ǎ.—Ozée 2:20.

Mɛ bǐ na ɖò ganji ɖò lanmɛ. Mɛɖé sɔ́ na jɛ azɔn, kpò, alǒ kú ǎ. (Ezayíi 35:5, 6) Fí lɛ bǐ na nyɔ́ ɖɛkpɛ, bo fɛ́wǔ, bɔ gbɛtɔ́ lɛ na ɖu vivǐ tɔn lee é ɖè gbɔn bɔ asú kpo asì kpo nukɔntɔn ɔ ɖu vivǐ tɔn ɖò jikpá Edɛni tɔn mɛ é. Gbɛ̀ yɔyɔ̌ ɔ mɛ ɔ, jì na jɛ, bɔ mɛ e ɖò ayikúngban ɔ jí lɛ é bǐ na mɔ bɔ é na túnflá, lee é nyí gbɔn ɖò Edɛni é. (Bǐbɛ̌mɛ 2:9) Mɛ e na nɔ gbɛ̀ yɔyɔ̌ ɔ mɛ lɛ é bǐ “na nɔ ɖu nǔ gɔ́ xò” lee é nyí gbɔn nú akɔta Mawu tɔn hwexónu tɔn e nyí Izlayɛli é.—Levíi ví lɛ 26:4, 5.

Ðò acɛkpikpa Mawu tɔn e na kp’acɛ dó ayikúngban ɔ bǐ jí é glɔ́ ɔ, gbɛtɔ́ lɛ bǐ na nɔ fífá mɛ, bo na nɔ wà nǔ xá yeɖée kpo xomɛnyínyɔ́ kpo, kpodo hwɛjijɔ kpan. Ahwan sɔ́ na tíìn ǎ, mɛɖé sɔ́ na zán acɛ tɔn nyi dò ǎ, nǔ ɖě sɔ́ na hudo mɛɖé ǎ. Biblu d’akpá ɖɔ: “Mɛ ɖokpo ɖokpo na vo ɖò vǐwuntín tɔn kpo fígitín tɔn kpo sá, bɔ mɛ ɖebǔ sɔ́ na ɖè bo na gbà ayi dó nú ye ǎ”—Micée 4:3, 4.

Xwédo lɛ bǐ na ɖó xwé yeɖesunɔ tɔn, bo sɔ́ na nɔ ɖi xɛsi ɖɔ mɛɖé na wá yí sín emi sí ǎ. Gɔ́ na ɔ, azɔ̌ e mǐ na nɔ wà lɛ é bǐ sín lè wɛ mǐ na nɔ ɖu. Lee Biblu ɖɔ gbɔn é ɔ, mɛ ɖěɖee na nɔ gbɛ̀ yɔyɔ̌ ɔ mɛ lɛ é “sɔ́ na jɛ tagba dó wuvɔ̌ ɖě ǎ.”—Ezayíi 65:21-23.

Biblu d’akpá ɖɔ: “Mawu Mavɔmavɔ tuùntuùn na gɔ́ tò ɔ.” (Ezayíi 11:9) Mɛ ɖěɖee na nɔ Axɔ́suɖuto Mawu tɔn glɔ́ lɛ é na kplɔ́n nǔ dó nǔnywɛ Gbɛɖotɔ́ yetɔn Jehovah tɔn e ma ɖó dogbó ǎ é wu, bo na lɛ́ kplɔ́n nǔ dó nǔ ɖaaɖagbe e é dá lɛ é wu. Ye na zán nǔnywɛ yetɔn dó bló ahwanfunnú lɛ, alǒ dó wà nǔ dó mɛ ɖevo lɛ wu ǎ. (Ezayíi 2:4) É nyɔ́ wà ɔ, ye na kplɔ́n lee ye sixu nɔ fífá mɛ xá mɛ ɖevo lɛ, bo lɛ́ kpé nukún dó ayikúngban ɔ wu gbɔn é.—Ðɛhan 37:11.

Mawu zán hwenu dó sɔnǔ nú ayikúngban ɔ ganji, bonu mǐ na dó sixu ɖu vivǐ tɔn bǐ mlɛ́mlɛ́ ayihɔngbe ayihɔngbe. Linlin tɔn wɛ nyí ɖɔ gbɛtɔ́ lɛ na nɔ ayikúngban ɔ jí kaka sɔyi. (Ðɛhan 37:29; Ezayíi 45:18) Bonu linlin Mawu tɔn enɛ na dó jɛnu ɔ, é “na sú kú sín kún dó kaka sɔyi.” (Ezayíi 25:8) Biblu d’akpá ɖɔ: “Kú sɔ́ na tíìn ǎ, aluwɛ sɔ́ na tíìn ǎ, alěnina sɔ́ na tíìn ǎ, wuvɛ̌ mimɔ sɔ́ na tíìn ǎ.” (Nǔɖexlɛ́mɛ 21:4) Mawu na hun ali nú gbɛtɔ́ lɛ bǐ, bonu ye na nɔ gbɛ̀ kaka sɔyi; mɛ enɛ lɛ wɛ nyí mɛ ɖěɖee na gán hwenu e é na sú kún dó nú gbɛ̀ nyanya elɔ é, kpo mɛ maxamaxa ɖěɖee na fɔ́n sín kú byɔ gbɛ̀ yɔyɔ̌ ɔ mɛ lɛ é kpo.—Jaan 5:28, 29; Mɛsɛ́dó 24:15.

 Gbɛtɔ́ livi mɔ̌kpan tlɛ ko ɖò nǔ sɔ́ wɛ dìn bo na nɔ axɔ́suɖuto Mawu tɔn e ko sɛkpɔ́ bǐ é glɔ́. Ye nyí hwɛhutɔ́ có, ye ko ɖò tintɛnkpɔn wɛ bo na nyí mɛ alɔkpa e Mawu ba ɖɔ ye na nɔ gbɛ̀ yɔyɔ̌ emitɔn mɛ lɛ é. Gbɔn nɛ̌ é? Ye nɔ kplɔ́n nǔ dó Jehovah Mawu kpo mɛ e é sɛ́dó é, Jezu Klisu kpo wu.—Jaan 17:3.

A sixu mɔ tinmɛ gegě ɖevo lɛ dó lee a sixu gán ɖò vivɔnu gbɛ̀ elɔ tɔn, bo lɛ́ nɔ gbɛ̀ ɖò gbɛ̀ e nyɔ́ hugǎn bo ɖò malin-malin mɛ é mɛ gbɔn é wu. Yǐ gbè bonu Kúnnuɖetɔ́ Jehovah tɔn ɖé ni kplɔ́n Biblu xá we vɔ̌nu ɖò wema Ðu gbɛ̀ víví kaka sɔyi! mɛ.