Talè, lè gouvènman a Bondyé ki an syèl-la ké ka dirijé lézòm, latè ké vin on koté moun ké santi-yo byen menm. Moun ki ké viv anlè-y ké viv annawmoni é yo ké ni on travay itil ki ké ba-yo tchè-kontan. Bondyé chwazi Jézikri pou dirijé tout latè. Jézi pa kon sé dirijan-la jòdijou, i ké pran swen a limanité. Dominasyon a-y ké bazé asi lanmou, i ké on bon wa plen konpasyon é i ké fè tout biten èvè jistis (Izayi 11:4).

Sé moun-la ki ké viv adan mond nouvo la pé ké divizé parapòt a nasyonalité a yo oben ras a yo. Limanité ké fòwmé onsèl pèp é toutmoun ké ini (Révélasyon 7:9, 10). Toutmoun asi latè ké enmé Bondyé é pwochen a yo. Yo ké travay ansanm-ansanm adan lapé é yo ké fè sa Bondyé té prévwa lézimen fè dépi odépa : pran swen a kaz a yo, latè (Sòm 115:16).

Lè wayòm a Bondyé ké ka dirijé latè, Kréyatè-la ké woupran kontwòl a san pou san asi lanati (Sòm 24:1, 2). Lè Jézi kalmé on gwo manman tanpèt san fòsé, i ban-nou on ti lidé asi sa i kapab fè grasa puisans a Bondyé (Mawk 4:39, 41). Anba dominasyon a Kris, nou pé’é bizwen pè pon katastwòf natirèl. Lè wayòm a Bondyé ké ka gouvèné, lòm ké anpé èvè sé zannimo-la é annawmoni èvè lanati (Ozé 2:18).

Toutmoun ké ni on santé ki pawfè. Ponmoun pé’é malad, ponmoun pé’é vyéyi, é ponmoun pé’é mò (Izayi 35:5, 6). Lanati ké pwòp é i ké bèl kon i té yé adan Jadendédèn-la. É kon adan Jadendédèn-la, adan mond nouvo la, latè ké pwodui pou tann é konprann é toutmoun ké ni kont a manjé a-y (Jénèz 2:9). Kon pèp a Izrayèl an tan lontan, toutmoun ‘ké manjé pen a yo vant a yo plen’ (Lévitik 26:4, 5).

Anba gouvènman a Bondyé, toutmoun ké viv anpé é yo ké aji yonn èvè lòt épi bonté é jistis. Pé’é ni ni lagè, ni pwofitasyon é toutmoun ké ni sa yo bizwen pou viv. « Yochak ké sizé anba pyé-rézen a yo é anba pyé-fig a yo, é ponmoun pé ké fè-yo pè » (Miché 4:3, 4).

Chak fanmi ké ni kaz a-y é i pé’é pè yo mété-y déwò. Anplisdisa, tout travay sé moun-la ké fè la adan mond nouvo la ké ba-yo tchè-kontan. Kon Labib ka di, yo pé ké « travay rèd pou ayen », kivédi initilman (Izayi 65:21-23).

Labib ka pwomèt : « Konésans a Jéova ké ranpli latè » (Izayi 11:9). Moun ki ké viv adan mond nouvo la ké pwofité dè sajès èstraòwdinè a Kréyatè-la, Jéova, é i ké gidé-yo é anségné-yo grasa bèl biten i kréyé. Lézimen pé ké itilizé konésans a yo pou fè zam ni pou fè pwochen a yo ditò (Izayi 2:4). Okontrè, yo ké aprann viv anpé yonn èvè lòt é yo ké aprann pran swen a latè (Sòm 37:11).

Bondyé pran tan kréyé latè èvè swen pou lavi pé sa ban-nou tchè-kontan. Sa Bondyé té vlé odépa, sé kè lézimen viv anlè-y pou létèwnité (Sòm 37:29 ; Izayi 45:18). Pou i rivé fè sa, Bondyé « ké fè lanmò disparèt pou touttan » (Izayi 25:8). « Lanmò pé ké la ankò ; pé ké tini ni dèy, ni kri, ni doulè ankò », sé sa Labib ka pwomèt (Révélasyon 21:4). Bondyé ké ba toulézimen posibilité dè viv pou touttan, kivédi séla ki ké rété vivan lè fen a mond-lasa ké rivé, men osi foulmoun-la kè ponmoun pé pa konté ki ké résisité adan mond nouvo la (Jan 5:28, 29 ; Akt 24:15).

 Dépi konnyéla, plizyè milyon moun ka préparé-yo pou viv anba dominasyon a wayòm a Bondyé ki toupré rivé. Menmsi yo enpawfè, yo ja ka fè éfò pou ni pèwsonalité a moun kè Bondyé vlé adan mond nouvo a-y. Kijan yo ka fè sa ? Yo ka aprann konnèt Jéova Dyé é Jézikri (Jan 17:3).

Ès ou té’é enmé konnèt plis biten asi sa pou ou fè pou rété vivan lè fen a mond-lasa ké rivé é pou ou pé sa viv adan mond nouvo la ki toupré rivé ? Si ou dakò, aksèpté on lèson biblik san péyé èvè on Témwen a Jéova adan liv-la Ou pé ni tchè-kontan pou touttan !