Ogbẹ̀ to Paladisi mẹ to Yakẹ!
Jiwheyẹwhe dá aigba, na dodonọ lẹ nido nọgbẹ̀ to e ji kakadoi. (Salmu lẹ 37:29) Jiwheyẹwhe ze Adam po Evi po do jipa Edẹni tọn mẹ bo dọna yé, po ovi he yé na ji lẹ po dọ yé ni pọ̀ aigba lọ bo nọ penukundego.—Jenẹsisi 1:28; 2:15.
Ogbẹ̀ he mẹ mí ka te ehe ma di Paladisi he mẹ Jiwheyẹwhe jlo dọ mí ni nọ paali. Amọ́, Jiwheyẹwhe ma ko wọn tito etọn. Nawẹ Jiwheyẹwhe na diọ aigba zun paladisi gbọn? Mí mọ to hosọ he jẹnukọn lẹ mẹ dọ Jiwheyẹwhe ma na và aigba lọ. E na jo mẹhe setonu lẹ do bọ yé na nọgbẹ̀ to e ji. Nawẹ nulẹ na te to aigba ji to whenue enẹ na jọ?
Gandudu dopo gee wẹ na paṣẹ gbọn ogbẹ̀ lọ blebu mẹ
Zande din, gandudu Jiwheyẹwhe tọn he to olọn mẹ na paṣẹ do gbẹtọvi lẹpo ji. Mẹlẹ na vò to aigba ji, yé na nọ wanu dopọ bọ mẹlẹpo na do azọ́n dagbe. Jesu Klisti wẹ mẹhe Jiwheyẹwhe de nado dugán do aigba ji. Jesu ma na wanu di susu to aṣẹpatọ egbehe tọn lẹ mẹ. E na nọ dọ mẹhe ji e to gandu do lẹ tọn. Ahọlu he jọmẹ bo nọ vẹawumẹ bosọ nọ wà nuhe sọgbe wẹ e na yin. E na yiwanna mẹhe ji e paṣẹ do lẹ.—Isaia 11:4.
Pọninọ na tin gbọn ogbẹ̀ lọ blebu mẹ
Mẹlẹpo na yin nudopolọ, mẹde ma na ṣinyan akọ̀. Gbẹtọ lẹ na nọ wanu dopọ. (Osọhia 7:9, 10) Mẹhe na nọgbẹ̀ to aigba ji to whenẹnu lẹ na yiwanna Jiwheyẹwhe bo na yiwanna yenọzo. Yé na wazọ́n alọ to alọmẹ nado penukundo aigba go, dile Jiwheyẹwhe jlo do to bẹjẹeji.—Salmu lẹ 115:16.
Aimẹ na yọ́n gbọn filẹpo
To whenue Ahọluduta Jiwheyẹwhe tọn na dugán do aigba ji, jẹhọn-ahizi, otọ̀-gbàmẹ, po onú mọnkọ devo lẹ po ma nasọ tin ba. (Salmu lẹ 24:1, 2) Whenue Jesu to aigba ji, e ma tlẹ jẹtukla whẹpo do dó jẹhọn sinsinyẹn de te. Jiwheyẹwhe wẹ na ẹn huhlọn enẹ. (Malku 4:39, 41) To gandudu Klisti tọn glọ, mẹde ma na dibuna otọ̀-gbàmẹ po onú mọnkọ lẹ po. Pọninọ na tin to gbẹtọ po kanlin po ṣẹnṣẹn to whenue Ahọluduta Jiwheyẹwhe tọn na to gandu bọ filẹpo na wé bo mẹ́.—Hosea 2:18.
Mí na to jogún-jogún bọ núdùdù na tin bo pemẹnu
Mẹlẹpo na to ganji to agbasa mẹ. Mẹde ma na jẹazọ̀n, poyọnho kavi kú. (Isaia 35:5, 6) Lẹdo he wé bo mẹ́, ehe nkọ mẹ Adam po Evi po nọ to jipa Edẹni tọn mẹ, wẹ gbẹtọvi lẹ na nọ. To ogbẹ̀ yọyọ lọ mẹ, aigba na de sinsẹ́n susu tọ́n, dile e yindo to jipa Edẹni tọn mẹ bọ núdùdù na tin na mẹlẹpo. (Jenẹsisi 2:9) To hohowhenu, akọta Islaeli tọn nọ mọ ‘núdù gọ́ho,’ mọ wẹ mẹlẹpo na mọ núdù gọ́ho to Paladisi mẹ do. —Levitiku 26:4, 5.
Jijọho na tin bọ ayiha mẹlẹpo tọn na jai
To whenue gandudu Jiwheyẹwhe tọn na paṣẹ do ogbẹ̀ lọ blebu ji, jijọho na tin bọ gbẹtọvi lẹ na jọmẹ hẹ yenọzo. Mẹde ma na de mẹde pò. Awhàn ma nasọ tin ba, mẹde ma nasọ yí aṣẹpipa etọn do tafumẹ ba. Mí ma na zan míde vún whẹpo do mọ nuhe sin hudo mí do lẹ ba. Biblu dọ dọ: “Mẹdopodopo na nọ sinai to vẹntin etọn glọ podọ to ovòtin etọn glọ, bọ mẹde ma na nọ dobuna yé.”—Mika 4:3, 4.
Mẹlẹpo na do adọtẹn po azọ́n dagbe de po
Whẹndo dopodopo na do owhé etọn bo ma na dibu dọ mẹde na wá de yé sẹ̀ sọn finẹ. Mẹlẹpo wẹ na do azọ́n-jọ-azọ́n. Biblu dọ dọ mẹhe na nọ ogbẹ̀ yọyọ lọ mẹ lẹ “ma na jẹtukla to ovọ́ mẹ,” enẹ wẹ yindọ yé ma na nọ jẹtukla tata.—Isaia 65:21-23.
Mẹlẹpo na mọ oplọn dagbe yí
Biblu dọ dọ: “E họnwun dọ aigba na gọ́ na oyọnẹn Jehovah tọn.” (Isaia 11:9) Mẹhe na nọ ogbẹ̀ yọyọ lọ mẹ lẹ na fọ́n bo to nuplọn sọn nuyọnẹn jiawu Jehovah he yin Mẹdatọ yetọn tọn mẹ. Yé nasọ mọ nuplọn sọn onú dagbedagbe he e dá lẹ dè. Yé ma nasọ yí nuyọnẹn he yé do dó basi awhànfunnu lẹ kavi do wà danú do yenọzo go ba. (Isaia 2:4) Kakatimọ, yé na plọn lehe yé na nọ jijọho mẹ hẹ yenọzo do podọ lehe yé na penukundo aigba go do.—Salmu lẹ 37:11.
Mẹlẹpo na nọgbẹ̀ kaka sọyi
Jiwheyẹwhe yí sọwhiwhe do dá aigba na gbẹninọ to e ji nido vivi na gbẹtọvi lẹ to azán dopodopo ji. Ojlo etọn wẹ yindọ gbẹtọvi lẹ ni nọgbẹ̀ to e ji kakadoi. (Salmu lẹ 37:29; Isaia 45:18) Na ehe nido yọnbasi, Jiwheyẹwhe “na ze okú mì kakadoi.” (Isaia 25:8) Biblu dopà dọ: “Okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.” (Osọhia 21:4) To whenue Jiwheyẹwhe na và ogbẹ̀ ylankan ehe, mẹhe e na whlẹn lẹ po omẹ planplan he e na fọ́n sọn oṣiọ lẹ mẹ po wẹ gán nọgbẹ̀ kakadoi.—Johanu 5:28, 29; Owalọ lẹ 24:15.
Gbẹtọ livi susu lẹ gbọn ogbẹ̀ lọ blebu mẹ wẹ ko to awuwle nado nọ ogbẹ̀ yọyọ he to yakẹ lọ mẹ. Mapenọ wẹ yé yin pẹpẹ, amọ́ yé nọ to kanván nado wleawuna jijọ he nkọ Jiwheyẹwhe jlo dọ mẹhe na nọ ogbẹ̀ yọyọ lọ mẹ lẹ ni do. Nawẹ e nọ pà yé gbọn? Yé nọ plọnnu nado yọ́n Jehovah Jiwheyẹwhe po Jesu Klisti, mẹhe e dohlan po.—Johanu 17:3.
A sọgan yọ́n nuhe a na wà nado gán to whenue ogbẹ̀ ehe na vọ̀ bo nọ ogbẹ̀ dagbe he to yakẹ lọ mẹ. Eyin a jlo, a gán kẹalọyi hodọdopọ sinai do Biblu ji sọn Kunnudetọ Jehovah tọn de dè to owe lọ Duvivi Ogbẹ̀ Tọn Kakadoi! mẹ.
A Gán Sọ Pọ́n Hosọ Ehelẹ
ATỌ̀HỌ̀-NUHIHỌ́ LỌ TỌN
Dagbe Tẹwẹ Ahọluduta Jiwheyẹwhe Tọn Na Wà?
Jesu yọnẹn dọ Ahọluduta Jiwheyẹwhe tọn kẹdẹ wẹ gán didẹ nuhahun gbẹtọvi lẹ tọn. Etẹwẹ Ahọluduta lọ ko wà nado hẹn mí deji dọ e na jla nulẹ do?
ATỌ̀HỌ̀-NUHIHỌ́ LỌ TỌN
Ahọluduta Jiwheyẹwhe Tọn—Gandudu de He Ma Nọ Hò Ahizi
Onú voovo ṣidopo delẹ dohia dọ Ahọluduta enẹ ma nọ hò ahizi pọ́n gbede.
