Araranni ngana nga pammagurayan na bagu nga nelangitan nga gobiernu na Dios i ngamin nga totolay. Mabbalin sangaw tu magayayya i pattolay ta davvun—mattaradday i totolay, anna makasta anna makapagayayya i trabahu da. Pinili na Dios si Jesu-Cristo nga mammaguray ta davvun. Pagolluan noka ni Jesus i pammakapianan na totolay, ari tu kagitta na mammaguray ira sangawe. Mammaguray yayya nga navulunan tu aya. Masippo, minangngikallo, anna patas noka yayya nga Patul.​—Isaias 11:4.

Ari ngana noka nagrupo-grupo segun ta lahi onu tribu i totolay ta davvun. Mattaradday i ngamin. (Nepakannammu 7:9, 10) Iddukan na ngamin nga totolay i Dios anna i kasittoleda. Mattaradday gapa ira tapenu ituppal i orihinal nga gakkag na Dios nga tangngalladda i planeta nga Davvun nga paddianadda.​—Salmo 115:16.

Sonu mammaguray ngana ta davvun i Pappatulan na Dios, kontroladu noka na Dios i klima anna siguraduan na nga balanse yaw. (Salmo 24:1, 2) Ta kegga ni Jesus ta davvun, nipasingan na i pakapangngua nga niyawa sa na Dios kustu pinagimmang na i masiki-sikan nga bagiu. (Marcos 4:39, 41) Ta pammaguray ni Cristo, awan ngana tu kalamidad ira nga paganassingattam. Itoli na Pappatulan na Dios i makasta nga relasion na totolay anna na ayam ira anna ari tam ngana gapa daralan i pallevu.​—Oseas 2:18.

Perfekto ngana noka i gawa-gawayyan na ngamin. Awan ngana tu mattaki, mallakay, mabbako, onu matay. (Isaias 35:5, 6) Maddian i totolay ta makakkasta anna marenu nga pallevu kagitta na tagga ta hardin na Eden nga pinaddianan na ollu nga magatawa. Ta Paraiso kagitta na bi ta Eden, mavvunga i davvun tu abundansia nga makan anna aru i makan para ta ngamin. (Genesis 2:9) Kagitta na ta nasion na Israel tagga, ngamin ta Paraiso ay kuman “adde ta mabattug.”​—Levitico 26:4, 5.

Ta pammaguray na gobiernu na Dios, memammo i paddia-paddian na totolay. Masippo anna patas i pattratu da ta kataggi-tadday. Awan tu gerra, awan tu abusadu nga mammaguray, anna meyawa i pakawagan na ngamin. Nepromesa ta Biblia: “Magitubang i kada tadday nira ta lirum na fun na ubas na anna ta lirum na fun na igos na, anna awan tu sinni laman nga mangananassing nira.”​—Mikias 4:3, 4.

Egga i balay na kada familia anna ariadda mavurung nga madaral onu mawawan yatun. Makapagayayya gapa i anni laman nga trabahu tam. Kagitta na nakagi ta Biblia, “ari ira mabbannag nga awan tu sesserbi na” sonu Paraiso.​—Isaias 65:21-23.

Nepromesa ta Biblia: “Siguradu nga mapannu i davvun tu pakannammu kani Jehova.” (Isaias 11:9) Makagigiammu i ngamin nga sakup na Pappatulan na Dios ta araralam nga ka-uto na Namaratu, si Jehova. Magigiammu da gapa i makkarasta ira nga pinaratu na. Ari da nga usan i pakannammu da tapenu magangngua tu armas onu takitan i kasittoleda. (Isaias 2:4) Gigiammuadda lallagu nu kunnasi mabbalin tu memammo i relasiodda ta tanakuan anna nu kunnasi da tangngallan i davvun.​—Salmo 37:11.

Niprepara tu mapia na Dios i davvun tapenu magayayya ittam nga mattolay kada aggaw. Ikaya na nga mattolay ittam tu mannanayun ta davvun. (Salmo 37:29; Isaias 45:18) Tapenu matuppal na Dios i orihinal nga gakkag na, “sillungan na i patay ta mannanayun.” (Isaias 25:8) Nepromesa ta Biblia: “Awan ngana noka tu matay, onu maraddam, onu tumangi-tangi, onu magattam ta taki.” (Nepakannammu 21:4) Iddan na Dios tu chansa nga mattolay tu mannanayun i ngamin nga totolay—danuri ipaliag na sonu daralan na i marake nga mundo anna danuri paginnolayan na ta bagu nga mundo.​—Juan 5:28, 29; Kingngua 24:15, NW.

 Sangawe paga laman, minillion ngana i maggiggigiammu nu kunnasi mappasakup ta Pappatulan na Dios nga araranni ngana. Maski imperfekto ira, ikakkagumadda ngana nga mabbalin tu klase na totolay nga ikaya na Dios ta bagu nga mundo. Kunnasi? Gukaban na paggigiammu da meyannung kani Jehova nga Dios anna kani Jesu-Cristo nga zinog na.​—Juan 17:3.

Ammuan paga nu kunnasi ka mepaliag ta panuppalan naw nga mundo anna nu kunnasi ka makapattolay ta mas makasta nga mundo nga araranni ngana. Awayyam i mappa-Bible study tu libre ta tadday ta Saksi ira ni Jehova nga usan nu i libru nga Magayayya nga Mattolay tu Mannanayun!