Pɩkazɩ pazɩ, Ɛsɔ komina kɩfalʋʋ ŋgʋ kɩwɛ ɛsɔdaa yɔ, kɩkaɣ cɔnʋʋ ɛyaa kpeekpe yɔɔ. Alɩwaatʋ ndʋ tɩ-taa lɛ, tɛtʋ kaɣ pɩsʋʋ lone kɩbanɖɛ nɖɩ ɖɩ-taa ɛyaa kaɣ caɣʋ wezuu nɔɔ kʋɖʋmaɣ taa nɛ pala tʋma kɩbana nɛ pe-liu sɩ yɔ. Ɛsɔ lɩzɩ Yesu Krɩstʋ na se ɛcɔnɩ tɛtʋ yɔɔ. Sɔnɔ, ɛjaɖɛ yɔɔ ñʋndɩnaa sakɩyɛ iikeŋni mba pɔcɔŋnɩ pɔ-yɔɔ yɔ. Ɛlɛ Yesu ñɛfɛyɩ mbʋ. Ɛkaɣ cɔnʋʋ ɛyaa yɔɔ camɩyɛ. E-Kewiyitu tɔɔʋ tigiɖe lɛ sɔɔlɩm. Ɛkaɣ labʋ ɛyaa kɩbandʋ, ɛna pa-pʋtɔdɩyɛ nɛ ɛwɩlɩ se ɛnɩɣ ɛyaa tɔm taa.—Izaayii 11:4.

Ɛjaɖɛ sɔɔlʋʋ nɛ kʋnʋmɩŋ paakaɣ tayʋʋ ɛyaa mba pakaɣ wɛʋ tɛtʋ yɔɔ yɔ pɛ-hɛkʋ taa. Nɔɔ kʋɖʋmaɣ kaɣ wɛʋ ɛyaa kpeekpe hɛkʋ taa. (Natʋ 7:9, 10) Ɛyaa mba pakaɣ wɛʋ tɛtʋ yɔɔ yɔ, pa-tɩŋa pakaɣ sɔɔlʋʋ Ɛsɔ nɛ po-koobiya. Pakaɣ labʋ tʋmɩyɛ nɔɔ kʋɖʋmaɣ taa se pɩsa nɛ pɔcɔnɩ tɛtʋ yɔɔ ɛzɩ Ɛsɔ kaaɖʋʋ kiɖe tɛɛ yɔ.—Keɣa 113B:16.

Alɩwaatʋ ndʋ Ɛsɔ Kewiyaɣ paɣzɩɣ ɖiyuu tɛtʋ yɔ, wondu Lɩzɩyʋ kaɣ yebu nɛ ɛjaɖɛ yɔɔ wɛtʋ tɩŋa la tʋmɩyɛ camɩyɛ. (Keɣa 23:1, 2) Yesu kaawɛ tɛtʋ yɔɔ lɛ, ɛlaba nɛ helim sɔsɔm nabʋyʋ hɛɛ; pɩwɩlɩ se Ɛsɔ ha-ɩ ɖoŋ sɔsɔŋ nɩɩyɩ. (Maarɩkɩ 4:39, 41) Yesu kewiyitu tɔɔʋ alɩwaatʋ taa, asɛyʋʋ nakʋyʋ ɛɛtasɩɣ labʋ nɛ piyele nɛ sɔɔndʋ kpa tɛtʋ yɔɔ ɛyʋ nɔɔyʋ. Ɛsɔ Kewiyaɣ kaɣ yebu nɛ nɔɔ kʋɖʋmaɣ ŋga kaawɛ wondu kɩlɩzɩtʋ nɛ ɛyaa pɛ-hɛkʋ taa yɔ kapɩsɩ.—Ozee 2:18.

Paa weyi ɛkaɣ wɛnʋʋ tɔnʋʋ taa alaafɩya ŋgʋ kɩtalɩ pilim yɔ. Nɔɔyʋ ɛɛkaɣ tɔlʋʋ kʋdɔŋ, ɛkpadɩyɩ yaa ɛsɩ. (Izaayii 35:5, 6) Ɛjaɖɛ nɖɩ ɖɩ-yɔɔ ɛyaa kaɣ caɣʋ wezuu yɔ ɖɩ-taa, kʋzɔɔtʋ ɛɛkaɣ wɛʋ. Ɛjaɖɛ yɔɔ wɛtʋ kaɣ wɛʋ ɛzɩ Edɛɛnɩ kaɖaɣ taa ɖenɖe kajalaɣ halʋ nɛ abalʋ paacaɣ wezuu yɔ. Ɛjaɖɛ kɩfaɖɛ taa, tɔɔnaɣ kaɣ labʋ sakɩyɛ nɛ tɛtʋ yɔɔ ɛyaa kpeekpe kaɣ wɛnʋʋ tɔɔnaɣ sakɩyɛ ɛzɩ pɩɩwɛʋ Edɛɛnɩ kaɖaɣ taa yɔ. (Kiɖe Tɛɛ Tɔm 2:9) Ɛzɩ pɩɩwɛʋ Izrayɛɛlɩ ɛjaɖɛ taa yɔ, Paradisuu taa, paa weyi ‘ɛkaɣ ɛ-tɔɔnaɣ tɔɔʋ’ nɛ ɛhaɣ.—Levitiki 26:4, 5.

Ɛyaa mba Ɛsɔ komina kaɣ pɔ-yɔɔ cɔnʋʋ yɔ, pa-tɩŋa pakaɣ wɛʋ laŋhɛzɩyɛ taa nɛ palakɩ ɖama camɩyɛ lakasɩ nɛ nɔɔyʋ ɛɛkaɣ nɔɔyʋ muluu. Yoŋ ɩɩkaɣ wɛʋ, nɔɔyʋ ɛɛkaɣ nazʋʋ lɛlʋ, nɛ paa weyi ɛkaɣ wɛnʋʋ mbʋ pɩpɔzɩ-ɩ yɔ. Bibl haɣ-ɖʋ lidaʋ kʋnɛ: “Nɛ paa weyi lɛ ɛkaɣ caɣʋ e-viiñi taa nɛ e-hiyuu tɛɛ, nɛ nɔɔyʋ ɛɛkaɣ-ɩ tɔm caʋ.”—Mikee 4:3, 4.

Paa hɔʋ ŋgʋ, kɩkaɣ wɛnʋʋ kɩ-ɖɩɣa; nɛ sɔɔndʋ ɛɛkaɣ-kʋ kpaʋ se wiɖiyi kiilesi ɖɩɣa ŋga. Tʋma wena payɩ ɖɩkaɣ labʋ yɔ, aakɛɣ falaa tʋma. Ɛzɩ Bibl yɔɔdʋʋ yɔ, ɛyaa mba pakaɣ caɣʋ wezuu ɛjaɖɛ kɩfaɖɛ taa yɔ, “paakaɣ labʋ tʋmɩyɛ yem falaa.”—Izaayii 65:21-23.

Bibl labɩ tamaɣ se pakaɣ tɩlʋʋ “Kɩbaɣlʋ tɛtʋ kpeekpe taa camɩyɛ.” (Izaayii 11:9) Ɛyaa mba pakaɣ caɣʋ wezuu ɛjaɖɛ kɩfaɖɛ taa yɔ, pakaɣ kpɛlɩkʋʋ pa-Lɩzɩyʋ Yehowa lɔŋsɩnɖɛ nɖɩ ɖɩfɛyɩ kamaɣ nɛ wondu kɩbandʋ ndʋ ɛlɩzaa yɔ tɩ-yɔɔ tɔm. Paakaɣ kpaɣʋ pɔ-lɔŋsɩnɖɛ se polubini you wondu yaa palabɩnɩ lalaa kɩdɛkɛdɩm. (Izaayii 2:4) Ɛlɛ, pakaɣ kpɛlɩkʋʋ ɛzɩma pa nɛ lalaa pacaɣ wezuu laŋhɛzɩyɛ taa yɔ, nɛ ɛzɩma pɩwɛɛ se pɔcɔnɩ tɛtʋ yɔɔ camɩyɛ yɔ.—Keɣa 36:11.

Ɛsɔ ñɔɔzɩ tɛtʋ camɩyɛ se pɩsa nɛ ɖɩcaɣ wezuu tɩ-yɔɔ nɛ ɖɩnɩɣ leleŋ paa ɖooye. Ɛɖʋ ɛ-taa se ɛyaa ɩcaɣ tɛtʋ yɔɔ tam tam. (Keɣa 36:29; Izaayii 45:18) Pɩsa nɛ Ɛsɔ yele nɛ tamaɣ ŋga ɛɛwɛnɩ kiɖe tɛɛ yɔ kala lɛ, “Kɩbaɣlʋ kaɣ ɖɩzʋʋ sɩm kpaagbaa ɖɩzʋʋ.” (Izaayii 25:8) Bibl labɩ tamaɣ se: “Sɩm ɛɛkaɣ tasʋʋ wɛʋ, kʋñɔwiye nɛ kubusi mabʋ nɛ wɩzasɩ paakaɣ tasʋʋ wɛʋ ɖɔɖɔ.” (Natʋ 21:4) Ɛsɔ kaɣ haʋ ɛyaa kpeekpe waɖɛ se pacaɣ wezuu tam. Ɛkaɣ haʋ waɖɛ nɖɩ ɛyaa mba ɛyakɩ pa-ñʋʋ alɩwaatʋ ndʋ ɛɖɩzɩɣ ɛjaɖɛ kɩdɛkɛdɩyɛ ɖɩnɛ yɔ nɛ ɛyaa mba ɛkaɣ fezuu ɛjaɖɛ kɩfaɖɛ taa yɔ.—Yohanɛɛsɩ 5:28, 29; Tʋma Labʋ 24:15.

 Halɩ lɛɛlɛɛyɔ maɣmaɣ ɛyaa sakɩyɛ ɖiɣni pa-tɩ ñɔɔzʋʋ se pacaɣ wezuu ɛjaɖɛ kɩfaɖɛ taa; nɛ ɖɩñɔtɩ kpam. Paa patɩtalɩ pilim yɔ, peɖiɣni ñaɣʋ pana se pɛkɛ ɛyaa mba Ɛsɔ sɔɔlaa se pacaɣ wezuu ɛjaɖɛ kɩfaɖɛ taa yɔ. Ɛzɩma tɩyɛ? Pɛkpɛlɩkɩɣ Ɛsɔ Yehowa nɛ Yesu Krɩstʋ weyi etiyaa yɔ pɔ-yɔɔ tɔm.—Yohanɛɛsɩ 17:3.

Kpɛlɩkɩ nɛ ŋtɩlɩ mbʋ ŋpɩzɩɣ ŋla nɛ ŋhiɣ ñʋʋ yabʋ ɛjaɖɛ ɖɩnɛ ɖɩ-tɛm wiye nɛ ŋcaɣ wezuu ɛjaɖɛ kɩfaɖɛ taa yɔ pɩ-yɔɔ tɔm nɛ pɩkɩlɩ; ɛjaɖɛ kɩfaɖɛ nɖɩ ɖɩñɔtɩ kpam. Tisi nɛ ña nɛ Yehowa Aseɣɖe Tʋ nɔɔyʋ ɩtɩŋnɩ Nɩɩ wezuu leleŋ tam! takayaɣ yɔɔ nɛ ɩkpɛlɩkɩ Bibl falaa.