Kubika fioti, ntangu luyalu ya Nzambi ta twadisa bantu yonso, ntoto ta kuma kisika yina bantu ta zingaka na kiese, na bumosi mpi bo ta salaka bisalu ya mbote yina ta natilaka bo kiese. Nzambi me ponaka Yezu Kristu sambu na kuyala ntoto. Bubu yai, bamfumu mingi ke kudibanzaka ve sambu na bantu. Kansi Yezu kele ve bonso bo sambu yandi ta salaka ntangu yonso mambu ya mbote sambu na bantu. Yandi ta yala bantu na zola. Yandi ta vanda Ntotila ya mawete, ya ke wilaka bantu mawa mpi ya mbote.​—Yezaya 11:4.

Bantu yina ta zinga na ntoto ta vanda ve ya kukabwana na bansi to na bandinga. Bantu yonso ta vanda na bumosi. (Kusonga 7:9, 10) Bantu yonso yina ta zinga na ntoto ta zola Nzambi mpi bantu ya nkaka. Bo ta sala na bumosi mpi na ngemba sambu na kulungisa lukanu yina Nzambi vandaka ti yo ya kutanina ntoto, kisika yina bo ke zinga.​—Nkunga 115:16.

Ntangu Kimfumu ya Nzambi ta yala ntoto, Nzambi ta yala bangolo yonso ya lugangu, yo ta nataka diaka ve mavwanga. (Nkunga 24:1, 2) Ntangu Yezu vandaka awa na ntoto, yandi manisaka mupepe mosi ya ngolo. Na dibaku yina, yandi monisaka mambu yina yandi lenda sala ti ngolo yina Nzambi me pesaka yandi. (Marko 4:39, 41) Na luyalu ya Kristu, ata muntu mosi ve ta vanda ti kikuma ya kuwa boma ya bisumbula ya lugangu. Kimfumu ya Nzambi ta sala mpi nde bantu ti bambisi kuzinga na ngemba mpi bantu ta bebisa diaka ve bima yina kele na ntoto.​—Ozea 2:18.

Bantu yonso ta vanda ti sante ya kukuka. Ata muntu mosi ve ta bela, ta kuma mununu, to ta fwa. (Yezaya 35:5, 6) Bantu ta zinga na kisika mosi ya kitoko mpi ya bunkete bonso yina bakala ti nkento ya ntete zingaka na kilanga ya Edeni. Kaka bonso na Edeni, na nsi-ntoto ya mpa, ntoto ta basisa madia mingi mpi bantu yonso ta vanda ti madia mingi kibeni. (Kuyantika 2:9) Bonso Izraele yina vandaka dikanda ya Nzambi na ntangu ya ntama, na Paladisu konso muntu ta “dia mampa [na yandi] mpi ta fuluka.”​—Levi 26:4, 5.

Na nsi ya Kimfumu ya Nzambi yina ta yala ntoto ya mvimba, bantu yonso ta zinga na ngemba mpi ta sadila bantu ya nkaka mambu na mawete mpi na mutindu ya mbote. Bitumba ta vanda diaka ve, bantu ta sadila diaka ve kiyeka na mutindu ya mbi mpi konso muntu ta vanda ti bima yina yandi kele ti yo mfunu. Biblia ke tuba nde: “Bo ta vanda, konso muntu na nsi ya nti na yandi ya vinu mpi na nsi ya nti na yandi ya bafige, ata muntu mosi ve ta pesa bo boma.”​—Mika 4:3, 4.

Konso dibuta ta vanda ti nzo mpi bo ta wa boma ve nde bo lenda kula bo, mpi bisalu yonso yina beto ta sala ta natila beto mambote. Mutindu Biblia ke tuba yo, bantu yina ta zinga na nsi-ntoto ya mpa ya Nzambi “ta sala ve kisalu ya ngolo sambu na mpamba,” to kukonda lufutu.​—Yezaya 65:21-23.

Biblia ke tuba nde: “Ntoto ta fuluka kibeni ti nzayilu ya Yehowa.” (Yezaya 11:9) Bantu yina Kimfumu ya Nzambi ta yala ta longuka kukonda nsuka mayele yina Yehowa, Muntu ya salaka bo kele ti yo, mpi bo ta baka malongi na bima ya kitoko yina yandi me salaka. Bo ta sadila ve mayele na bo sambu na kusala minduki to kuniokula bantu ya nkaka. (Yezaya 2:4) Kansi, bo ta longuka mutindu ya kuzinga na ngemba ti bantu ya nkaka mpi mutindu ya kutanina ntoto.​—Nkunga 37:11.

Nzambi tulaka dikebi ya mingi ntangu yandi vandaka kusala ntoto sambu beto sepela na mutindu ya me fwana na luzingu konso kilumbu. Yandi zolaka nde bantu kuzinga mvula na mvula na ntoto. (Nkunga 37:29; Yezaya 45:18) Sambu na kulungisa lukanu yina, yandi “ta mina lufwa kimakulu.” (Yezaya 25:8) Biblia ke tuba nde: “Lufwa ta vandaka diaka ve; mawa, bidilu, mpi mpasi ta vandaka diaka ve.” (Kusonga 21:4) Nzambi ta pesa bantu yonso disongidila, bayina yandi ta gulusa ntangu yandi ta fwa nsi-ntoto mpi bamingi yina yandi ta futumuna na nsi-ntoto ya mpa, dibaku ya kuzinga mvula na mvula.​—Yoane 5:28, 29; Bisalu 24:15.

 Bamilio ya bantu na ntoto ya mvimba ke yilama dezia bubu sambu na kuzinga na nsi ya lutwadisu ya Kimfumu ya Nzambi yina me kuma pene-pene. Ata bo kele bantu ya kukonda kukuka, bo ke sala dezia bikesa sambu na kuvanda mutindu ya bantu yina Nzambi ke zola kumona na nsi-ntoto na yandi ya mpa. Inki mutindu? Bo ke longuka na kuzaba Yehowa Nzambi mpi muntu yina yandi tindaka, Yezu Kristu.​—Yoane 17:3.

Keti nge ta sepela kuzaba mambu ya nkaka yina nge fwete sala sambu na kuguluka na nsuka ya nsi-ntoto yai mpi kuzinga na nsi-ntoto ya mbote yina ke kwisa? Kana ee, ndima kulonguka Biblia ti Mbangi ya Yehowa mosi na mukanda Zinga Mvula na Mvula!