Eduparadisa oli li popepi!
Kalunga okwa shita edu, opo ovayuki va kale ko fiyo alushe. (Epsalme 37:29) Okwa li a tula ovalihomboli votete, Adam naEva, moshikunino shiwa shaEden, nokwa li e va pa oshinakuwanifwa pamwe noludalo lavo, va longe edu noku li fila oshisho. — Genesis 1:28; 2:15.
Kunena, ounyuni kau fi Oparadisa ngaashi Kalunga a li a lalakanena. Ashike nande ongaho, Kalunga ina lundulula elalakano laye. Ongahelipi ta ka dula okuwanifa po elalakano laye lopehovelo? Ngaashi sha popiwa moshitukulwa sha tetekela, Kalunga ita ka hanauna po edu. Ponhele yaasho, ota ka efa ovanhu ovadiinini va kale ko. Mbela eshi Kalunga ta ka wanifa po omaudaneko aye, eenghalo kombada yedu otadi ka kala da tya ngahelipi?
Edu alishe otali ka pangelwa kepangelo limwe
Mafiku, eshi epangelo laKalunga lipe lomeulu tali ka pangela ovanhu aveshe, edu otali ka kala onhele iwa, novanhu otava ka kala moukumwe nokulonga osho shiwa nokuhafela oilonga yavo. Kalunga okwa nangeka po Jesus Kristus oye a ka pangele ombada yedu. Mepingafano novapangeli vahapu vopanhu vokunena, Jesus ota ka kala e na ko nasha nouwa wovapangelwa vaye. Epangelo laye otali ka kala la kanghamena kohole nota ka kala Ohamba i na onghenda noiyuki. — Jesaja 11:4.
Ovanhu otava ka kala va hangana mounyuni aushe
Ovanhu ovo tava ka kala mounyuni mupe itava ka kala va tukauka pamihoko, ile paukwashiwana. Ovanhu otava ka kala oshiwana sha hangana. (Ehololo 7:9, 10) Ovanhu aveshe ovo tava ka kala kombada yedu, otava ka kala ve hole Kalunga, ovanhu vakwao, notava ka longela kumwe mombili opo va wanife po elalakano laKalunga lopehovelo li na sha nokufila oshisho edu. — Epsalme 115:16.
Oinima momudingonoko otai ka longela kumwe
Eshi Ouhamba waKalunga tau ka pangela edu, onghalo yomhepo otai ka kala ya wanenena. (Epsalme 24:1, 2) Eshi Jesus a li a mweneka oshikungulu sha nyika oshiponga eshi a li kombada yedu, okwa ulika osho ta dulu okuninga kekwafo leenghono daKalunga. (Markus 4:39, 41) Koshi yepangelo laKristus, ovanhu itava ka kala vali va tila oiponga yopaushitwe. Eshi Ouhamba waKalunga tau ka pangela, oinamwenyo otai ka kala nombili novanhu. — Hosea 2:18.
Oukolele muwa nosho yo oikulya ya wana
Keshe umwe ota ka hafela oukolele wa wanenena. Kape na oo ta ka ehama, ta ka kulupa, ile a fye. (Jesaja 35:5, 6) Ovanhu otava ka hafela omudingonoko muwa nowa koshoka, ngaashi ashike oo ovalihomboli votete va li va hafela moshikunino shaEden. Mounyuni mupe, edu otali ka menifa oikulya ihapu, novanhu aveshe kombada yedu otava ka kala ve na oikulya ya wana, ngaashi ashike sha li muEden. (Genesis 2:9) Ngaashi ashike oshiwana shaKalunga shonale shaIsrael, keshe umwe mOparadisa ota ka ‘lya omungome waye wa wana.’ — Leviticus 26:4, 5.
Ombili neameno lashili
Koshi yepangelo laKalunga olo tali ka pangela kombada yedu alishe, ovanhu aveshe otava ka kala mombili, ve na onghenda nove li ovayuki. Itaku ka kala vali oita, elongifonai leenghonopangelo, nakeshe umwe ota ka kala e na osho a pumbwa. Ombiibeli oya udaneka ya ti: “Otava ka kala omutumba, keshe umwe, momudile womuviinyu waye nowomukwiyu waye, ndele kape na ou te va tilifa.” — Mika 4:3, 4.
Keshe umwe ota ka kala e na eumbo liwa nokuhafela oilonga
Oukwaneumbo keshe itau ka kala vali wa tila okukanifa onhele yao, noilonga yavo otai ka nangekwa noupuna. Ngaashi Ombiibeli ya popya, ovo tava ka kala mounyuni mupe waKalunga “itave ke lihepeka epwanga,” ile tu tye, oshimha. — Jesaja 65:21-23.
Ehongo la denga mbada
Ombiibeli oya udaneka ya ti: “Edu alishe otali ka kala li yadi eshiivo lokushiiva Omwene.” (Jesaja 11:9) Ovanhu ovo tava ka kala koshi yOuhamba waKalunga, otave ke lihonga kounongo munenenene wOmushiti wavo nosho yo kombinga yoinima iwa oyo a shita. Itava ka longifa eshiivo lavo va hambule oilwifo, ile va ningile vamwe owii. (Jesaja 2:4) Ponhele yaasho, otave ke lihonga nghee ve na okukala nombili novanhu vakwao nonghee ve na okufila oshisho edu. — Epsalme 37:11.
Omwenyo waalushe
Kalunga okwa longekida edu nawa opo tu dule okuhafela onghalamwenyo pauyadi efiku keshe. Okwa hala ovanhu va kale nomwenyo fiyo alushe kombada yedu. (Epsalme 37:29; Jesaja 45:18) Opo Kalunga a wanife po elalakano laye olo lopehovelo, “ota ka hanauna po efyo fiyo alushe.” (Jesaja 25:8) Ombiibeli oya udaneka ya ti: ‘Efyo itali ka kala po vali, ile oluhodi, okulila nouyahame itau ka kala po vali.’ (Ehololo 21:4) Ngeenge Kalunga a hanauna po ounyuni ou woukolokoshi, ovanhu aveshe ovo tava ka xupa nosho yo ovo tava ka nyumunwa, otava ka kala nomwenyo waalushe mounyuni mupe. — Johannes 5:28, 29; Oilonga 24:15.
Nokuli nopaife, ovanhu omamiliyona mounyuni aushe otave lilongekidile oku ka kala koshi yOuhamba waKalunga oo u li poduka. Nonande inava wanenena, ohava ningi eenghendabala va kale ngaashi ovanhu ovo Kalunga a hala va ka kale mounyuni mupe. Ngahelipi mbela? Omokulihonga kombinga yaJehova Kalunga nosho yo Jesus Kristus, oo a tumine. — Johannes 17:3.
Mona ouyelele muhapu u na sha nanghee to dulu okuxupa pexulilo lounyuni ou noku ka kala mounyuni mupe oo u li pokuuya. Tambula ko eenghundafana dopaMbiibeli doshali okudja kuumwe womEendombwedi daJehova to longifa embo Nghee to dulu okuhafela onghalamwenyo fiyo alushe!
Otashi dulika yo u hafele oikundafanwa ei
OSHUNGONANGELO
Ouhamba waKalunga otau uya okuninga shike?
Jesus okwa li e shii kutya Ouhamba waKalunga oo ashike epangelo tali dulu okukandula po omaupyakadi kombada yedu. Ouhamba waKalunga owa ninga nale shike opo tu kale twe u lineekela?
OSHUNGONANGELO
Ouhamba waKalunga, epangelo olo lihe na oulingilingi
Oinima 6 oyo tai ulike kutya Ouhamba itau ka kala u na nandenande oulingilingi.
