တယံာ်လၢၤဘၣ်​ ကစၢ်ယွၤ အတၢ်ပၢတၢ်ပြးလၢမူခိၣ်န့ၣ်​ ကပၢဝဲ ပှၤဟီၣ်ခိၣ်ဖိခဲလၢာ်လီၤ. ဖဲန့ၣ်အခါ ပှၤဟီၣ်ခိၣ်ဖိခဲလၢာ် ကအိၣ်ဘၣ်ဝဲ ဃူဃူဖိးဖိး ဒီးကမၤဘၣ်တၢ်မၤလၢ အလီၤသူၣ်မံသးမုာ်. ဒီးကစၢ်ယွၤဃုထၢထီၣ်ဝဲ ယ့ၣ်ၡူးခရံာ်လၢ ကပၢဟီၣ်ခိၣ်အဂီၢ်လံ. မုၢ်မဆါတနံၤအံၤ ပှၤပၢတၢ်အါဂၤန့ၣ်​ တဆိကမိၣ်န့ၢ်တၢ်လၢ ပှၤလၢအဝဲသ့ၣ်ပၢဝဲတဖၣ်​ အဂီၢ်ဘၣ်. ဘၣ်ဆၣ်​ ယ့ၣ်ၡူးန့ၣ်​ တလီၤဂာ်ဒီးအဝဲသ့ၣ်ဘၣ်. ထီဘိန့ၣ်​ ယ့ၣ်ၡူးဆိကမိၣ်န့ၢ်တၢ်လၢ ပှၤဂၤအဂီၢ်. ယ့ၣ်ၡူးကပၢတၢ်လၢ တၢ်အဲၣ်တၢ်ကွံအပူၤ ဒီးအဝဲကမ့ၢ်စီၤပၤတဂၤလၢ အသးဂ့ၤ, ကသးကညီၤတၢ် ဒီးအကစံၣ်ညီၣ်တၢ် တီတီလိၤလိၤလီၤ.—ယၡါယၤ ၁၁:၄.

လၢဟီၣ်ခိၣ်သီအပူၤန့ၣ်​ ပှၤဟီၣ်ခိၣ်ဖိခဲလၢာ် ကအိၣ်ဃူအိၣ်ဖိး ဒီးထံကီၢ်ဒီးကလုာ်ဒူၣ်​ တလီၤမုၢ်လီၤဖးလၢၤဘၣ်. (လီၣ်ဖျါ ၇:၉, ၁၀) ပှၤဟီၣ်ခိၣ်ဖိခဲလၢာ် ကအဲၣ်ကစၢ်ယွၤ ဒီးကအဲၣ်ပှၤလၢအဃၢၤလီၤ. ဒီးအဝဲသ့ၣ်​ ကမၤသကိးတၢ် ဃူဃူဖိးဖိး ဒ်သိးကမၤလၢပှဲၤထီၣ်​ ကစၢ်ယွၤ အတၢ်တိာ်ပာ် လၢအခီၣ်ထံး လၢကအံးထွဲကွၢ်ထွဲ ဟီၣ်ခိၣ်အဂီၢ်လီၤ.—စံးထီၣ်ပတြၢၤ ၁၁၅:၁၆.

ဖဲကစၢ်ယွၤ အဘီအမုၢ် ပၢဟီၣ်ခိၣ်အခါ ကစၢ်ယွၤ ကမၤကတၢၢ်ကွံာ် န့ဆၢၣ်​ တၢ်ဘၣ်ဒိဘၣ်ထံး ခဲလၢာ်လီၤ. (စံးထီၣ်ပတြၢၤ ၂၄:၁, ၂) ဖဲယ့ၣ်ၡူးအိၣ်လၢ ဟီၣ်ခိၣ်အခါ အဝဲမၤပတုာ်ဝဲ ကလံၤမုၢ်ဖးဒိၣ်လၢ အလီၤပျံၤလီၤဖုးခီဖျိ တၢ်စိတၢ်ကမီၤလၢ ကစၢ်ယွၤဟ့ၣ်အီၤလီၤ. (မၢ်ကူး ၄:၃၉, ၄၁) အဃိ ဖဲယ့ၣ်ၡူးပၢတၢ်အခါ ပှၤတလိၣ်ပျံၤ န့ဆၢၣ်​ တၢ်ဘၣ်ဒိဘၣ်ထံး နီတဂၤလၢၤဘၣ်. လၢကစၢ်ယွၤအဘီမုၢ် တၢ်ပၢဖီလာ်န့ၣ်​ ပှၤဟီၣ်ခိၣ်ဖိ ဒီးဆၣ်ဖိကီၢ်ဖိ ကအိၣ်ဘၣ်​ ဃူဃူဖိးဖိး ဒီးပှၤတမၤဟးဂီၤ ခိၣ်ဃၢၤန့ဆၢၣ်လၢၤဘၣ်.—ဟိၤၡ့ ၂:၁၈.

ပှၤကိးဂၤဒဲး ကအိၣ်ဒီး တၢ်အိၣ်ဆူၣ်အိၣ်ချ့လၢအဂ့ၤလီၤ. ပှၤတဆိးက့, ပှၤတသးပှၢ်ထီၣ်​ ဒီးပှၤတသံနီတဂၤလၢၤဘၣ်. (ယၡါယၤ ၃၅:၅, ၆) ပှၤဟီၣ်ခိၣ်ဖိ ကအိၣ်ဘၣ်လၢ န့ဆၢၣ်လၢ အဃံလၤဒီးကၡဲကဆှီအပူၤ ဒ်သိးဒီး ပှၤနီၢ်ဒီမါဝၤ အဆိကတၢၢ်ခံဂၤ အိၣ်ဘၣ်လၢ ဧ့ၤဒ့ၣ်တၤသၣ်အလီၢ်ပူၤလီၤ. လၢဟီၣ်ခိၣ်သီအပူၤန့ၣ်​ တၢ်အီၣ်တၢ်အီ ကအိၣ်ဝဲ အါအါဂီၢ်ဂီၢ် ဒ်ဧ့ၤဒ့ၣ်တၤသၣ်အလီၢ်အသိး ဒီးပှၤဟီၣ်ခိၣ်ဖိခဲလၢာ် ကအိၣ်ဒီးတၢ်အီၣ်တၢ်အီ လၢလၢပှဲၤပှဲၤ. (၁ မိၤၡ့ ၂:၉) ဒ်ကစၢ်ယွၤ အပှၤဂီၢ်မုၢ် အံၣ်စရ့လးလၢပျၢၤအသိး ပှၤကိးဂၤဒဲး လၢအအိၣ်လၢ ပၤရဒံစူးအပူၤန့ၣ်​ “ကအီၣ်ကုးအီပှဲၤလီၤ.”—၃ မိၤၡ့ ၂၆:၄, ၅.

ဖဲကစၢ်ယွၤအဘီမုၢ် ပၢတၢ်လၢ ဟီၣ်ခိၣ်ဒီဘ့ၣ်အခါ ပှၤဟီၣ်ခိၣ်ဖိ ကအိၣ်ဘၣ်​ မုာ်မုာ်ခုၣ်ခုၣ်, ပှၤတဂၤဒီးတဂၤ ကရ့လိာ်သးလၢ တၢ်အဲၣ်တၢ်ကွံအပူၤ ဒီးကရ့လိာ်သး တီတီလိၤလိၤလီၤ. တၢ်ဒုးတၢ်ယၤ တအိၣ်လၢၤဘၣ်, ပှၤသူကမၣ်​ တၢ်စိတၢ်ကမီၤတအိၣ်လၢၤဘၣ်​ ဒီးပှၤကိးဂၤဒဲး ကဒိးန့ၢ်ဘၣ်​ တၢ်လၢအလိၣ်ဘၣ်ခဲလၢာ်. တကးဒံးဘၣ်​ လံာ်စီဆှံ အၢၣ်လီၤဝဲလၢ “ပှၤကဆ့ၣ်နီၤလၢ အစပံးမုၢ်အဖီလာ်, ဒီးအသ့ၣ်ချၢၣ်ဒၢအဖီလာ်စုာ်စုာ်, ဒီးတၢ်တမၤပျံၤဘၣ်အီၤနီတဂၤဘၣ်.”—မံကၤ ၄:၃, ၄.

ဟံၣ်ဖိဃီဖိ ကိးဒူၣ်ဒဲး ကအိၣ်ဘၣ်ဒီးအဟံၣ်​ ဒီးအဝဲသ့ၣ်​ တလိၣ်ဘၣ်ယိၣ်လၢ ပှၤကဟံးန့ၢ် အဟံၣ်ဃီ တၢ်လီၢ်တၢ်ကျဲဘၣ်. ဒီးတၢ်မၤခဲလၢာ်လၢ ပမၤအီၤန့ၣ်​ ကကဲဘျုးဝဲလီၤ. လံာ်စီဆှံ တဲဆိပာ်ဝဲလၢ ပှၤလၢအအိၣ်လၢ ဟီၣ်ခိၣ်သီအပူၤန့ၣ်​ “တမၤဘၣ်တၢ်ကလီကလီဘၣ်.”—ယၡါယၤ ၆၅:၂၁-၂၃.

လံာ်စီဆှံ အၢၣ်လီၤဝဲလၢ “ဟီၣ်ခိၣ်ကပှဲၤဝဲဒီး တၢ်သ့ၣ်ညါယွၤ” လီၤ. (ယၡါယၤ ၁၁:၉) ပှၤလၢအအိၣ်ဘၣ်လၢ ကစၢ်ယွၤ အဘီအမုၢ်တၢ်ပၢဖီလာ်န့ၣ်​ ကမၤလိဘၣ်​ ဘၣ်ဃးဒီး အတၢ်ဘၣ်တ့ကစၢ် ယဟိဝၤယွၤ အတၢ်ကူၣ်သ့လၢ အကတၢၢ်တအိၣ်ဘၣ်အဂ့ၢ် ဒီးကမၤလိဘၣ်​ ဘၣ်ဃးဒီး တၢ်ဘၣ်တ့ အဃံအလၤတဖၣ်လၢ ကစၢ်ယွၤတ့လီၤဝဲအဂ့ၢ်လီၤ. အဝဲသ့ၣ်​ တသူအတၢ်သ့တၢ်ဘၣ်လၢ ကတ့ထီၣ်​ တၢ်စုကဝဲၤတဖၣ်​ ဒ်သိး ကမၤဟးဂီၤပှၤဂၤအဂီၢ်ဘၣ်. (ယၡါယၤ ၂:၄) လၢတၢ်န့ၣ်အလီၢ် အဝဲသ့ၣ်​ ကမၤလိဘၣ်လၢ ကဘၣ်အိၣ်ဃူအိၣ်ဖိးဒီး ပှၤဂၤဒ်လဲၣ်​ ဒီးကကွၢ်ထွဲ ကတဲာ်ကတီၤဟီၣ်ခိၣ်ဒ်လဲၣ်.—စံးထီၣ်ပတြၢၤ ၃၇:၁၁.

ဒ်သိး ပကအိၣ်မူဘၣ်​ မုာ်မုာ်ခုၣ်ခုၣ်​ တနံၤဘၣ်တနံၤအဂီၢ် ကစၢ်ယွၤ ကွၢ်ထွဲကတဲာ်ကတီၤဝဲ ဟီၣ်ခိၣ်ဂ့ၤဂ့ၤလီၤ. ကစၢ်ယွၤ တိာ်ပာ်ဝဲလၢ ပှၤဟီၣ်ခိၣ်ဖိ ကအိၣ်မူဘၣ်လၢဟီၣ်ခိၣ်​ လီၤထူလီၤယိာ်. (စံးထီၣ်ပတြၢၤ ၃၇:၂၉; ယၡါယၤ ၄၅:၁၈) ဒီးဒ်သိး ကစၢ်ယွၤ ကမၤလၢထီၣ်ပှဲၤထီၣ်​ အတၢ်တိာ်ပာ်လၢ အခီၣ်ထံးတခါန့ၣ်အဂီၢ် ကစၢ်ယွၤ “ကမၤဟးဂီၤကွံာ် တၢ်သံလီၤထူလီၤယိာ်လီၤ.” (ယၡါယၤ ၂၅:၈, ခ့ခါစှီၤကျိာ်) လံာ်စီဆှံ အၢၣ်လီၤဝဲလၢ “တၢ်သံတအိၣ်လၢၤဘၣ်. ဒီးတၢ်သူၣ်အုးသးအုးမ့ၢ်ဂ့ၤ, တၢ်ဟီၣ်တၢ်ယၢၤမ့ၢ်ဂ့ၤ, တၢ်လၢအဆါမ့ၢ်ဂ့ၤ, တအိၣ်လၢၤဘၣ်.” (လီၣ်ဖျါ ၂၁:၄) ပှၤတဖၣ်လၢ ကစၢ်ယွၤမၤပူၤဖျဲးဝဲ ဖဲကစၢ်ယွၤ မၤဟးဂီၤ ပှၤအၢပှၤသီအခါ ဒီးပှၤသံတ့ၢ်တဖၣ်လၢ ကဂဲၤဆၢထၢၣ်သမူထီၣ်က့ၤလၢ ဟီၣ်ခိၣ်သီအပူၤန့ၣ်​ ကစၢ်ယွၤ ကဟ့ၣ်အဝဲသ့ၣ်​ တၢ်ခွဲးတၢ်ယာ်လၢ ကအိၣ်မူဘၣ်​ လီၤထူလီၤယိာ်.—ယိၤဟၣ်​ ၅:၂၈, ၂၉; မၤတၢ် ၂၄:၁၅.

 ခဲအံၤဒၣ်လဲာ် ပှၤလၢအကကွဲၢ်တဖၣ်​ အိၣ်ကတဲာ်ကတီၤပာ်စၢၤအသးလၢ အကအိၣ်ဘၣ်လၢ ကစၢ်ယွၤအဘီမုၢ်တၢ်ပၢလၢ အကဟဲဘူးထီၣ်န့ၣ်​ အဂီၢ်လံ. အဝဲသ့ၣ်မ့ၢ် ပှၤတလၢတပှဲၤဘၣ်​ သနာ်က့ အဝဲသ့ၣ်​ ဂုာ်ကျဲးစၢးကဲထီၣ်ပှၤလၢ ကစၢ်ယွၤအဲၣ်ဒိးလၢ ကအိၣ်လၢ ဟီၣ်ခိၣ်သီအပူၤအဂီၢ်လံ. အဝဲသ့ၣ်​ မၤဝဲဒ်လဲၣ်. အဝဲသ့ၣ်မၤဝဲခီဖျိ မၤလိဝဲ ယဟိဝၤယွၤအဂ့ၢ် ဒီးယ့ၣ်ၡူးခရံာ်လၢ ယဟိဝၤယွၤမၢလီၤဝဲတဂၤန့ၣ်​ အဂ့ၢ်လီၤ.—ယိၤဟၣ်​ ၁၇:၃.

ဒ်သိး နကပူၤဖျဲးလၢ တၢ်အကတၢၢ် ဒီးအိၣ်မူဘၣ်လၢ ဟီၣ်ခိၣ်သီအပူၤအဂီၢ် နကဘၣ်မၤဒ်လဲၣ်န့ၣ်​ ဃုသ့ၣ်ညါအါထီၣ်တက့ၢ်. မၤလိလံာ်စီဆှံဒီး ယဟိဝၤပှၤအုၣ်အသး တဂၤဂၤ ဒီးသူလံာ်လၢအမ့ၢ် အိၣ်မူလီၤထူလီၤယိာ် ပှဲၤဒီးတၢ်သးခု.