Apa epangero lyaKarunga lyemeguru ngali tameka kupangera pevhu mudima, evhu ngali kara evega lyoruhafo omu vantu ngava tunga mouumwe nokurugana yirugana yoyiwa. Karunga kwa horowora Jesus Kristusa nga pangere evhu nalinye. Mokulisiga novapangeli vanaina, Jesus nga pakera nawa mbili vantu. Age nga pangera monkedi zeharo, nga kara Hompa gonkenda ntani gouhunga.—Jesaya 11:4.

Vantu ava ngava paruka mouzuni woupe kapi ngava kara nelitondororo. Navenye ngava kara mouumwe. (Ehororo 7:9, 10) Vantu navenye ava ngava parukira pevhu, ngava hara Karunga novakwawo ntani ngava ruganena kumwe mombili mokusikisa mo sitambo saKarunga sokupakera mbili embo lyawo, evhu.—Mapisarome 115:16.

Apa Uhompa waKarunga ngau pangera uzuni mudima, Musiti nga takamesa nawa nomukarompepo nadinye di kare dokusikilira mo. (Mapisarome 24:1, 2) Apa Jesus ga kere pevhu age ga likidire nonkondo edi ga mu pere Karunga pokumwenekeda mpepo. (Marukusa 4:39, 41) Mepangero lyaKristusa, kwato ogu nga ka kara nowoma woyimpagwa. Uhompa waKarunga ngau ka tengwidira po uumwe pokatji kounsitwe novantu.—Hoseya 2:18.

Nkenye gumwe nga ka hafera ukanguki wokusikilira mo. Kwato ogu nga ka vera ndi a ka kurupe ndi a ka fe. (Jesaya 35:5, 6) Vantu ngava ka hafera nkarapamwe zongwa ntani zokuzera ngwendi zeezi va haferere valikwali wokuhova mosikunino saEdeni. Ngwendi mosikunino saEdeni, mouzuni woupe, evhu ngali gava nondya dononzi kovantu uzuni mudima. (Genesis 2:9) Ngwendi Vaisraeli, nkenye gumwe moParadisa nga kara “nonondya dononzi dokulya.”—Levitikus 26:4, 5.

Mepangero lyaKarunga vantu mouzuni mudima ngava hafera mbili nokulitekura nawa ntani ngava kara vantu wokuhungika. Kapi nga pa kara yita ndi kutekura vantu nonyanya ntani nkenye gumwe ngayi mu gwanena po yihepwa yendi. Bibeli kwa tumbwidira asi: “Nkenye ogu nga kara mompora moyikunino yamwene yoyindjembere nomaukuzu, kutupu ogu nga mu tjilisa.”—Mika 4:3, 4.

Nkenye epata ngali kara nembo lyavene, va hana utjirwe asi tava va tjida mo ntani nkenye sirugana esi ngava rugana ngasi ragopa. Ngomu za yi tumbura Bibeli asi ava ngava ka paruka mouzuni woupe waKarunga ‘yirugana eyi ngava rugana ngayi ragopa.’—Jesaya 65:21-23.

Bibeli kwa tumbwidira asi: “Sirongo ngasi zura ediwo lyaHOMPA.” (Jesaya 11:9) Vantu ava ngava ka paruka mouzuni woupe, ngava ka lironga unongo wokutundilira koMusiti gwawo, Jehova, ntani ngava ka lironga yininke yoyiwa eyi ga sita. Awo kapi ngava ruganesa unongo wawo mokupangera yirwiso ndi va rugane vakwawo momudona. (Jesaya 2:4) Nye awo ngava ka lironga kuparuka kumwe mombili ntani nomu nava pakera mbili evhu.—Mapisarome 37:11.

Karunga kwa sitira evhu eli yipo tu lihafere. Age kuna hara vantu va parukire po narunye nanarunye. (Mapisarome 37:29; Jesaya 45:18) Mokusikisa mo sitambo sendi somuhowo, Karunga “nga hanagura po nomfa dogoro narunye.” (Jesaya 25:8) Bibeli kwa tumbwidira asi: “Nomfa kapi ngadi kara ko hena, ntani kuguva nomalirankali nokukora, kapi ngayi kara ko hena.” (Ehororo 21:4) Karunga nga pa vantu navenye mwenyo gwanarunye, omu mwa hamena ava nga parura apa nga zonagura po uzuni ou woudona ntani nava nga ka vhumbura koufe.—Johanesa 5:28, 29; Yirugana 24:15.

 Sinzi sovantu mouzuni mudima kuna kuliwapaikira mokukakara mouzuni woupe ou una kara pepi. Nampili ngomu va dira kusikilira mo, awo kuna kukondja kuparuka ngovantu ava Karunga ana harere mouzuni wendi woupe. Ngwendi ngapi? Pokulironga kuhamena Jehova Karunga ntani nogu ga tuma, Jesus Kristusa.—Johanesa 17:3.

Gwana ko mauzera gamwe hena omu no vhura kuparuka ehagero lyouzuni ou ntani nokukaparuka mouzuni woupe ou una kara pepi. Lironga Bibeli nagumwe goNombangi daJehova pokuruganesa buke Hafera eparu narunye!