Ke kolo ko, o luyalu lwa zulu, i sia vo, Kintinu kia Nzambi, luyala e nza yawonso. Vava ediadi divangama, o ntoto ukala se fulu kiambote kina o wantu bezingila kuna ungudi ye kiese. Lumbu yawonso, wantu bekala ye salu kiambote ye mambu mampa muna longoka. Nzambi wasola Yesu Kristu mu yala e nza yayi. Nswaswani ye ayadi ayingi o unu, Yesu mambu mambote kaka kevanga kwa wantu awonso. Yesu oyadila kuna zola, ngemba, nkenda ye unsongi.—Yesaya 11:4.

Muna nz’ampa ina Nzambi katusila o nsilu, ke mukala mingilu mia nsi ko yovo mpambani za makanda. Wantu mu nza yawonso bekala se nkangu umosi. (Lusengomono 7:9, 10) Wantu awonso ova nza bezola Nzambi yo muntu yo nkwandi. Awonso besala kumosi kuna luvuvamu kimana e kani dia Nzambi dialungana, i sia vo, kitula o ntoto se paradiso.—Nkunga 115:16.

Vava Kintinu kia Nzambi kiyala ova ntoto, Mvangi eto ke yambula ko vo vabwa e sumbula yifwasa o ntoto. (Nkunga 24:1, 2) Lumbu kimosi, Yesu waningamesa e tembwa kiangolo muna songa vo wafwana kena mu sadila o nkuma una Nzambi kamvana. (Maku 4:39, 41) Muna luyalu lwa Kristu, ke vekala muntu ko okala ye kuma kiamona wonga wa sumbula. Vava Kintinu kia Nzambi kiyala ova nza, wantu bezingila kuna luvuvamu ye bulu, ke muntu ko ofwasa diaka e kalu kieto.—Osea 2:18.

Wantu awonso, vimpi walunga bekala wau. Ke muntu ko oyela, nuna ngatu fwa. (Yesaya 35:5, 6) Wantu awonso bezingila va fulu nze kina mase meto mantete bazingila muna mpatu a Edene, i sia vo, fulu kiambote-mbote ye kiavelela. Nze una wakala muna mpatu a Edene, muna nz’ampa, o ntoto oyima ulolo wa madia. Wantu awonso bekala ye madia mafwana. (Tuku 2:9) Nze una wavangama kwa Aneyisaele, muna Paradiso wantu awonso ‘bedia madia [mau] yo yukuta.’—Levitiku 26:4, 5.

Vava Kintinu kia Nzambi kiyala e nza yawonso, wantu mu luvuvamu bekala yo kadila ye akwau kuna ngemba ye unsongi. Ke vekala diaka vita ko, ke muntu ko osadila e wisa mu mpila yambi yovo funtuka muna vua lekwa kia dia. Bibila kikutusianga o nsilu vo: “Bevuanda, konso muntu kuna nsi a nsing’andi a vinyu ye kuna nsi a nsand’andi. Ke vekala muntu ko okubamwesa wonga.”—Mika 4:3, 4.

Konso esi nzo, bekala ye nzo a yau kibeni, lembi mona wonga wayingwa mo. Konso salu tusala, nluta kikututwasila. E Bibila kivovanga vo, awana bezingila muna nz’ampa ina Nzambi kasia o nsilu “ke befuntuka nkatu ko.”—Yesaya 65:21-23.

E Bibila kivovanga vo: “E nza izala kieleka yo zayi wa Yave.” (Yesaya 11:9) Muna nz’ampa, o wantu belongoka e lekwa yambote-mbote kasema o Yave yo bakula vo e ngangu zandi ke zina nsuka ko. Ke muntu ko osadila o zayi wandi muna soka e nkele yovo mwesa akaka e mpasi. (Yesaya 2:4) Kansi, o wantu bezingila kuna luvuvamu muntu yo nkwandi yo lunga-lunga o ntoto.—Nkunga 37:11.

Nzambi wakubika o ntoto kuna zola kwawonso kimana o wantu bamona e kiese kiazingila vo e lumbu yawonso. Ozolele vo wantu bazingila ova ntoto yakwele mvu. (Nkunga 37:29; Yesaya 45:18) Muna lungisa e kani diadi, Nzambi “ofokola lufwa yakwele mvu.” (Yesaya 25:8) E Bibila kisianga o nsilu vo: “O lufwa ke lukala diaka ko, ngatu kala diaka dilu, yovo kazu ngatu mpasi.” (Lusengomono 21:4) Awana bevuluka muna lufwasu lwa nza yayi yambi ye awana befuluka muna nz’ampa, Nzambi okubavana e lau dia zinga yakwele mvu.—Yoane 5:28, 29; Mavangu 24:15.

 Mafunda ye mafunda ma wantu omu nza yawonso, mu kubama bena owau kimana bayalwa muna Kintinu kia Nzambi, eki kifinamene kikilu. Kana una vo wantu alembi lunga, wantu awaya bevanganga e ngolo za kala e mpil’a wantu ana Nzambi kazolele vo bazingila muna nz’ampa. Aweyi bevangilanga wo? Muna longokanga oma ma Yave wa Nzambi ye ndiona katuma, i sia vo, Yesu Kristu.—Yoane 17:3.

Zaya diaka mambu mankaka ofwete vanga muna vuluka muna lufwasu lwa nza yayi yo zingila muna nz’ampa ina Nzambi kasia o nsilu eyi ifinamene. Tambulwila e longi dia Bibila kwa mosi muna Mbangi za Yave, lembi futa nzimbu muna sadila o nkanda, Zinga ye Kiese Yakwele Mvu!