Mubuso wa Mulimu wa kwa lihalimu hauka kala kubusa lifasi honacwale-cwale fa, lifasi ikaba sibaka sesinde ili fobakapila batu ka swalisano ni kueza misebezi yeminde ni yetahisa tabo. Jehova uketile Jesu kuli abuse lifasi. Ka kushutana ni babusi babañata kacenu, Jesu yena ukaeza lika zekatusa babusiwa bahae. Ukabusa ka lilato, ka sishemo, ka makeke, mi ukaba mulena yaatula ka kuluka.—Isaya 11:4.

Mwa lifasi lelinca, batu habana kukauhanywa ki miseto ya linaha kamba lisimuluho zabona. Batu kaufela bakaswalisana. (Sinulo 7:9, 10) Batu kaufela babakapila fa lifasi bakalata Mulimu ni batu babañwi, mi bakalatelela litaelo za Mulimu ka kozo kuli bataleleze mulelo wa Mulimu wa kuli batu bababalele lihae labona, lona lifasi.—Samu 115:16.

Mubuso wa Mulimu hauka kala kubusa, Mubupi waluna ukabona teñi kuli hakuna likozi zetiswa ki mañungwa kamba miunda. (Samu 24:1, 2) Hanaali fa lifasi, Jesu naabonisize maata anaafilwe ki Mulimu ka kukuzisa liñungwa. (Mareka 4:39, 41) Kreste hakabusa, hakusana kubanga ni likozi za ka sipundumukela zesabisa batu. Mubuso wa Mulimu ukatahisa kuli batu baipilele hande basina sabo sina feela mone kuinezi kwa makalelo.—Hosea 2:18.

Batu kaufela bakaba ni buikangulo bobupetehile. Hakuna mutu yakakula, kusupala, kamba kushwa. (Isaya 35:5, 6) Batu bakapila bupilo bobunde mwa lifasi lelikenile ili bupilo bobuswana ni bone bapilile batu bapili mwa simu ya Edeni. Ka kuswana ni mwa simu yeo, lifasi likatahisa lico zeñata mi batu kaufela fa lifasi bakaba ni lico zeñata. (Genese 2:9) Ka kuswana ni Maisilaele ba kwaikale bane baetelelwa ki Mulimu, batu kaufela mwa Paradaisi ‘bakaca kulamba.’—Livitike 26:4, 5.

Mubuso wa Mulimu hauka busa lifasi, batu kaufela bakapila ka kozo mi bakapilisana hande ni babañwi. Hakusana kuba ni lindwa, hakuna babaka itusisa maswe maata, mi batu habana kupalelwa kufumana zebatokwa. Bibele isepisa kuli: “Bakaina, yomuñwi ni yomuñwi mwatasaa kota yahae ya veine ni mwatasaa kota yahae ya feiga, mi hakuna yaka basabisa.”—Mika 4:3, 4.

Lubasi ni lubasi lukaba ni ndu, habana kusaba kuli bakato baamuha yona, mi misebezi yebakaeza kaufela ika batahiseza tabo. Sina moibulelela Bibele, batu babaka pila mwa lifasi lelinca la Mulimu “habana kuikataza feela basafumani sesiñwi.”—Isaya 65:21-23.

Bibele isepisa kuli: “Lifasi likatala zibo ya Jehova.” (Isaya 11:9) Batu babaka pila mwa lifasi lelinca bakaituta butali bwa Mubupi wabona, yena Jehova, ni kuituta zeñata kwa lika zabupile. Habana kuitusisa zibo yabona kwa kupanga lilwaniso kamba kuholofaza batu babañwi. (Isaya 2:4) Kono bakaituta mwakupilela ni babañwi ka kozo ni mwa kubabalelela lifasi.—Samu 37:11.

Mulimu naasebelize ka taata kulukisa lifasi kuli batu baikole kupila fateñi zazi ni zazi. Ubata kuli batu bapile fa lifasi kuya kuile. (Samu 37:29; Isaya 45:18) Kuli ataleleze mulelo wahae, Mulimu “ukamiza lifu kuya kuile.” (Isaya 25:8) Bibele hape isepisa kuli: “Lifu halisana kubateñi, nihaiba kutahelwa ki maswabi kamba kulila.” (Sinulo 21:4) Mulimu ukafa batu kaufela kolo ya kupila kuya kuile, ili babakopanyeleza batu babaka punyuha ka nako yakayundisa babaswe, ni batu babañata-ñata babakazusiwa kwa bafu mwa lifasi lelinca lelitaha.—Joani 5:28, 29; Likezo 24:15.

 Nihaiba ka nako yacwale, batu babañata-ñata basweli baitukiseza kutopila mwa lifas lelinca leli fakaufi. Nihaike kuli habasika petahala, balika kupila sina batu babata Mulimu kuli bato pila mwa lifasi lahae lelinca. Baeza cwañi cwalo? Ka kuituta ka za Jehova Mulimu ni yanaalumile, yena Jesu Kreste.—Joani 17:3.

Muitute zeñata ka za momukona kuto punyuhela ka nako yelika feliswa lifasi le ilikuli muto pila mwa lifasi lelinde lelituha litaha. Muitute Bibele ni yomuñwi wa Lipaki za Jehova kusina kulifa sesiñwi, ka kuitusisa buka ya Muikole Bupilo Kuya Kuile!