Omu fulumende yaKalunga yamwilu nayiyula vatu vosena kalinwomu ngana, hano hamavu nahakapwa hamwaza, kaha vatu navakatwamanga mukulinunga nakukazata milimo yamwaza yize nayikavasuulwisa. Kalunga atongola Yesu Kulishitu akayule mavu. Yesu mwakalihandununa navaka-kuyula valiko mwomwo mwakalingilanga vatu vyuma vyamwaza. Chiyulo chenyi nachikazama hazangi, kaha mwakapwa Mwangana walikoji, wakeke. Keshi kukatala vatu kumesoko.—Isaya 11:4.

Vatu vaze navakapwa mukaye kakahya kaveshi kukalimonanga ulumbiko, oloze navakatwamanga mukulinunga. (Kusoloka 7:9, 10) Vatu vosena hamavu navakazanga Kalunga navakwavo vatu, nakuzachila hamwe mangana vawahise mavu ngana muze ajinyine Kalunga.—Samu 115:16.

Omu Wangana waKalunga naukayula hano hamavu, Tengi mwakafumisako ukalu wakulijila. (Samu 24:1, 2) Omu Yesu apwile hano hamavu alingileko vyuma vimwe vyakusolola ngolo amuhanyine Kalunga omu aunjishile peho yanyamanganda. (Mako 4:39, 41) Muchiyulo chaKulishitu kakweshi kakapwa mutu mwakatwama muchiwomawoma mwomwo yaukalu wakulijilako. Wangana waKalunga nawa naukalingisa vatu natunyama vakatwame mukuunda ngana muze ajinyine Kalunga hakavanga.—Hozeya 2:18.

Vatu vosena navakapwa vakulikangula. Kakweshi kukapwa mutu mwakaviza chipwe kushinakajiwa chipwe kufwako. (Isaya 35:5, 6) Vatu navakalivwisa kuwaha kutwama muchihela chamwaza, ngana chize valivwishile kuwaha valunga napwevo vatete, mumilemba yaEtene. Ngana muze chapwile mumilemba yaEtene, namukaye kakahya mavu nawakalovola kulya chachivulu kaha vatu vosena navakapwa navyakulya vyakulisala. (Kuputuka 2:9) Vatu vosena vaze navakapwanga muPalachise ‘navakalyanga vyakulya nakwikuta’ ngana muze chapwile kuli vaIsalele vakushikulu.—VyavaLevi 26:4, 5.

Omu fulumende yaKalunga nayikayula hamavu hosena, vatu vosena navakatwamanga mukuunda nakusolwela vakwavo likoji, kaha nawa kaveshi kukalitalanga kumesoko. Kakweshi kukapwa jijita chipwe vaka-kuyula vavapiko. Kaha nawa vatu navakapwa navyuma vyosena navakasaka. Mbimbiliya yashika ngwayo: “Navakatwamanga mutu himutu mwishi yamuvinyo wenyi, mwishi yamukuyu wenyi, kaha naumwe wauchi mwakavevwisa woma.”—Mika 4:3, 4.

Tanga hitanga nayikapwanga nalimbo chakuzeneka kulizakamina ngwavo navavafumisaho, kaha nawa navakazatanga milimo yize nayikavakafwanga. Ngana muze yahanjika Mbimbiliya vaze navakapwa mukaye kakahya kaKalunga “kaveshi kukafulyangila chawanako” chipwe ngwetu chakulishinako.—Isaya 65:21-23.

Mbimbiliya yashika ngwayo: “Hamavu hosena nahakazala nachinyingi chakumutachikiza Yehova.” (Isaya 11:9) Vatu vaze navakapwa mukaye kakahya, navakalinangula mangana akujiminyina kuli Tengi yavo Yehova, nakukalinangula nawa vyuma vyamwaza vize atenga. Kaveshi kukazachisa chinyingi chavo hakutunga vitwa chipwe kulinga vyuma vize navineha ponde kuli vakwavoko. (Isaya 2:4) Oloze navakalinangula mwakutwamina mukuunda navakwavo namwakuzakamina ano mavu.—Samu 37:11.

Kalunga atengele kanawa ano mavu mangana tulivwisenga kuwaha kuyoyelaho hakumbi hakumbi. Ajina ngwenyi vatu vatwamenga hano hamavu haya myaka yosena. (Samu 37:29; Isaya 45:18) Hakusaka Kalunga akatesemo chuma kana “mwakamina kufwa haya myaka yosena.” (Isaya 25:8) Mbimbiliya yashika ngwayo: “Kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.” (Kusoloka 21:4) Kalunga mwakahana kutokwa chakuyoya haya myaka yosena kuli vatu vosena vaze navakayovoka omu mwakanongesa kano kaye kakuhuka navatu vavavulu vaze mwakasangula mukaye kakahya.—Yowano 5:28, 29; Vilinga 24:15.

 Namakumbi ano vatu vavavulu vali nakulizanga mangana vakapwe muchiyulo chaWangana waKalunga chize chili nakwiza mukalinwomu. Numba tuhu kavakupukako, oloze vali nakuzata nangolo mangana vatengamo kupwa vatu vaze asaka Kalunga ngwenyi vakapwe mukaye kakahya. Mujila muka? Vali nakulinga ngocho hakulinangula hali Yehova Kalunga naYesu Kulishitu uze atumine.—Yowano 17:3.

Linangulenu vyavivulu vize navimikafwa mukayovoke omu nakakakuma kano kaye nakukayoyela mukaye kamwaza kaze kali nakwiza kalinwomu. Yitavilenu kulinangula Mbimbiliya naVinjiho jaYehova hawana wakanyombo chipwe kuvatonda kuzachisa keyala ya jw.org/lue.