Omwo Bumwene bwa Njambi bukayula kaye, banu bakapwa ba kubwahelela, co bakalikwatasana na kulinga bipangi byabibwa. Njambi nangula Yesu Kilistu kupwa Mwene uje akayula kaye koshe. Yesu naliseze na baka-kuyula ba hano hasi mwafwa akalingila banu byuma byabibwa simbu yoshe. Akalinga byuma byoshe mu cizemo, co akapwa Mwene wa ngozi na mema ku mbunge.—Isaya 11:4.

Mu kaye kakaha, banu kubakalyangununa mwafwa ya kutunda ku bisemwa na mafuti a kuliseza-seza. Oloni banu boshe bakalikwatasana (Kujombolola 7:9, 10) Banu boshe ha kaye bakazema Njambi na kulizema umo na mukwabo. Co lalo, bakapangela hamo mu kwoloka na kunyunga kaye ngwe mwayongwele Njambi.—Myaso 115:16.

Bumwene bwa Njambi mubukashangumuka kuyula, Ishamatanga akamanesa bukalu bwa kulizila. (Myaso 24:1, 2) Yesu mwakele hano hasi wamwesele nzili yamwanene Njambi omwo wolwesele lihunzi lyakama. (Mako 4:39, 41) Omwo Kilistu akayula hano hasi, wahi akalishoshomwena ha bukalu bwa kulizila. Co lalo, Bumwene bwa Njambi bukakwatasanesa tusitu na banu. Co banu kubakabiisa byuma bya kutanga.—Hoziya 2:18.

Banu boshe bakapwa ba kulikangula. Naumo wahi akabinja, kukulubala nambe kutsa. (Isaya 35:5, 6) Banu bakalikuwa kuyoya mu kaye kakabwa ka kujela ngwe mubalikuwile banu ba kulibanga mu lihya lya Edeni. Mu kaye kakaha, libu likaima byakulya byabingi ngwe mukwafwile mu lihya lya Edeni, co kukakala byakulya byabingi. (Kushangumuka 2:9) Ngwe mukwafwile kuli Baisalele, banu boshe mu Paradaisi bakalya “simbu yoshe na kukuta.”—Valevi 26:4, 5.

Bumwene bwa Njambi mubukayula kaye koshe, banu bakayoya mu kwoloka co naumo wahi akayandesa bakwabo. Kukukakala binzita, co naumo wahi akapangesa mwamubi moko. Co lalo, banu boshe bakakala na byuma bibatonda. Mbimbiliya yakulahesa ngwayo: “Bakakala mu kwoloka hakati ka mikolobozi ya bushuka bwa binyu yabo na miti ya mikuyu yabo, co naumo wahi akabazibisa lyoba.”—Mika 4:3, 4.

Banu boshe bakakala na binjibo, co kubakalishoshomwena ngwabo babatundisamo. Co lalo bakawana nganyo mu bipangi byoshe bibakalinga. Mbimbiliya ngwayo bipangi bibakalinga banu boshe baje babakala mu kaye kakaha ka Njambi “kubikai mwangoco.”—Isaya 65:21-23.

Mbimbiliya yakulahesa ngwayo: “Lifuti likashula na mana akuzibuka Shukulu Kalunga.” (Isaya 11:9) Banu baje bakayoya mu kaye kakaha bakalilongesa kuli Ishamatanga yetu Yehova uje wakala na mana a kulitila na ku byuma byabibwa byanatanga. Kubakapangesa mana abo mu kupanga bitwa nambe kubulumuna bakwabo. (Isaya 2:4) Oloni bakalilongesa mwakuyoyela mu kwoloka na bakwabo na mwakunyungila kaye.—Myaso 37:11.

Njambi wabwahesele kaye mwamubwa mangana tulikuwe kuyoyaho ha litangwa na litangwa. Washaka ngwendi banu bayoye hano hasi myaka yoshe. (Myaso 37:29; Isaya 45:18) Njambi “akanyongesa nzili ya kutsa” mangana ashulisilile biyongola byendi. (Isaya 25:8) Mbimbiliya yakulahesa ngwayo: “Kukukakala kutsa nambe busiwa nambe kulila nambe kukemanga.” (Kujombolola 21:4) Njambi akana mwonyo wa myaka yoshe kuli banu baje bakoboka omwo akanyongesa kano kaye kakabi. Co lalo, akana mwonyo wa myaka yoshe kuli baje bakasanguka.—Yowano 5:28, 29; Vilinga 24:15.

 Banu babangi bali na kulibwahesela kukayoya mu kaye kakaha kaje kali muyehi. Nameme kubalumbunukile, bali na kweseka mwoshe mubasela kuyoya ngwe mubanapande kuyoyela banu baje bashaka Njambi ngwendi bakakale mu kaye kakaha. Bali na kulinga bati ngoco? Bali na kulilongesa bya Yehova Njambi na Yesu Kilistu uje yatumine.—Yowano 17:3.

Lilongeseni bimunapande kulinga mangana mukoboke omwo bakanyongesa kano kaye kakabi na kukayoya mu kaye kakabwa kaje kali muyehi. Lilongeseni Mbimbiliya kwa kujeneka kufweta na Mukaleho wa Yehova, kupangesa libulu lya Likuweni Kuyoya Myaka Yoshe!