য়াম্না থুনমক ঈশ্বরনা শেম্বা অনৌবা লৈঙাক অদুনা পৃথিবী পুম্বদা সাশন তৌরগনি। মতমদুদা পৃথিবী অসি মীওইবা খুদিংমক্না নুংশি চান্ননা লৈমীন্নবা মফম অমা ওইরগনি। অদুগা মী খুদিংমক্না অফবা অমসুং নুংঙাইনীংঙাই ওইবা থবক ঙাক্তা তৌগনি। ঈশ্বরনা যীশু খৃষ্টবু পৃথিবী পুম্বগী মথক্তা সাশন তৌনবা লৈঙাকপা ওইনা খনগৎলে। মহাক্তি ঙসি পাল্লিবা লৈঙাকপশিং অসিগুম্না ওইদে। মহাক্তি মীওইবশিংগী অপাম্বা খঙবীবা অমসুং মখোয়গী ফনবতা খনবীবা লৈঙাকপনি। মহাক্কী লৈঙাক্তি নুংশিবদা য়ুম্ফম ওইগনি। মহাক্তি থৌজাল হৈবা, মীনুংশি চাউবা অমসুং অচুম্বা তৌবা লৈঙাকপা ওইগনি।—যিশাইয়া ১১:৪

অনৌবা তাইবংপান্দুদদি মীওইবশিংগী মরক্তা লম অমসুং জাৎ কুচুনা মরম ওইরগা তোখাই তোখাই তানবা হায়বদু লৈররোই। মীওইবশিংগী মরক্তা অপুনবগী শক্তম লৈরগনি। (ফোংদোকপিবা ৭:৯, ১০) পৃথিবীদা হিংলিবা মীওইবা খুদিংমক্না ঈশ্বরবু নুংশিবা অমসুং মখোয় মশেন অমগা অমগা নুংশিনবা হায়বদু ওইরগনি। অদুগা মখোয় খুদিংমক্না ঈঙথনা অমসুং অমত্তা ওইনা থবক তৌগনি। অসুম্না ঈশ্বরনা অহানবদা থম্বীখিবা পৃথিবী অসিবু ফজরবা মফম অমা ওইহনবা অমসুং মসিবু ঙাক শেলহনবগী পান্দম অদু মখোয়না মপুং ফাহল্লগনি। —থাগৎ ঈশৈ ১১৫:১৬

ঈশ্বরগী লৈঙাক্না পৃথিবীসিদা সাশন তৌরকপা মতম অদুদদি শেম্বীবা মপু মশামক্না মহৌশাগী ওইনা থোকপা অমাঙ অতাগী থৌদোকশিং লৈহল্লরোই অমসুং ঈশিং, নুংশিৎ, অঈং অশা,নোংজু নুংশাগী খলসু কায়হন্দনা থম্বীরগনি। (থাগৎ ঈশৈ ২৪:১, ২) মসি ওইথোক্কনি হায়বসি যীশুনা পৃথিবীদা লৈরিঙৈ মতমদা উৎলম্মী। ঈশ্বরনা পীবীবা পাঙ্গলনা যীশুনা সমুদ্রগী ঈমায়দা হৌরকখিবা অকিবা ফংলবা নোংলৈ নুংশিৎ অমবু ইরায় লায়না ফহনখি। (মার্ক ৪:৩৯, ৪১) মরম অসিনা, যীশুনা নিংথৌ ওইনা পানবা মতম অদুদদি মহৌশাগী ওইবা খুদোংথিবা থৌদোকশিং থোক্কনি হায়বগী কিনিংঙাই ওইদ্রে। মতম অদুদদি ঈশ্বরনা থম্বীখিবা পান্দম মতুংইন্না, মীওইবশিংগা শা-ঙাশিংগা ফাওবা নুংশি চান্ননা লৈমিন্নরগনি।—হোসিয়া ২:১৮

মীওইবা খুদিংমক হকচাং ফনা লৈগনি। কনামত্তা নাবা, অহল ওইরকপা অমসুং শিবা হায়বদু লৈররোই। (যিশাইয়া ৩৫:৫, ৬) পৃথিবী অসি অহানবা মীওইবা মতৈ মনাও অদুনা লৈরম্বা এদেনগী ইংখোলগুম্না লুবা নানবা অমসুং ফজরবা মফম অমা ওইরগনি। মফমদুদা মীওইবা খুদিংমক্না নুংঙাইনা লৈবা ফংগনি। অদুগা হায়রিবা অনৌবা তাইবংপান অদুদদি পোত্থোক চাথোক মরাঙ কায়গনি অমসুং চান থক্নবগী অৱাৎপা লৈরোই। (মৈহৌরোন ২:৯) মমাঙঙৈগী মতমদা মীশিংদা চান থক্নবগী অৱাৎ অপা লৈহনখিদবগুম অনৌবা তাইবংপান্দুদসু ঈশ্বরনা অৱাৎপা অমত্তা লৈহল্লরোই।—লেবীশিং ২৬:৪, ৫

ঈশ্বরগী লৈঙাক অদুগী মখাদদি মীওইবশিংগী মরক্তা শান্তি লৈবা অমসুং মখোয় অমগা অমগা নুংশি চান্ননা লৈমীন্নবা হায়বদু ওইরগনি। মখোয় মশেন অমনা অমবু নমথনবা হোৎনবা নত্ত্রগা লান তৌনবা হায়বসু লৈররোই। ঈশ্বরনা মীওইবা খুদিংমক্কী দরকার ওইবশিংদু পীবিগনি। মরমদি বাইবলদা মহাক্না অসুম্না ৱাশক্লি: “মখোয় মী খুদিংনা মাগী মাগী অঙ্গুর পাম্বী মখাদা অমসুং মাগী মাগী হৈয়িৎ পাম্বী মখাদা ফমথগনি, কনা অমতনা মখোয়বু কিহল্লোই।”—মীকা ৪:৩, ৪

মী অমত্তনা লৈফম লৈরোই হায়বগী অৱাবা লৈররোই মরমদি মীপুম খুদিংমক্কী মশাগী য়ুম লৈগনি। অদুগা মখোয়না শু-নোমজবগী মহৈ মখোয়না চাগনি। মরমদি বাইবলগী মতুংইন্না ঈশ্বরনা পুবীরক্কদৌরিবা অনৌবা তাইবংপান অদুদা লৈবা মীওই অমত্তনা “অরেম্বদা নোম্লোই” হায়না খঙহল্লি। —যিশাইয়া ৬৫:২১-২৩

বাইবলদা অসুম্না হায়রি: “মালেম অসি যেহোবাগী মরমদা ৱাখল তাবনা থনগনি” হায়বদি যেহোবাগী লৌশিং জ্ঞান্না থনগনি। (যিশাইয়া ১১:৯) পুম্নমক্কী শেম্বীবা মপু যেহোবানা খ্বাইদগী লৌশিং লৈবনি। অদুনা অনৌবা তাইবংপান অদুদদি মীওইবা খুদিংমক্না মহাক্কী মফমদগী তমজবা ফংগনি। অদুদসু নত্তনা মহাক্না শেম্বীখিবা ফজরবা খুৎশেমশিংগী মরমদসু তমজবা ফংগনি। মখোয়না ফংজবা লৌশিংদু লানগী খুৎশু খুৎলাই শাবা অমসুং অতোপ্পশিংগী মাঙনবা থবক তৌবদা শীজিন্নরোই।(যিশাইয়া ২:৪) মদুগী মহুত্তা মখোয় মশেন ঈঙথনা লৈমীন্নদুনা, পৃথিবী অসিবু ফজরবা মফম অমা ওইহন্দুনা মসিবু ঙাক শেনবগী থবকশিং পুন্না তৌমীন্নগনি।—থাগৎ ঈশৈ ৩৭:১১

ঈশ্বরনা পৃথিবীসি মীওইবশিংনা নুংঙাইনা হিংনবা হায়দুনা য়াম্না চেকশিন্না অমসুং ফজনা শেম্বীখিবনি। মীওইবশিংনা পৃথিবী অসিদা মতমচুপ্পগী ওইনা হিংদুনা লৈবা হায়বসি মহাক্না পামখি। (থাগৎ ঈশৈ ৩৭:২৯; যিশাইয়া ৪৫:১৮) হায়রিবা মহাক্না অহৌবদা থমখিবা পান্দম অদু থুংহন্নবগীদমক ঈশ্বরনা “অশিববু মতম পূম্নমক্কী ওইনা য়োৎশিনগনি।” (যিশাইয়া ২৫:৮) বাইবলদা ঈশ্বরনা অসুম্নসু ৱাশক্লি, “অমুক হন্না শিবা, ৱাবা, তেংথাবা, কপ্পা অমসুং নাবা লৈররোই।” (ফোংদোকপিবা ২১:৪) ফত্তবা তাইবংপান অসি মাঙহনবা মতমদা ঈশ্বরনা কনবিহৌবা মীওইশিং অদুনা লাক্কদৌরিবা অনৌবা তাইবংপান অদুদা মতমচুপ্পগী ওইনা হিংবা ফংজগনি। অদুদসু নত্তনা ঈশ্বরনা মশিং য়াম্লবা লৈখিদ্রবা মীওই কয়াবুসু অমুক হন্না হিঙ্গৎহনবীদুনা লোম্বা নাইদনা হিংজনবা তাঞ্জা পীবিগনি।—যোহান ৫:২৮, ২৯; পাখোনচৎপশিংগী থবক ২৪:১৫

 হৌজিক হৌজিকসু পৃথিবী পুম্বদা মীওই লাখ কয়ারোম্না য়াম্না থুনা লাক্কদৌরবা অনৌবা তাইবংপান অদুদা হিংবা ফংনবগীদমক শেম শারি। মখোয়না ঈশ্বর যেহোবা অমসুং মহাক্না থাবীরকখিবা যীশু খৃষ্টগী মরমদা ফজনা খঙনবা হোৎনৈ। মখোয়না মপুংফাদবা মীওইবা ওইরবসু অনৌবা তাইবংপান অদুদা হিংবা ফংনবগীদমক ঈশ্বরনা মখোয়বু করম্বা মীশকশিং ওইহন্নীংবগে হায়বদু খঙনবা অমসুং ওইনবা হোৎনরি। —যোহান ১৭:৩

নহাকসু ঙসিগী তাইবংপানসিগী অরোয়বা লাকপা মতমদা হিংহৌবা অদুগা য়াম্না থুনা লাক্কদৌরবা অনৌবা তাইবংপান অদুদা হিংবা শোয়দনা পামগনি। মসিগী মতাংদা হেন্না খঙনবগীদমক যেহোবাগী সাক্ষীশিংগা তান্নবীয়ু। মখোয়না নহাক্কা লোয়ননা মতম চুপ্পগী ওইনা নুংঙাইনা হিংজৌ! (English) হায়রিবা লাইরিক অসি শীজিন্নদুনা বাইবলদা ইরম্লিবা ৱাফমশিং অসিগী মরমদা খন্ন নৈনমিন্নবদা য়াম্না হরাউজগনি। মদুগীদমক মমল তিংবা লৈতে।