Ka la bilfu, Wẽnnaam saasẽ goosneema wã sã n wa rɩt naam ãdem-biisã zugu, tẽngã na n lebga sũ-noog zĩiga, tɩ nebã vɩ ne taab laafɩ la zems-n-taar pʋgẽ, n tʋmd tʋʋm sẽn kõt-b sũ-noog wʋsgo. Wẽnnaam yãka a Zeezi Kirist t’a na n dɩ naam tẽngã gill zugu. Rũndã-rũndã, nanambs wʋsg toog kae ne b nin-buiidã ye. La a Zeezi yẽ pa woto ye. A na n gesame t’a nin-buiidã paam b sẽn datã wakat fãa. A sẽn na n dɩ a naamã to-to wã na n yɩɩ ne nonglem. A na n yɩɩ rĩm sẽn yaa nin-sõngo, nimbãan-zoɛta, la wʋmda.—Ezayi 11:4.

Neb nins sẽn na n vɩɩmd tẽngã zugã pa na n welg taaba, b tẽngã wall b buudã sẽn yaa toor yĩng ye. Nebã fãa na n yɩɩ wa buud a yembre. (Vẽnegre 7:9, 10) Sẽn na n vɩɩmd-b tẽngã zugã na n nonga Wẽnnaam la b nong b taabã. B na n naaga taab n tʋm n ges tẽngã Wẽnnaam sẽn kõ-bã yelle, tɩ yɩ wa Wẽnnaam sẽn da rat t’a yɩ to-to sɩngrẽ wã.—Yɩɩn-sõamyã 115:16.

Wẽnnaam Rĩungã sã n wa soog tẽngã, d Naandã na n kɩtame tɩ sabab-wẽnsã fãa sa. (Yɩɩn-sõamyã 24:1, 2) A Zeezi sẽn wa n be tẽngã zugã, a kɩtame tɩ sob-kãseng sẽn tõe n wa ne sãoong yõke, tɩ rẽ wilgd a sẽn tõe n maan bũmb ning ne Wẽnnaam pãngã. (Mark 4:39, 41) Kiristã sã n wa rɩt naam tẽngã gill zugu, ned baa a ye pa na n le yɛɛsd sabab-wẽns yĩng ye. Wẽnnaam Rĩungã na n kɩtame tɩ zems-n-taar zĩnd ninsaalbã ne rũmsã sʋka. Sẽn paase, ninsaalbã pa na n le sãam weoogã ye. —Ooze 2:20.

Nebã fãa na n tara yĩns laafɩ meng-menga. Ned baa a ye pa na n le lʋɩ bãaga, n kʋʋle, wall a ki ye. (Ezayi 35:5, 6) Nebã fãa sũur na n yɩɩ noog ne zĩigã sẽn na n yɩ neer n sakd vɩɩmã, wa sẽn da yaa to-to Edɛn zẽedã zĩigẽ wã Wẽnnaam sẽn da ning d yaab a Ãdem ne a Awa wã. Wa sẽn da yaa to-to Edɛn zẽedã zĩigẽ wã, dũni-paalgã pʋgẽ me, tẽngã na n yiisda kood wʋsgo, hal tɩ nebã fãa paamdẽ tɩ sekdẽ. (Sɩngre 2:9) Wa sẽn da yaa to-to ne pĩnd wẽndẽ Israyɛllã sẽn da yaa Wẽnnaam nin-buiidã, dũni-paalgã pʋgẽ me, ned kam fãa na n ‘paama rɩɩb tɩ seke.’—Maan-kʋʋre 26:4, 5.

Wẽnnaam goosneema wã sã n wa soog dũniyã gilli, laafɩ na n zĩnda nebã fãa sʋka, tɩ b nong taab la b maand taab neere. Zabã pa na n le zĩndi, ned pa na n le wẽg a to bɩ n maan a pãnga, d pa na n le nams n yaool n paam d sẽn datã ye. Biiblã yetame yaa: “Ned kam fãa na n zĩnda a reezẽ tɩɩg ne a kankang tẽngre, tɩ ned ka be n tõe n kẽes-b rabeem ye.”—Miise 4:3, 4.

Ned fãa na n tara a zaka, n pa yɛɛsd b na n wa yik-a ye. D sẽn na n tʋmd tʋʋm ninsã fãa na n kõt-d-la sũ-noogo. Sɩd me, Biiblã yeelame tɩ neb nins sẽn na n vɩɩmd Wẽnnaam dũni-paalgã pʋgẽ wã pa na n “tʋm n nams zaalem ye.”—Ezayi 65:21-23.

Ad Biiblã sẽn yete: “Dũniyã gill na n pida ne Sẽn-Ka-Saab bãngre.” (Ezayi 11:9) Neb nins sẽn na n vɩɩmd dũni-paalgã pʋgẽ wã na n bãnga bũmb wʋsgo, d Naand a Zeova sẽn yaa yam-kãseng soabã nengẽ, la bũmb nins fãa a sẽn maan tɩ be rasãndã zugu. Ninsaalbã pa na n tall b bãngrã n maan zab-teedo, wall n maan b taabã wẽng ye. (Ezayi 2:4) B pʋd n na n zãmsa b sẽn tõe n vɩɩmd laafɩ la zems-n-tar pʋgẽ to-to, la b sẽn na n maan to-to n ges tẽngã yelle.—Yɩɩn-sõamyã 37:11.

Wẽnnaam maaga a yĩng n maneg tẽngã, sẽn na yɩl tɩ d paam sũ-noog daar ne a to fãa. A ratame tɩ ninsaalbã vɩɩmd tẽngã zug wakat sẽn kõn sa. (Yɩɩn-sõamyã 37:29; Ezayi 45:18) Sẽn na yɩl tɩ rẽ pidsi, Wẽnnaam na n “sãama kũum pãng wakat sẽn ka sɛt yĩnga.” (Ezayi 25:8) Ad Biiblã sẽn yete: “Kũum pa na n le zĩndi, sũ-sãanga, yãbr wall toog pa na n le zĩnd ye.” (Vẽnegre 21:4) Wẽnnaam na n kɩtame tɩ neb nins sẽn na n põs dũni-wẽn-kãngã sãoongã sasa wã, n paas neb milyõ-rãmbã sẽn na n vʋʋg n zĩnd dũni-paalgã pʋgẽ wã fãa paam n vɩɩmd wakat sẽn kõn sa.—Zã 5:28, 29; Tʋʋma 24:15.

 Baa masã menga, dũniyã gill zugu, neb milyõ-rãmb n segend b mense, n na n wa vɩɩmd wakat ning Wẽnnaam Rĩungã sẽn na n soog tẽngã. Wakat kãng ta n saame. Baa ne b sẽn pa zems zãngã, b zoe n modgdame n na n yɩ neb nins buud Wẽnnaam sẽn dat tɩ b zĩnd dũni-paalgã pʋgẽ wã. Wãn to? B baood n bãngda bũmb wʋsg Wẽnnaam a Zeova zugu, la a Zeezi Kirist me zugu, soab ning Wẽnnaam sẽn tʋmã.—Zã 17:3.

Bao-y n bãng-y y sẽn tõe n maan n paam n põs dũni-kãngã saabã sasa, n vɩɩmd dũni-paalgã pʋgẽ. Y tõe n kosa a Zeova Kaset soaba, t’a tũnug ne Vɩɩmd-y wakat sẽn kõn sa! sebrã n zãms-y Biiblã zaalem.