Vuovuno omo nguvulu ya Njambi i ka sika mavu ose, vantu va ka yoya mu ndzolela na mu ciyulo. Kaha va ka linga vipanga via cili vize vi ka vaya ku mitima. Njambi ua hangula Yesu Kilistu a pue muangana ua mavu. Lelo lino cingi ca vakua ku sika, ka ve ku hasa tuala mana ku vantu. Vunoni muangana Yesu a ka linga vize vi ka vuisa vantu veni ndzolela muomu ua va haka seho. Cilemo, ngozi, cikeketima na vuoloke, vikevio vi ka pua luvula lua ku sika ceni. —Isaya 11:4.

Mavu a aha ka va ka a tepa-tepa mu vifuti ni visemua. Vantu vose va ka pua vusoko vumo lika. (Ku-Solola 7:9, 10) Vantu vose va ka yoyela ha mavu, va ka lema Njambi na ku lema vakuavo. Kaha va ka pangela hamo lika mu ciyulo, mu ku puisamo vutumbe vua Njambi vua ku niunga limbo liavo, mavu.—Visamo 115:16.

Omo Vuangana vua Njambi vu ka putuka ku sika mavu, Sakatanga uetu a ka vatesa viose vize vie ku koka viyovo via mavu. (Visamo 24:1, 2) Yesu ua muesele ngolo ya kala nayo Njambi mua vatesele ciyovo ca vusonde vua kama, ca ku hona ku likanieka. (Mako 4:39, 41) Ngeci mukemuo, mua ka sika Yesu, na umo uahi a kevua liova lia viyovo via mavu. Vuangana vua Njambi vu ka manusula naua vukenia vua kala ha kati ka vantu na tusitu, kaha vantu ka va kenieka naua mavu.—Hoziya 2:18.

Vantu vose va ka kala na cihindu ca ku tantuluka. Na umo uahi a ka vavala, ku kulupa ni ku-tsa. (Isaya 35:5, 6) Vantu va ka yoyela mu mavu a cili kaha a ku lela, aze a va yoyelele vayala na mpuevo va katete mu Citungu ca Endene. Ngeci mu ca fuile mu Endene, mu mavu a aha, mavu a kema via-ku-lia via vingi, kaha vantu vose va ka kala na via-ku-lia via ku puamo. (Njenisisi 2:9) Kaha ngue mu ca fuile mu Isaleli ya laza, mu Citungu, vantu vose va “ka lia mbolo [yavo] na ku kuta.”—Levitiku 26:4, 5.

Mu i ka sika nguvulu ya Njambi, vantu vose va ka yoya mu ciyulo, kaha va ka limuesa ngozi na vuoloke umo na mukuavo. Ka ku kala vindzita na mapakeso, kaha ka ci ka tondeka ku lihondolola linga muntu a uane via ku likuasa navio. Muomu Mbimbiliya ya kulahesa nguayo: “Va ka tumama muntu ku muntu muintsi lia muti ueni ua viniu, na muintsi lia mukuyu ueni; kaha na umo uahi a ka va vuisa vuoma.”—Mika 4:3, 4.

Nkala vusoko vu ka yoyela mu ndzivo yavuo na mutima umo, kaha vipanga viose vi tu ka linga, mu keza viuma via cili. Muomu Mbimbiliya nguayo, vaze va ka yoyela mu mavu a aha a Njambi “ka va ka panga ngoco.”—Isaya 65:21-23.

Mbimbiliya ya kulahesa nguayo: “Mavu a ka sula na mana a ku tantekeya Yehova.” (Isaya 11:9) Vose va ka yoyela ha mavu, va ka lilongesa ku mana a ya-ye a Sakatanga uetu, Yehova, na ku viuma viose via tangele. Kaha ka va ka pangesa mana avo mu ku panga vitua ni ku kokela vakuavo vusonde. (Isaya 2:4) Vunoni va ka lilongesa mua ku yoyela mu ciyulo umo na mukuavo, na mua ku niungila mavu.—Visamo 37:11.

Njambi ua viukisile mavu na civando, linga tua ku yoyeleho mu ndzolela nkala litangua. Ua tonda vantu va yoyele ha mavu ku miaka yose. (Visamo 37:29; Isaya 45:18) Linga a ka puisemo vutumbe vueni vua katete, Njambi a ka lehula “ku-tsa ku miaka yose.” (Isaya 25:8) Kaha “ku-tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala.” (Ku-Solola 21:4) Njambi a ka hana ku vantu vose vukovelelo vua ku yoya miaka yose, cipue vaze va kovola mua ka nongesa ano mavu a api, ni makulukazi a vaze va a ka sangula ku lutue.—Yoano 5:28, 29; Vilinga 24:15.

 Cipue mu ntsimbu ino vene, makulukazi na makulukazi a vantu mu mavu ose, vali na ku liviukisila via muono ua uha, uli mu hiehi. Vutuhu ka va tantulukile, vunoni vali laza na ku lihakela kapandi ka ku pua cifua ca vantu va ka tavesa Njambi ku yoyela mu mavu a aha. Mu njila ika? Mu ku lilongesa via Yehova Njambi na uze ya tumine Yesu Kilistu.—Yoano 17:3.

Tantekeyenu vikuavo vi mu hasa ku linga mangana mu kovoke ku mavu ano a api na ku yoyela mu mavu a cili, ali mu hiehi. Handekenu na umo Mukaleho ua Yehova a pue na ku mi longesa Mbimbiliya vuana, mu ku pangesa livulu Yoyenu mu Ndzolela ku Miaka Yose!