Amo uejkaua, iTekiuajyo Dios tein yetok iluikak kiixyekanas nochi taltikpak, nochin yolpakiskej, kipiaskej yolseuilis uan kinyolpaktis tekit tein kichiuaskej. Dios kiixtalij Jesucristo maj techixyekana. Jesús amo kemej tekiuanij itech taltikpak, porin nochipa kineki tein kuali para tinochin. Keman taixyekanas kichiuas ika netasojtalis, yeski se tekiuaj akin nochipa tetasojtas, kuali tamelauas uan teiknelis (Isaías 11:4).

Amo moxeloskej maski yeskij seseko kayomej uan tataman kemej ixtamatij porin nochin kuali mouikaskej (Apocalipsis 7:9, 10). Nochin akin nemiskej itech taltikpak kitasojtaskej Dios uan motasojtaskej se iuan okse. Tinochin tiyolpakiskej keman tisentekitiskej uan tikyekpiaskej taltikpak ijkon kemej Dios kineki (Salmo 115:16).

Keman iTekiuajyo Dios taixyekanas nikan taltikpak, Dios akin techchijchiuak, kichiuas maj amo semi tona uan nion no maj semi taseseya (Salmo 24:1, 2). Keman Jesús yetoya nikan taltikpak uan kitsakuilij se tetsaujkaejekat kinextij tein uelis kichiuas ika ichikaualis Dios (Marcos 4:39, 41). Keman Jesús techixyekanas amo akin kimouilijtos maj mochiua se tetsauit. Uan no, iTekiuajyo Dios kichiuas maj tejuan uan tapialmej kuali tinemikan porin amo teyi techchiuiliskej uan amo akin kijtakos taltikpak (Oseas 2:18).

Tinochin tipaktoskej. Amo akin kokolispeuas, nion moitas ke xiuejya nion momikilis (Isaías 35:5, 6). Tinemiskej kampa tachipaujyan uan takualtsinkan ijkon kemej kampa nemiaj Adán uan Eva. Itech yankuik taltikpak semi motachiuas uan amo teyi techpolos tein tikuaskej, ijkon kemej katka itech xochital Edén (Génesis 2:9). Itech xochital, mochiuas tein Dios kiluij xolal Israel ne uejkauj: “Nankikuaskej namopan hasta ke nanixuiskej” (Levítico 26:4, 5).

Keman taixyekantos iTekiuajyo Dios onkas yolseuilis itech nochi taltikpak. Amo akin kichiuiliskej tein amo kuali uan nochin motasojtaskej. Amo onkas neteuilis, kuali kikuiskej tanauatil tein kipiaskej uan tinochin tikpiaskej tein monekis. Biblia kijtoua: “Sejse motalis iuvajmekatampa uan ihigokoujtampa uan amo akinok kinmojmoujtis” (Miqueas 4:3, 4).

Nochin kalyetouanij kipiaskej ininchan uan amo mouiskej maj kipolokan, uan tinochin tikuelitaskej tein tikchiuaskej. Yejua ika, Biblia kijtoua ke akin nemiskej itech yankuik taltikpak “amo nenkaj motekitiltiskej” (Isaías 65:21-23).

Biblia kijtoua: “Itech nochi taltikpak yekmelauj onkas itaixmatilis Jiova” (Isaías 11:9). Tinochin tikixmatiskej tamatilis tein kipia Jiova uan miak taman tein kualtsin tein yejuatsin kichijchiuak. Tein tikchijchiuaskej amo tikuiskej para ika tikinkokoskej oksekin, ta para kuali tinemiskej uan tikyekpiaskej taltikpak (Salmo 37:11; Isaías 2:4).

Dios kualtsin kichijchiuak taltikpak porin kineki maj ompa tinemikan nochipaya uan maj tiyolpakikan mojmostaj (Salmo 37:29; Isaías 45:18). Mochiuas nejin porin Dios “kitamis mikilis nochipaya” (Isaías 25:8). Uan Biblia kijtoua ke “amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok” (Apocalipsis 21:4). Akin Dios kinmakixtis keman kiixpolos tein amo kuali uan millones akin oksepa nemiskej itech yankuik taltikpak, uelis kinkauas maj nemikan nochipaya (Juan 5:28, 29; Hechos 24:15).

 Itech nejin tonalmej, millones momachtijtokej keniuj nemiskej itech yankuik taltikpak keman taixyekanas iTekiuajyo Dios. Maski tajtakolejkej, mochikaujtokej yeskij kemej akin Dios kineki maj nemikan itech yankuik taltikpak. ¿Keniuj kichiuaj? Mochikauaj kiixmatiskej Jiova Dios uan akin kiualtitanik, Jesucristo (Juan 17:3).

Amo uejkaua ixpoliuis nochi tein amo kuali. Komo tikonneki tikonmatis keniuj tionmakisas uan tionnemis itech yankuik taltikpak, xikonilui se itaixpantijkauj Jiova maj mitsonmachti ika Biblia uan amo moneki tikonixtauas. Ika amaix ¡Uelis tiyolpakiskej nochipaya!