E se kgale ge Mmušo wa Modimo wo o lego legodimong o tla be o buša batho ka moka mo lefaseng, batho bao ba tla bego ba phela mo lefaseng ba tla be ba phela ka khutšo e bile ba šoma mešomo yeo e ba kgotsofatšago. Modimo o kgethile Jesu Kriste gore a buše lefase. Jesu ga a swane le babuši ba lehono ka gobane yena o tlo dula a direla batho dilo tše dibotse. O tlo buša ka lerato e bile o tlo ba Kgoši yeo e nago le botho, kgaugelo le toka.—Jesaya 11:4.

Batho ba ka se aroganywe go ya ka setšo goba morafo. Ka moka ga bona ba tlo phela gotee ba thabile. (Kutollo 7:9, 10) Batho ka moka bao ba tla bago ba phela lefaseng ba tla ba ba rata Modimo le batho ba bangwe. Le gona ba tlo šoma gotee ka khutšo go phethagatša morero wa Modimo wa mathomong wa go dira gore lefase e be Paradeise.—Psalme 115:16.

Ge Mmušo wa Modimo o tla be o buša lefase, Mmopi wa rena o tlo laola maemo a leratadima ka mo go feletšego. (Psalme 24:1, 2) Ge Jesu a be a le mo lefaseng o ile a bontšha matla ao Modimo a mo filego ona ge a be a homotša ledimo le legolo. (Mareka 4:39, 41) Ge Jesu a tla be a buša lefase ga go na motho yoo a tlo boifago dikotsi tša tlhago. Ge Mmušo wa Modimo o tla be o buša, re tlo phela le diphoofolo ka khutšo e bile re ka se sa senya lefase.—Hosea 2:18.

Batho ka moka ba tla be ba phetše gabotse mmeleng. Ga go na yo a tlago go babja, go tšofala goba go hwa. (Jesaya 35:5, 6) Batho ba tlo thabela go phela lefaseng le lebotse le leo le hlwekilego go swana le serapa sa Edene seo banyalani ba mathomo ba bego ba phela go sona. Go no swana le serapeng sa Edene, lefaseng le lefsa le gona, mmu o tlo mediša dijo tše dintši e bile batho bao ba tla bago ba phela lefaseng ba tlo ba le dijo tše dintši. (Genesi 2:9) Go swana le setšhaba sa Modimo sa Isiraele, batho ka moka bao ba tla bego ba phela Paradeiseng ba tlo “ja senkgwa [ba] khora.”—Lefitiko 26:4, 5.

Mmušong wa Modimo, batho ka moka ba tlo phela ka khutšo e bile ba tlo dirišana ka botho le ka toka. Go ka se sa ba le dintwa, batho bao ba dirišago matla a bona gampe e bile batho ba tlo ba le dilo ka moka tše ba di hlokago. Beibele e re tshepiša gore: “Yo mongwe le yo mongwe o tlo dula ka tlase ga morara wa gagwe le ka tlase ga mogo wa gagwe, go ka se be le yo a ba tšhošago.”—Mika 4:3, 4.

Batho ka moka ba tla ba le magae a bona e bile ba ka se tšhoge gore ba ka tla ba rakwa moo ba dulago. Le gona ba tlo ba le mešomo yeo e kgotsofatšago. Beibele e re bao ba tla bego ba phela lefaseng le lefsa la Modimo “ba ka se itapišetše lefeela,” goba ba ka se itapišetše mahala.—Jesaya 65:21-23.

Beibele e re tshepiša gore: “Lefase le tla tlala tsebo ya Jehofa.” (Jesaya 11:9) Batho bao ba tlo bago ba phela Mmušong wa Modimo ba tlo ithuta ka bohlale bjo bo sa felego bja Mmopi wa bona e lego Jehofa le ka dilo tše dibotse tšeo a di bopilego. Ba ka se diriše tsebo ya bona go dira dibetša goba go gobatša batho ba bangwe. (Jesaya 2:4) Go e na le moo, ba tlo ithuta go phedišana le batho ba bangwe ka khutšo le go hlokomela lefase.—Psalme 37:11.

Modimo o bopile lefase gabotse e le gore re tle re thabele go phela go lona letšatši le lengwe le le lengwe. O nyaka gore batho ba phele mo lefaseng ka mo go sa felego. (Psalme 37:29; Jesaya 45:18) Go re batho ba phele ka mo go sa felego, Modimo “o tla metša lehu ka mo go sa felego.” (Jesaya 25:8) Beibele e re tshepiša gore: “Lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” (Kutollo 21:4) Modimo o tlo nea batho ka moka sebaka sa go phela ka mo go sa felego. Batho bao ba akaretša bao a tlago go ba phološa ge a tla be a fediša lefase le le lebe le ba bantši bao a tlago go ba tsoša bahung lefaseng le lefsa leo le tlago.—Johane 5:28, 29; Ditiro 24:15.

 Batho ba dimilione lefaseng ka moka ba šetše ba itokišeletša go tlo phela mmušong wa Modimo woo o lego kgauswi. Le ge ba na le sebe, ba leka go phela ka tsela yeo Jehofa a nyakago gore ba tle ba phele ka yona lefaseng le lefsa. Bjang? Ba ithuta ka Jehofa le yoo a mo romilego, Jesu Kriste.—Johane 17:3.

Ekwa gore o ka dira eng gore o tle o phologe ge Modimo a fediša lefase gomme o tle o phele lefaseng le le kaone leo e tla bago e le Paradeise. Kgopela gore Hlatse ya Jehofa e ithute le wena Beibele.