Apa katutu, tyina outumini wa Huku wamehimbika okutumina, ohi maikala omphangu ikahi nawa, ovanthu mavakala nehambu liokukala kumwe tupu mavakalinga ovipuka oviwa vivehambukiswa. Huku wakoya Sesusi atumine ouye auho. Tyelikalela novatumini vononthiki mbetu, Sesusi makalingila ovipuka oviwa ovanthu atumina. Makatumina noluembia nokankhenda, nouwa-tima nouviuki. — Isaías 11:4.

Ovanthu aveho kombanda yohi kamavekeliyapauka vali mokonda yomihoko ine otyivala. Ovanthu aveho kombanda yohi mavekelikuata-po. (Eholololo 7:9, 10) Ovanthu aveho mavakakala kombanda yohi, mavakahumba Huku, nokukala noluembia na vakuavo. Mavekelikuatesako opo vapilulule ohi aikala ngetyi Huku eihandelele ponthyimbi, tupu mavakayunga ohi eumbo liavo. — Salmo 115:16.

Tyina Ouhamba wa Huku wamehimbika okutumina ohi, Omutungi wetu makayunga ovipuka aviho viohi. (Salmo 24:1, 2) Etyi Sesusi atalamekesile omphepo, walekesa okuti Huku oe wemuavela ononkhono mbokutyilinga. (Maluku 4:39, 41) Naina tyina tuamehimbika okutuminwa na Kilisitu, kamakukamoneka otyinimawe natyike. Tupu tyina Ouhamba wa Huku wameya okutumina, pokati kovanthu novinyama mapakakala ombembwa iya nawike vali makahanya ohi. — Oséias 2:18.

Atuho matukakala nekongoko likahi nawa. Nawike makavela, nokukulupa ine okunkhia. (Isaías 35:5, 6) Ovanthu mavakakala momphangu ikahi nawa, ngetyi ankho tyikahi motyikunino tyo Endene, muna muapakelwa ovalinepi votete ovo Andau na Eva. Ngetyi ankho tyikahi otyikunino tyo Endene, no mouye omupe mamukakala okulia okunyingi, iya petupu omunthu nawike makankhia ondyala. (Gênesis 2:9) Ngetyi tyali ova Isilayeli kohale, ovanthu aveho mavakakala mouye omupe ‘mavakalia okulia [kuavo] nehambu.’ — Levítico 26:4, 5.

Mouhamba wa Huku, ovanthu aveho mavakakala nombembwa nokulitekula nawa nouviuki. Kamakukala vali ovilwa, petupu omutumini mavakalinga onya ovanthu, iya aveho makakala novipuka vesukisa. Ombimbiliya yati: “Kanda omunthu makapumphama mombuelo yomuvinyu wae, nomukuyu wae iya petupu ou mekevetilisa owoma.” — Miquéias 4:3, 4.

Onombunga ambuho mavakakala nomaumbo avo tyihena owoma wokuti hamwe ha mavataatua-po, ovilinga aviho mavakalinga mavikevehambukiswa. Ngetyi Ombimbiliya ipopia vana vakakala mouye omupe “kamavakaundapa ononkhono-mphuila.” — Isaías 65:21-23.

Ombimbiliya ipopia okuti: “Ohi aiho maikeyula enoñgonoko lya Siovaa.” (Isaías 11:9) Ovanthu mavakakala mouye omupe, mavekelilongesila kounongo Womutungi wetu Siovaa, no kovipuka oviwa atunga. Enoñgonoko olio, kamavakalinga nalio omauta ine okulinga onya vakuavo. (Isaías 2:4) Tupu mavekelilongesa oñgeni vena okulitekula na vakuavo nokuyunga ohi — Salmo 37:11.

Huku walingile nawa ohi, opo onthue tukale-mo nehambu ononthiki ambuho. Ankho uhanda ovanthu vakale kombanda yohi nomuenyo uhapu. (Salmo 37:29; Isaías 45:18) Opo afuisepo etyi ahandele, Huku “makamanako ononkhia pala apeho.” (Isaías 25:8) Ombimbiliya ipopia okuti: “Ononkhia kamambukakala-ko vali, nii okuliyava nii okulila, nii omaluihamo kavikakala-ko vali.” (Eholololo 21:4) Huku maavela ovanthu ovanyingi, elao liokukakala mouye omupe pala apeho, tyilinge vana mahupisa tyina ameya okuhanyako ouye uno, tyilinge vana mavakatutiliswa. — Suau 5:28, 29; Ovilinga 24:15.

 Ovanthu ovanyingi pehepano vekahi-ale nokulifuiika opo vakakale mouye omupe mauya. Namphila ovakuankhali mahi vekahi nokulinga ononkhono mbokukala novituwa viovanthu Siovaa ahandela mouye omupe. Vetyilinga ñgeni? Velilongesa konthele ya Siovaa Huku na una atumine Sesusi Kilisitu. — Suau 17:3.

Opo unoñgonoke vali etyi upondola okulinga opo uyovolwe tyina onthyulilo yameya, okakala mouye omupe mauya, tavela okulilongesa Ombimbiliya otyali Nonombangi mba Siovaa, momukanda Kalako Nomwenyo Apeho!