Paladaiso Kisu Ikipya iki Kili Pipi
Kyala apelile ikisu ukuti abandu abagholofu bikalengemo kwa bwila na bwila. (Salimo 37:29) Umwene ayibikile imbumba iyakwanda, Adamu na Eva mu ngunda unnunu fiyo uwa Edeni, kangi abapele abanduyungu lwake ulusako ulwakuti balimeghe nu kukipwelelela ikisu.—Ubwandilo 1:28; 2:15.
Amasiku agha ikisu kikaya Paladaiso bo muno Kyala alondelagha. Loli Kyala akachenja aminong’ono ghake. Ngimba ikuya pakufwanisya bulebule ubwighane bwake? Bo muno inkhani isi syakindagha siyobile, Kyala atikuya pakonanga ikisu. M’malo mwake ikuya pakubitikisya abandu abasubiliwa ukuti bikalengemo. Linga Kyala afwanisye ubwighane bwake, ngimba ifindu fikwisa pakuya bulebule nkisu?
Iboma lya Kyala lisakulaghilagha ikisu kyosa
Mwalululu, linga iboma lya kumwanya ilya Kyala lyandile ukulaghila, ikisu kisakuya malo aghakuhobosya agha abandu bisakwikalagha pampene mwakukolelana nu kuhoboka ukubomba imbombo. Kyala ansalile Yesu Kristu ukuti asalaghileghe ikisu kyosa kyapasi. Amasiku agha, abalaghili bingi batikubabombela ifindu ifinunu abandu. Yesu akindene fiyo na balaghili aba panongwa yakuti umwene isakubabombelagha ifindu ifinunu abandu. Umwene isakulaghilagha mwalughano, mwakisa kangi isakuya Mwalafyale nnunu.—Yesaya 11:4.
Abandu bisakukolelanagha pa kisu kyosa
Abandu aba bisakwikalagha nkisu ikipya batisakusalanagha. Abene bisakukolelanagha fiyo. (Ubusetuli 7:9, 10) Abandu bosa aba bisakwikalagha nkisu bisakubombelagha pampene mwalutengano ukuti bafwanisye ubwighane bwa Kyala ukupwelelela akaya kabo nikisu.—Salimo 115:16.
Abene bisakuhobokagha nikipeliwa
Linga Ubunyafyale bwa Kyala bwandile ukulaghila pa kisu, Umpeli isakukindilila ukukifighilila ikipeliwa. (Salimo 24:1, 2) Bo Yesu ali pa kisu, Kyala alimpele amaka aghakughubatamisya umbelo. (Marko 4:39, 41) Pasi pabulaghili bwa Kristu, atisakuyapo nayumo uyu isakutilagha ingozi syakipeliwa. Pakabalilo ako tutisakutilagha ifinyamana kangi tutisakonangagha ikipeliwa.—Hoseya 2:18.
Bisakuya nu bumi ubununu nifyakulya fingi
Aliwesa isakuhobokagha nu bumi ubununu. Akayapo uyu isakubinagha, ukukangala pamo ukufwa. (Yesaya 35:5, 6) Abandu bisakuhobokagha nu bumi ubununu kangi amalo amanunu bo agha bikalangamo abandu abakwanda mu Edeni. Ikisu ikipya, kisakupagha ifyakulya fingi kangi abandu bosa bisakuya nifyakulya fingi bo muno wayilile ungunda wa Edeni. (Ubwandilo 2:9) Bo muno syayilile na bandu ba Kyala Abaisraeli, nkisu ikipya aliwesa “isakulyagha nukwikuta fiyo.”—Banyalevi 26:4, 5.
Ulutengano ulwanaloli nu kufighililiwa
Mu boma lya Kyala, abandu bosa bisakuhobokagha nulutengano kangi bisakunangisaniagha ikisa. Ubwite nifyankhaza fitisakuyako kangi aliwesa isakuya na ifi ikulondiwa. Ibaibolo lifingile ukuti: ‘Umundu wesa isakwitughalagha ndutengano mmipiki yake iya mafilu niya mikuyu kangi atisakuyako yumo uwa kubapelela ulutende.’—Mika 4:3, 4.
Aliwesa isakuya ninyumba inunu kangi isakuhobokagha nimbombo
Imbumba yiliyosa yisakuya nakaya kangi batisakutilagha nakimo, abene bisakuhobokagha nimbombo yosa iyi bisakubombagha. Ibaibolo likuyoba ukuti, bosa aba bisakwikalagha nkisu ikipya ikya Kyala ‘kosa aka bisakubombagha kisakuyagha kanunu itolo.’—Yesaya 65:21-23.
Ifimanyilo ifinunu
Ibaibolo lifingile ukuti: ‘Ikisu kisakwisulagha nubumanyi bwa Yehova Kyala.’ (Yesaya 11:9) Abandu aba bisakwikalagha mu Bunyafyale bwa Kyala, bisakumanyilagha ifundo isyapamwanya isya Mpeli wabo Yehova, ni sya findu ifinunu ifi apelile. Batisakuyagha nifilwilo pamo ukubafulasya abangi. (Yesaya 2:4) M’malo mwake bisakwikalagha mwalutengano na bangi nu kukipwelelela ikisu.—Salimo 37:11.
Ubumi bwa bwila na bwila
Kyala aliyipile fiyo ukukitendekesya ikisu ukuti tuhobokeghe nubumi isiku lililyosa. Umwene ikulonda ukuti abandu bikaleghe pa kisu kwa bwila na bwila. (Salimo 37:29; Yesaya 45:18) Ukuti afwanisye ubwighane bwake ubu ali nabo pabwandilo, Kyala ‘isakubupyuta ubufwe kwa bwila na bwila.’ (Yesaya 25:8) Kangi Ibaibolo lifingile ukuti ‘Bope nubufwe, nalinga bo busulumanie, nalinga ko kukuta pamo ko kubaba fitisakuyangako kangi.’ (Ubusetuli 21:4) Kyala isakubapa ubumi abandu aba abapokile pakabalilo aka akipyutagha ikisu ikibibi iki kangi isakubasyusya abandu bingi aba bafwile ukuti basaye nulusako ulwakwisa kwikala kwa bwila na bwila.—Yohani 5:28, 29; Imbombo sya Batumiwa 24:15.
Lino abandu bingi bikwitendekesya ukwisakwikala mu Bunyafyale bwa Kyala ubu buli pipi. Nalinga ukuti basitabugholofu, loli Kyala ikuhoboka nabo kangi ikulonda ukuti basikale nkisu ikipya. Bulebule? Mwakumanyila isya Yehova Kyala nu mwanake Yesu Kristu uyu alintumile.—Yohani 17:3.
Mubaghile ukumanya nyingi isya muno mubaghile ukwisa kuponela pabumalilo bwa kisu ikibibi iki nu kwisa kwikala nkisu ikinunu iki kikwisa mwalululu. Mubaghile ukusuma ukuti mumanyileghe Ibaibolo kisita kulipila nu Nketi wa Yehova, pamo ghela ukumanyila Ifimanyisyo fya Baibolo ifya pa intaneti pa jw.org.
