De niee Welt met daut Paradies es dicht bie!
Gott muak de Ieed soo, daut de Jerajchte doa fa emma bowen läwen kunnen (Psalm 37:29). Hee sad de ieeschte beid Menschen, Adam un Eva, en dän schmocken Goaden Eden un jeef an un äare Nokomen de Veauntwuatunk, de Ieed to beoabeiden un no dee opptopaussen (1. Mose 1:28; 2:15).
Vondoag dän Dach es de Welt lang nich een Paradies, soo aus Gott sikj daut väajenomen haud. Oba Gott haft sien Väanämen doawäajen nich jeendat. Woo woat hee de Ieed wada to een Paradies moaken? Aus de väaje Artikjels jewäsen haben, woat Gott dän Ieedbaul nich venichten, wiels hee well, daut true Menschen doabowen läwen. Woo woat de Ieed loten, wan Gott sien Vespräakjen ieescht woat erfellen?
Bloos eene Rejierunk oppe Welt
Wan Gott siene Rejierunk von utem Himmel boolt äwa de Menschen harscht, woat de Ieed eene Städ sennen, wua aule schaftich sent un en Eenichkjeit toop läwen. Un jieda eena woat eene goode Oabeit haben, waut am tofräd moakt. Wäm haft Gott aunjestalt toom äwa de Ieed rejieren? Jesus Christus. Jesus woat een bätra Harscha sennen aus väle Harscha vondoag dän Dach, wiels hee sikj von Hoaten om de Menschen kjemren woat. Hee rejieet ut Leew, un hee woat een leeftolja, metliedenda un jerajchta Kjennich sennen (Jesaja 11:4).
Eenichkjeit oppe gaunze Welt
En de niee Welt woat manke Menschen kjeen Unjascheet jemoakt woaren. Endoont von woone Rauss eena es, dee woaren aula een Volkj sennen (Openboarunk 7:9-10). Aule Menschen, waut dan oppe Ieed läwen, woaren Gott un äaren Näakjsten leewen. Dee woaren aula frädlich toop schaufen un sikj om äa nieet tus, de Ieed, kjemren, soo daut sikj Gott sien Väanämen erfelt (Psalm 115:16).
Eene jesunde un utjejlikjte Natua
Wan Gott sien Kjennichrikj woat äwa de Ieed harschen, woat de Schepfa daut Wada gaunz kontrollen un daut utjlikjen (Psalm 24:1-2). Aus Jesus mol gaunz leicht eenen stoakjen Wintstorm berujen deed, wees hee doaderch bloos een bät von Gott siene Macht, waut hee am jeef (Markus 4:39, 41). Unja Christus siene Harschoft woat kjeena sikj brucken enjsten wäajen Owwadasch. Gott sien Kjennichrikj woat doafäa sorjen, daut uk Menschen un Tieren en Fräd läwen, uk daut Menschen de Natua nich mea vestieren (Hosea 2:20).
Volkomne Jesuntheit un jenuach to äten
Jieda eena woat volkomen jesunt sennen. Kjeena woat mea krank ooda oolt woaren ooda stoawen (Jesaja 35:5-6). De Natua woat dan soo scheen un rein sennen, aus to Adam un Eva äare Tiet em Goaden Eden. Un soo aus em Goaden Eden woat de Ieed dan jenuach droagen toom äten fa aulem (1. Mose 2:9). Soo aus Gott sien Volkj Israel ieeschtemma, woat em Paradies jieda eena “jenuach to äten haben” (3. Mose 26:4-5).
Opp iernst Fräd un Sechaheit
Wan Gott siene Rejierunk äwa de Ieed harscht, woaren aule Menschen sikj frintlich un jerajcht behaundlen un werkjlich Fräd haben. Doa woat daut kjeenen Kjrich jäwen. Kjeena woat siene Macht orrajcht brucken. Un kjeena woat motten om daut needichste em Läwen kjamfen. Daut es krakjt, waut de Bibel vesprakjt: “Jieda eena woat bie siene Wienrank setten, ooda unja sienen Fiejenboom, un kjeena woat an doa enjsten” (Micha 4:3-4).
Feine Wonstäden un eene Oabeit, waut Freid moakt
Jieda Famielje woat eene schmocke Wonstäd haben un sikj nich enjsten motten, daut see dee mol velieren. Un eenem siene Oabeit woat sikj werkjlich loonen. De Schreft sajcht äwa dee, waut en de niee Welt läwen woaren: “Äare Oabeit woat nich vejäfs sennen” (Jesaja 65:21-23).
De baste Belierunk
De Bibel vesprakjt, daut “en daut gaunze Launt Vestentnis fa däm HARN sennen” woat (Jesaja 11:9). Menschen en Gott sien Kjennichrikj woaren von de onbejriepelje Weisheit von onsen Schepfa Jehowa lieren, un äwa de wundascheene Sachen, waut hee muak. Dee woaren daut, waut see lieren, nich doatoo brucken, aundre Schoden auntodoonen ooda Jewäaren to buen (Jesaja 2:4). Enne Städ daut woaren see lieren, frädlich toop to läwen un sikj om de Ieed to kjemren (Psalm 37:11).
Läwen onen Enj
Gott haft de Ieed krakjt rajcht jemoakt, soo daut wie jieda Dach een scheenet Läwen haben kjennen. Hee wull uk, daut Menschen fa emma opp de Ieed läwden (Psalm 37:29; Jesaja 45:18). Doamet daut mäajlich woat, woat Gott “opp emma dän Doot wajchnämen” (Jesaja 25:8). “Doa woat kjeen Doot ooda Trua ooda Hielen ooda Weedoag mea sennen”, vesprakjt de Schreft (Openboarunk 21:4). Gott woat aule Menschen de Jeläajenheit jäwen, onen Enj to läwen – dee, waut hee rat, wan hee dise schlajchte Welt venichten woat, un dee, waut hee en de niee Welt wada vom Doot toom Läwen brinjen woat (Johanes 5:28-29; Aposteljeschicht 24:15).
Millionende oppe gaunze Welt moaken sikj nu aul reed fa Gott sien Kjennichrikj, waut aul soo dicht bie es. Wan dee uk aula onvolkomen sent, proowen dee doawäajen dee Sort Menschen to sennen, waut Gott en siene niee Welt haben well. Woo doonen dee daut? Doaderch, daut see Jehowa Gott un Jesus Christus kjanen lieren (Johanes 17:3).
Finj ut, woo du kaust daut Weltenj äwaläwen un en eene bätre Welt läwen, waut aul soo dicht bie es. Doo met eent von Jehowa siene Zeijen emsonst de Bibel studieren met daut Buak Een scheenet Läwen fa emma!.
Veleicht jleichst du uk dit
DE WOAKTORM
Waut woat Gott sien Kjennichrikj volbrinjen?
Jesus wist, daut Gott sien Kjennichrikj de eensje Rejierunk wia, waut de Trubbel oppe Ieed leesen kunn. Woo kjenn wie opp dee Rejierunk vetruen?
