Klosap nao, taem niu gavman blo God wea stap lo heven rulim evriwan, bae earth hem hapi ples wea pipol savve stap gud tugeta and duim olketa gudfala waka wea mekem olketa satisfae. God appointim Jesus Christ for rulim earth. Jesus hem difren from staka man wea rul distaem wea no kea abaotem pipol, bikos hem bae evritaem duim gud samting for pipol. Rul blo hem base lo love, and hem King wea kaen, showim mercy, and no fevarem eniwan.​—Aesaea 11:4.

Evri pipol wea stap lo earth bae waka tugeta nomata olketa kam from olketa difren kantri or tribe. (Revelation 7:9, 10) Evri pipol bae lovem God and olketa narawan. Olketa bae waka gud tugeta for mekem plan blo God kamap tru, wea hem nao for lukaftarem hom blo olketa, disfala earth.​—Sams 115:16.

Taem Kingdom blo God rulim full earth, God, wea hem Creator, hem nao bae kontrolem weather. (Sams 24:1, 2) Jesus showim samting wea hem fit for duim witim paoa wea hem kasem from God, taem hem mekem raf sea for kwaet and big wind for stop. (Mark 4:39, 41) Taem Christ hem rul, no eniwan bae fraetem natural disaster. Taem Kingdom blo God rul, iumi bae stap gud witim olketa animal and iumi bae no spoelem environment blo iumi.​—Hosia 2:18.

Evriwan bae garem perfect health. No eniwan bae sik, olo, or dae. (Aesaea 35:5, 6) Pipol bae stap lo environment wea klin and luk naes, wea Adam and Eve garem lo garden blo Eden bifor. Lo niu world, olsem lo Eden, kaikai bae grow gud bikos lo gudfala graon and evriwan wea stap lo earth bae garem staka kaikai. (Jenesis 2:9) Evriwan wea stap lo datfala Paradaes bae olsem nation blo Israel bifor wea “kaikaim kaikai blo [olketa] and satisfae.”​—Leviticus 26:4, 5, NW.

Taem gavman blo God rul, evri pipol bae garem peace and kaen lo narawan and no fevarem eniwan. Bae no eni war, pipol wea rul no spoelem narawan, and evriwan bae garem evri samting wea olketa needim. Bible sei: “Olketa bae sidaon andanit lo grape tree and andanit lo fig tree blo olketa seleva, and no eniwan bae mekem olketa fraet.”​—Micah 4:3, 4, NW.

Evri famili bae garem haos and bae olketa no fraet nogud olketa displace, and bae iumi kasem gud samting from evri waka wea iumi duim. Bible sei, pipol wea stap lo niu world blo God bae “hard waka blong olketa bae hemi no save lus nating,” or iusles nomoa.​—Aesaea 65:21-23.

Bible sei: “Disfala wol bae hemi fulap long pipol hu i barava savegud long [Jehovah].” (Aesaea 11:9) Pipol wea stap anda lo Kingdom blo God bae lane abaotem bigfala wisdom blo Creator blo olketa, Jehovah, and abaotem creation blo hem wea luk naes tumas. Olketa bae no iusim savve wea olketa garem for wakem olketa weapon for faet or for spoelem nara pipol. (Aesaea 2:4) Bat, bae olketa lane for stap gud witim nara pipol and lane hao for lukaftarem earth.​—Sams 37:11.

God hem preparem gud disfala earth mekem iumi savve enjoyim laef evriday. Hem laekem iumi olketa man for laef olowe lo earth. (Sams 37:29; Aesaea 45:18) For mekem diswan happen, God “bae hemi finisim dae.” (Aesaea 25:8) Bible sei: “No eniwan bae dae and no enitaem bae pipol sorre or krae or feelim pain tu.” (Revelation 21:4) God bae givim chance for laef olowe lo pipol wea hem sevem olketa taem hem distroem disfala nogud world, and lo staka pipol wea bae hem resurrectim olketa lo niu world.​—John 5:28, 29; Acts 24:15.

 Staka million pipol redi finis distaem for stap lo niu world wea klosap tumas for kam. Nomata olketa no perfect, olketa traem best distaem for garem olketa gudfala wei mekem olketa fit for stap lo niu world blo God. Wat nao olketa duim? Olketa lane abaotem Jehovah God and Jesus Christ, wea God sendem kam.​—John 17:3.

Lanem samfala samting moa wea iu savve duim mekem iu savve sev taem end blo world hem kam and for stap lo niu world wea klosap nao for kam. Acceptim free Bible study course from eni Jehovah’s Witness lo Enjoyim Laef for Olowe! buk.