Tumpamantawan Diospa Gobiernonqa cielomantapacha tukuy kay jallpʼata kamachenqa. Chaypi kausakoj runastaj kusisqa, sonqo tiyasqataj kanqanku, trabajonkuwanpis kusikonqanku. Diosqa Jesucristota churan kamachinawanchejpaj. Payqa mana kay jallpʼamanta gobiernos jinachu, astawanqa wajkunaj allinninkuta maskʼan. Gobiernonqa munakuypi sayachisqa kanqa, chantapis khuyakuywan kamachenqa, tukuypajtaj justiciata ruwanqa (Isaías 11:4).

Ima llajtamanta kaspapis, imayna rijchʼayniyoj kaspapis tukuy runas ujchasqa kausakonqanku (Apocalipsis 7:9, 10). Jallpʼapi tiyakoj tukuy runasqa Diosta, runa masinkutapis munakonqanku. Jallpʼanchejta cuidanapajqa tukuypis ujchasqas, allinta apanakuspataj trabajasunchej (Salmo 115:16).

Diospa Gobiernon kay jallpʼata kamachimushajtin manaña sinchʼi paras nitaj sinchʼi wayras kanqachu (Salmo 24:1, 2). Jesús jallpʼapi kashajtin sinchʼi wayrata chʼinyacherqa, jinamanta rikucherqa imatachus Diospa atiyninwan ruwayta atisqanta (Marcos 4:39, 41). Jesús kamachimushajtin ni pí manchikonqachu sinchʼi paras, sinchʼi wayras kananmanta. Diospa Gobiernonpeqa runaswan animaleswan allinta kausakonqanku, nitaj pipis jallpʼata chʼichichanqachu (Oseas 2:18).

Tukuypis mana onqosunchu, mana machuyasunchu, nitaj wañusunchu (Isaías 35:5, 6). Imaynatachus Adanwan Evawan kʼachitu, llimphu lugarpi kausakorqanku, ajinallapitaj noqanchejpis kausakusunchej. Paraisopi mikhunaqa jinantin kanqa, imaynatachus Edén huertapi karqa ajinata (Génesis 2:9). Dios israelitasman nerqa: “Tʼantata mikhunkichej sajsakunaykichejkama”, nispa. Chay nisqantaj paraisopi juntʼakonqa (Levítico 26:3-5).

Diospa Gobiernon kamachimushajtin jallpʼantinpi allin kausay kanqa, tukuypaj justicia kanqa, runaspis kʼachata kausakonqanku. Manaña guerras kanqachu nitaj pipis munaynillanta ruwanqachu. Mana imanchejpis pisenqachu. Biblia nin: “Tukuy kawsakonqanku ni imata manchachikuspa; sapa uj samarikuyta atenqa uvasninkoj llanthumpi, jinataj higo sachʼankoj llanthumpi”, nispa (Miqueas 4:3, 4).

Tukuy familias wasiyoj kanqanku, nitaj wasinkuta pierdenankumanta llakikonqankuchu. Imata ruwaspapis mayta kusikonqanku. Chayrayku Biblia nin paraisopi kausajkunaqa ‘mana qhasipajchu llankʼanankuta’ (Isaías 65:21-23).

Biblia niwanchej ‘tukuy jallpʼaqa Jehová Diosta rejsiywan juntʼa kananta’ (Isaías 11:9). Runasqa Jehová Diospa yachayninmanta, kʼacha ruwasqasninmanta ima yachakusunchej. Chay yachakusqanchejtataj mana wañuchej armasta ruwanapajchu nitaj pitapis ñakʼarichinapajchu apaykachasunchej, manaqa tukuywan allinta kausakunapaj, jallpʼata qhawanapaj ima (Isaías 2:4; Salmo 37:11).

Diosqa jallpʼata kʼachituta ruwarqa imaraykuchus munan chaypi kusisqas, wiñaypajtaj kausakunanchejta (Salmo 37:29; Isaías 45:18). Chayrayku Diosqa “wañuyta wiñaypaj chinkachenqa” (Isaías 25:8). Bibliapi nin ‘manaña wañuy kanqachu, nitaj llakiypis, nitaj qhapariypis, nitaj nanaypis’ (Apocalipsis 21:4). Diosqa kay mundoj tukukuyninmanta salvakojkunata, wañuymanta kausarimojkunata ima wiñay kausayta qonqa (Juan 5:28, 29; Hechos 24:15).

 Kunan tiempopi jallpʼantinmanta may ashkha runas paraisopi kausakunankupaj wakichikushanku, maypachachus Diospa Gobiernon jallpʼata kamachenqa chaypaj. Pantaj runas kajtinkupis Diospa munayninman jina kausakunankupaj kallpachakushanku. ¿Imaynatá chayta ruwashanku? Jehová Diosta, Jesucristotawan rejsispa (Juan 17:3).

Tumpamantawan kay mundoj tukukuynin chamonqa. Salvakunaykipaj, paraisopitaj kausakunaykipaj imatachus ruwanayki kasqanta yachanaykipajqa, Jehovaj testigosninwan Bibliamanta yachakuy Wiñaypaj kusisqa kausakuy nisqa librowan. Paykunaqa mana cobraspalla Bibliamanta yachachisonqanku.