Ñallami mushuj pachapi causashun
Yaya Diosca paita cazuj gentecuna huiñaita causachunmi cai Allpata rurarca (Salmo 37:29). Chaimantami Adán y Evata Edén huertapi causachun churashpaca paicunapish, paicunapaj huahua huahuacunapish allpata tarpushpa, cuidashpa causachun mingarca (Génesis 1:28; 2:15).
Cai pachaca mana callaripi Dios munashca shinachu can. Pero Yaya Diosca paipaj munaitaca mana cambiashcachu. ¿Cai Allpa shuj paraíso tucuchunca Diosca imatataj ruranga? Ña ricushca shinaca Diosca mana cai Allpata tucuchingachu. Chaipaj randica cai Allpapi paita cazuj gentecuna causachunmi churanga. ¿Yaya Dios paipaj munaita pajtachijpica causaica ima shinashi cai Allpapi canga?
Shuj gobiernollami tucui Allpata mandanga
Diospaj Gobiernoca ñallami jahua pachamanta tucui cai Allpata mandanga. Chaimantami gentecunaca cushilla causaita, tranquilo causaita, sumaj trabajota charingacuna. Diosca Jesustami ñucanchijta mandachun nombrashca. Jesusca mana gentecuna shinachu mandanga. Paica tucuicuna alli causachunmi munan. Chaimantami cꞌuyaihuan mandanga. Shinallataj shuj llaquij, justo reymi canga (Isaías 11:4).
Tucuicunami shuj shinalla causashun
Maijan llajtamanta cashpapish, ima raza cashpapish gentecunaca tucuicunami shuj shinalla causashun (Apocalipsis 7:9, 10). Tucui Allpapi causaj gentecunami Yaya Diosta cꞌuyangacuna. Paicunapurapishmi cꞌuyanacushpa causangacuna. Tucuicunami tandalla, sumajta trabajashpa cai Allpata cuidangacuna. Chashnami Diospaj munaita pajtachingacuna (Salmo 115:16).
Sumaj Allpapimi causashun
Diospaj Gobierno cai Allpata mandacujpica terremotocuna, jatun acapanacuna, jatun tamya, chai laya shujtaj llaquicunaca ña mana tiyangachu (Salmo 24:1, 2). Jesús cai Allpapi cashpaca shuj jatun huaira, yacu jatarijpica chaicuna casijlla cachunmi rurarca. Chashnami Diospaj poderhuanca chaicunata controlai tucushcata ricuchirca (Marcos 4:39, 41). Jesús mandacujpica cai Allpapi jatun llaquicuna tiyanataca ña mana pi manchangachu. Gentecunapish, animalcunapish casilla causaitami charingacuna. Cai Allpatapish ña mana pi llaquichingachu (Oseas 2:18).
Alli saludtami charishun, achca micunami tiyanga
Tucuicunami alli saludta charingacuna. Mana pi ungungacunachu, mana pi yuyajyangachu, mana pi huañungachu (Isaías 35:5, 6). Adán Eva sumaj Edén huertapi causashca shinami ñucanchijpish sumaj, limpio Allpapi causashun. Paraíso Allpapica Edén huertapi shinami achca micuna tiyanga (Génesis 2:9). Chaipica Yaya Diosca israelitacunaman imata cusha nishcatami pajtachinga. Paica: “Cancunaca quiquin micunatami mana nijta micunguichij” nircami (Levítico 26:4, 5).
Tranquilo, sumaj causaimi tiyanga
Diospaj Gobierno mandacujpica tucui cai Allpapimi sumaj causai tiyanga. Tucuicunami cashcata rurashpa, cꞌuyaihuan tratanacushpa causangacuna. Macanacuicuna mana tiyangachu, autoridadta charijcunapish ña mana llaquichingacunachu. Tucuicunami ima minishtirishcacunata charishun. Bibliapica: “Chaipica pi mana manchachingachu. Quiquin uva yura ucupi, quiquin higo yura ucupi tiyarishpami samaringacuna” ninmi (Miqueas 4:3, 4).
Tucuicunami alaja huasita, sumaj trabajota charingacuna
Tucui familiacunami shuj huasita charingacuna. Chai huasita pirdinatapish mana manchangacunachu. Imata rurashpapish cushicuihuanmi trabajangacuna. Bibliapi nishca shinaca chai mushuj pachapi causajcunaca “mana yanga trabajangacunachu” (Isaías 65:21-23).
Alli yachaitami charishun
Bibliapica: ‘Tucui cai pachaca Mandaj Diosta rijsishcahuanmi junda canga’ ninmi (Isaías 11:9). Chai mushuj pachapi causaj gentecunaca Jehová Diospaj sabiduriamantami achcata yachangacuna. Shinallataj pai sumajta huiñachishcacunamantami yachangacuna. Paicuna ima yachashcacunataca armacunata rurangapaj, shujtajcunata dañota rurangapajca mana utilizangacunachu. Sino tucuicunahuan sumajta causangapaj, cai Allpata alajata cuidangapajmi utilizangacuna (Isaías 2:4; Salmo 37:11).
Huiñai huiñaitami causashun
Yaya Diosca gentecuna huiñai huiñaita causachun, tucui punllacuna sumajta causachunmi cai Allpataca alajata rurashca (Salmo 37:29; Isaías 45:18). Paipaj munaita pajtachingapajmi Diosca huañuitapish tucuchinga (Isaías 25:8). Bibliapica: “Huañuipish, huacaipish, llaquipish, nanaipish ña mana ashtahuan tiyangachu” ninmi (Apocalipsis 21:4). Diosca cai mana alli pachata tucuchicushpaca achca gentecunatami quishpichinga. Paicunaca huiñaita causana oportunidadtami charingacuna. Shinallataj achca millones gentecunatami causachinga. Paicunamanpishmi paraisopi huiñaita causachun oportunidadta cunga (Juan 5:28, 29; Hechos 24:15).
Cunan punllacunapica muyundij Allpamanta achca millones gentecunami Diospaj Gobierno mandacunpi causangapaj allichiricuncuna. Juchayujcuna cashpapish Dios munashca shina gentecuna cangapajmi esforzaricuncuna. ¿Ima shinataj chaita rurancuna? Paicunaca Jehová Diosta rijsingapaj, Jesucristotapish rijsingapajmi esforzarincuna (Juan 17:3).
Cai mana alli pacha tucurinapajca ashalla tiempomi illan. Quiquinpish cai pacha tucurijpi quishpiringapaj, mushuj pachapi causangapaj imata rurana cashcata yachasha nishpaca, shuj testigo de Jehová Huiñai huiñaita cushilla causai nishca librohuan Bibliamanta gratis yachachichun mañai.
Caitapish yachai
HUILLAJ
¿Diospaj Gobiernoca imatataj ruranga?
Jesusca Diospaj Gobiernolla cai Allpapi tiyaj tucui llaquicunata tucuchina cashcatami yacharca. ¿Yaya Diosca paipaj gobiernopi confiachunca imatataj rurashca?
