Kare e roa atu, ka tutara te kavamani o te Atua ki rungao i te enua katoa, ka noo tinamou te katoatoa e ka mataora i te rave i te au angaanga memeitaki. Kua iki te Atua ia Iesu ei tutara ki rungao i te enua. Ei tuke ki te au tutara i teia tuatau, ka akono meitaki a Iesu i tona iti tangata. Ka akatumuia tana tutara anga ki runga i te aroa. Ei Ariki, ka akaari aia i te tu takinga meitaki, te tu akaaroa e te tu tau.​—Isaia 11:4.

Kare te iti tangata i roto i te ao ou e akatakakeia no ta ratou au peu me kore te enua i anauia ai ratou. Ka taokotaiia te katoatoa. (Apokalupo 7:9, 10) Ka akaari te katoatoa i te enua nei i te aroa no te Atua e to ratou tangata tupu, e ka angaanga taokotai kia akatupu i te akakoroanga mua o te Atua no te enua.​—Salamo 115:16.

Me tutara te Patireia o te Atua ki rungao i te enua, ka akaaere Tei Anga i te reva e te ao rangi ma te tu tau tikai. (Salamo 24:1, 2) Ia Iesu i runga i te enua nei, kua akaari aia i te mana no ko mai i te Atua, te akamaruanga aia i tetai uriia kino tikai. (Mareko 4:39, 41) I raro i te tutaraanga a Iesu, kare te tangata e mataku akaou i te au tumatetenga natura. Ka akameitaki akaou te Patireia o te Atua i te turanga o te ao rangi kia tau meitaki no te tangata.—Hosea 2:18.

Ka rekareka te katoatoa i te oraanga apa kore. Kare te tangata e maki, e ruaine, e mate akaou. (Isaia 35:5, 6) Ka mareka te tangata i tetai ao ruperupe e te akaieie mei ta te nga tokorua i kite i roto i te kainga i Edene. I roto i te ao ou, ka maviriviri te ua rakau e manganui e ka maata te kai na te katoatoa. (Genese 2:9) Mei te ngati Iseraela i taito, pouroa te tangata i roto i te Parataito, ka “kai oki [ratou] i ta [ratou] kai ma te maata.”​—Levitiku 26:4, 5.

I raro i te kavamani a te Atua, ka mataora te katoatoa i te oraanga ‘au e ka akono meitaki ratou i tetai e tetai. Kare e tupu te tamaki, kare e tutaraanga kino, e ka rauka te au mea tei anoanoia. Karanga te Pipiria: “E noo ra ratou ravarai ki raro ake i tana uaorai vine, e ki raro ake i tana uaorai suke, e kare tetai e akamataku mai.”​—Mika 4:3, 4.

E ngutuare to te katoatoa e kare rava ratou e akaateaia, pouroa te angaanga ta tatou ka rave, ka riro ei mea mataora. Karanga te Pipiria no te aronga te ka noo i roto i te ao ou o te Atua, “Kare ratou e angaanga puapinga kore ua.”​—Isaia 65:21-23.

Taputou te Pipiria: “Ka ki te enua i te kite ia Iehova.” (Isaia 11:9) Ka rauka i te au tangata i roto i te ao ou kia apiiia mei te kite oonu o Tei Anga, ko Iehova, e no runga i te au mea umere tana i anga. Kare ratou e taangaanga i to ratou kite kia maani i te au apinga te ka tamate me kore ka tamamae i te tangata. (Isaia 2:4) Mari ra, ka apii ratou akapeea me noo ‘au ua ki tetai e tetai e te akono i te enua.​—Salamo 37:11.

Kua akapapa meitaki te Atua i te enua kia mataora te oraanga o te tangata. Inangaro aia kia ora te tangata e tuatau ua atu. (Salamo 37:29; Isaia 45:18) Kia akatupu i tana akakoroanga mua, ka “akakore rava [te Atua] i te mate e tuatau ua atu.” (Isaia 25:8) Taputou te Pipiria, ka “kore rava te mate, e te aue, e te mii; e te mamae oki, e kore katoa ïa.” (Apokalupo 21:4) Ka oronga te Atua ki te tangata pouroa​—te aronga tana ka akaora, me takore aia i teia ao kino, e te mirioni ua atu tangata te ka akatuia mai i roto i te ao​—te tikaanga kia ora e tuatau ua atu.​—Ioane 5:28, 29; Angaanga 24:15.

 E mirioni ua atu tangata takapini i te ao e akapapa nei no te ao ou e vaitata maira. Noatu te tu apa, te tauta nei ratou kia riro mai ei au tangata ta te Atua ka inangaro i roto i tona ao ou. Akapeea? Na te apii anga no runga i te Atua, ko Iehova, e tana i tono mai, ko Iesu Mesia.​—Ioane 17:3.

Kia kite maata atu akapeea me ora atu i te openga o teia ao, e kia tae ki roto i te ao ou e vaitata maira. E āriki i tetai uriurianga Apii Pipiria ki te Au Kite o Iehova, kare e tutaki, i roto i te puka Oraanga Mataora e Tuatau Ua Atu!