Панда хари, кеда е Девлескири небесно влада ка владинел упро са о мануша, и Пхув ка овел јекх шужо тхан коте со сарине ка овен бахтале, ка живинен ко јекхипе хем ка керен бути која со ка керел лен бахтале. О Девел чхивѓа е Исусе те владинел упри цело пхув. Авдиве бут владетелија на грижинена пе чаче е манушенге. Ама, о Исус нане асавко, ов секогаш ка керел адава сој тано најшукар е манушенге. Ов ка владинел мангипаја, ка овел љубезно, милостиво хем праведно Цари (Исаија 11:4).

Ко нево свето о мануша нане те овен одвојме спрема националност или потекло, него ка овен ко јекхипе (Откровение 7:9, 10). Са о мануша со ка живинен ки Пхув ка манген е Девле хем пле пашутнен, хем ола заедно ко мир ка керен бути те шај те исполнинел пе е Девлескири намера е Пхувјаја со сине ко почеток (Псалм 115:16).

Кеда ка владинел е Девлескоро Царство, амаро Створители ка грижинел пе те овел амен стабилно клима хем те на овен више природна катастрофе (Псалм 24:1, 2). Кеда о Исус сине ки Пхув, смиринѓа јекх бари бура хем аѓаар сикавѓа кобор бари моќ денѓа ле о Девел (Марко 4:39, 41). Кеда ка владинел о Исус нане те дара кај ка овен природна катастрофе. Ко е Девлескоро Царство ка ова ко мир е животненцар хем никој нане те уништинел више амари Пхув (Осија 2:18).

Саринен ка овел совршено састипе. Никој нане те насваљовел, те пхујрол или те мерел (Исаија 35:5, 6). О мануша ка живинен ки чисто хем шужи Пхув сар ки Еденско градина, коте со живинѓе о Адам хем и Ева. Ко нево свето, исто сар ко Еден, и Пхув ка бијанел бут хајбаске хем са е манушен ка овел лен доволно хајбаске (1. Мојсеева 2:9). Исто сар о Израелција ко пурано време, кола со сине е Девлескоро народо, аѓаар сарине ко рај ка хан „маро џикоте на чаљовена“ (3. Мојсеева 26:4, 5).

Ко е Девлескоро Царство о мануша ка уживинен ко мир, ка овен чесна хем љубезна машкар песте. Нане те овен више војне, никој нане те злоупотребинел пли моќ хем никој нане те мучинел пе те шај те овен ле о буќа со ваљани леске. И Библија ветинела: „Секова јекх ка бешел тели пли дракх хем тели пли смоква хем нијекх нане те даравел лен“ (Михеј 4:3, 4).

Секоле фамилија ка овел ла пло кхер хем нане те дарал кај ка нашавел ле. Исто аѓаар, секоја бути со ка керен о мануша ка анел ленге бахталипе. И Библија вакерела кај са окола со ка живинен ко е Девлескоро нево свето „нане те керен бути џабе“ (Исаија 65:21-23).

И Библија ветинела: „И пхув ка овел пхерди пенџарибаја башо Јехова“ (Исаија 11:9). О мануша со ка живинен ко нево свето ка сикљовен тари бари мудрост пумаре Створителескири, е Јеховаскири, хем ка сикљовен башо са о шуже буќа со створинѓа лен. Ола нане те користинен пло знаење те керен оружје или те поврединен е јавере манушен (Исаија 2:4). Наместо адава, ола ка сикљовен сар те живинен ко мир е јавере манушенцар хем сар те грижинен пе баши Пхув (Псалм 37:11).

О Девел мангипаја керѓа и Пхув те шај амен те уживина ки лате секова диве. Лескири намера сине о мануша те живинен ки Пхув засекогаш (Псалм 37:29; Исаија 45:18).Те шај те исполнинел пли намера, о Девел, „ка уништинел о мерибе засекогаш“ (Исаија 25:8). И Библија вакерела: „Мерибе нане те овел више, ни жалибе, ни ројбе, ни дукха“ (Откровение 21:4). О Девел са е манушенге — околенге со ка преживинен о крајо акале лошно светоскоро хем околенге со ка воскреснинен ко нево свето — ка дел прилика те живинен вечно (Јован 5:28, 29; Дела 24:15).

 Милиоња мануша панда акана спреминена пе те живинен ко е Девлескоро нево свето кова сој тано бут паше. Иако тане несовршена, ола панда акана трудинена пе те овен мануша сар со мангела о Девел те живинен ко рај. Сар керена адава? Аѓаар со сикљовена башо Јехова о Девел хем башо лескоро чхаво, о Исус Христос (Јован 17:3).

Дознајн повише сар шај те преживине о крајо таро акава свето хем те живине ко јекх пошукар свето со ка авел панда хари. Ако мангеа шај те овел тут бесплатно библиско курси е Јеховаскере сведоконцар, аѓаар со ка користине о лил Ов бахтало засекогаш.