Фартэ ӥто лэ Дэвлэско Царство авэла тэ правий па нэбо всаворэ манушэнца. Тоди пэ ԥув авэла райкани жызня. И мануша авэна ек еқэса дружни и лэнди авэла тэ чалёл тэ терэн и дила. О Дэл стодя лэ Иисус Христос тэ правий всаворя ԥувьяса. О Иисусо на авэла кацаво, сар адесутнэ правителёря. Во всегда авэла тэ терэл кадя, кай тэ авэл драго кодэлэнди, ко жувэла тала лэстири правления. Андэ лэстири правления авэла тэ дицол любовь каринг и мануша и каринг о Дэл. Во авэла одяло, добро и справедливо Царё (Исаия 11:4).

Андо раё пэ ԥув и мануша на авэна тэ разделинпэ па нацыя или инке пэ авэр признакоря. Вся о миро авэла, сар ек народо (Откровение 7:9, 10). Всаворэ мануша авэна тэ любин лэ Дэвлэс и ек еқэс. И всаворэ вонэ лэна тэ терэн кода, со приԥэндя лэнди о Дэл, лэна тэ заботинпэ пала вся и ԥув, сар пала пэско цэр (Псалом 115:16).

Кала авэла тэ правий лэ Дэвлэско Царство, о Дэл полностью авэла тэ контролирует и поӷода (Псалом 24:1, 2). Еқварэс о Иисус Христос уля фартэ бари балвал. Важ лэстэ када на сас ԥарэс тэ стерэл. Кадя во сыкадя, саво дэ баро зор дя лэсти о Дэл (Марка 4:39, 41). Тала лэ Иисусостири правления нико на авэла тэ дарал кодэлэстар, кай авэла бида андэ природа. Лэ Дэвлэско Царство стерэла кадя, кай и мануша на авэна тэ даран лэ жывотнонэндар и на лэна тэ римон и природа (Осия 2:18).

Кай кажно мануш авэла лашо зор. Нико на авэла тэ насвавэл, тэ ԥурёл и тэ мэрэл (Исаия 35:5, 6). Сар о Адамо и Ева жувэнас андэ шукарно Эдэмско садо, кадяжэ и мануша лэна тэ жувэн пэ ԥув, сави авэла тэ шолпэ по Эдэмско садо. Сар андо Эдэмо, кадя жэ и андо раё пэ ԥув, авэна тэ барён бут лашэ плодоря и када авэла тэ хутилэл важ всаворэ мануша, савэ жувэн пэр латэ (Бытие 2:9). Сар и израильтяноря, савэ сас андэ дэлмутни время, лэ Дэвлэско народо, всаворэ мануша андо раё пэ ԥув, лэна тэ хан о марно и никала на авэна боқалэ (Левит 26:4, 5).

Кала всаворя ԥувьяса авэла тэ правий лэ Дэвлэско Царство, и мануша авэна тэ жувэн дружно, тэ обжанпэ ек еқэса справедливо и по доброму. Будэр на авэна войны. И на авэла кацаво, кай нэправильно тэ используют пэстири власть. Лэ манушэнди на трэбуй авэла тэ пристон кадя бут зор, кай тэ домардёнпэ кода, со трэбуй важ и жызня. Андэ Библия пистромэ: «Кажно андар лэндэ бэшэла тала пэстири винаӷрадно витка и тала пэско инжыро И нико на даравэла лэн» (Михей 4:3, 4).

Кай кажно ери авэла пэско цэр. И мануша на лэна тэ даран, кай вся када вонэ хасарэна. И дила, сави вонэ авэна тэ терэн, всегда авэла лэнди тэ чалёл. Андэ Библия ԥэнэнпэ, кай кодэла, ко авэна тэ жувэн андо раё пэ ԥув, «на лэна тэ терэн бути евья» (Исаия 65:21—23).

Андэ Библия пистромэ, кай пала Иегова «уӷанэна па вся и ԥув» (Исаия 11:9). И мануша па вся и ԥув авэна тэ сытён кай о Дэл Иегова, савэстэ само бари мудрость. Кадяжэ вонэ авэна тэ уӷанэн пала кода, со во создал андэ люма. Кода, со вонэ авэна тэ ӷанэн, вонэ на авэна тэ используют, кай тэ терэн оружыя и кай тэ терэн вэрыто аврэ манушэнди (Исаия 2:4). Всаворэ мануша авэна тэ сытён и тэ гиндон пала кода, кай тэ ладин ек еқэса и тэ заботинпэ пала амари ԥув (Псалом 37:11).

О Дэл стодя бут зор и стердя амари ԥув с любовью, кай амэ кажно дес тэ лошавас ла жызняса. Во камэл, кай и мануша тэ жувэн пэ ԥув вечно и тэ на мэрэн (Псалом 37:29; Исаия 45:18). Важ када о Дэл навсегда улэла и смэрть (Исаия 25:8). Андэ Библия пистромэ: «Смэрть будэр на авэла, нисави бида, ни дук будэр на авэла» (Откровение 21:4). Пэ ԥув авэна тэ жувэн най кати кодэла, ко пэрэжудя о Армагеддоно, но и кодэла, ко ринапэ каринг и жызня. О Иегова дэла лэнди кучутно подарко. Када вечно жызня (Иоанна 5:28, 29; Деяния 24:15).

 Ужэ акана миллионоря мануша па вся и ԥув ӷотовяца, кай тэ жувэн тала лэ Дэвлэстири правления. Хоть вонэ ашэнпэ нэсовершэни, вонэ старыинпэ тэ ашэн кацавэ манушэнца, савэн о Дэл камэла тэ диқэл андо раё пэ ԥув. Важ када вонэ уӷанэн пала Дэл Иегова и пала лэско Шаво о Иисус Христос (Иоанна 17:3).

Уӷан пала кода, сар тэ пэрэжувэс конец лэ найлашимасти андэ люма и тэ жувэс андо раё пэ ԥув, саво фартэ ӥто авэла. Манг лэ Иеговастирэ свидетелёнэн пала бесплатно библейско курсо, саво прожал па книжка «Жувэн вечно пэ бахтатэ!».