Vona Misava Leyimpshwa Ya Paradeyisi, Leyi Nga Kusuhi!
Xikwembu Nkulukumba a vumbe misava akuva vhanu va hanya ka yone hi la ku nga helikiki. (Amapsalma 37:29) A beke vatekani va ku sungula, Adamu na Evha, a xizrambeni lexi xongiki xa le Edeni. A nyike vone ni vanavu wutiyanguleli bya ku dzrima ni ku hlayisa misava.—Genesis 1:28; 2:15.
Misava leyi yi hambane ngopfu ni Paradeyisi ledzri Xikwembu Nkulukumba a a dzri djula. Kambe Xikwembu Nkulukumba a nga tsrhikanga nkongometo lowu a a li na wone hi misava. A ta wu hetisisa hi ndlela yini? Ka tinhlokomhaka leti khalutiki hi swi vonile leswaku Xikwembu Nkulukumba a nga ti helisa misava leyi hi yi kandzretelaka. A matsrhan’wini ya leswo, a ta pfumelela leswaku vhanu lava dumbekaka va tsrhama ka yone. Loko Xikwembu Nkulukumba a hetisisa swidumbiso swake, xana wutomi la misaveni byi ta tsrhama hi ndlela yini?
Ku ta va ni mfumu wun’we a misaveni hinkwayu
Ku nga li khale, Mfumu lowumpsha wa Xikwembu Nkulukumba lowu nga matilweni wu ta fuma misava hinkwayu. Loko leswo swi yentxeka, a misava leyi yi ta ndzruluka mbangu lowu vhanu va taka hanya na vani wumun’we va tlhela va nyonxa. Masiku hinkwawu vhanu va ta va ni mintxhumu leyimpswha, leyi nyonxisaka ku yi yentxa. Xikwembu Nkulukumba a hlawule Yesu Kriste akuva a fuma misava. Ku hambana ni vafumi lava nga kone namunhla, Yesu minkama hinkwayu a ta yentxela vhanu leswi nga swinene. Mfumu wake wu ta tiseketela hi lizrandzru nakone yene a ta va Hosi leyi nga ni wunene, timpswalu ni ku lulama.—Ezaya 11:4.
Vhanu va misava hinkwayu va ta hanya hi ntwananu
Vhanu lava taka hanya a misaveni leyimpswha ya Xikwembu Nkulukumba va nga ha ti hambanisiwa hi ku ya hi lixaka kumbe lidzrimi dzravu. Hinkwavu va ta va tiko dzrin’we. (Apfuletelo 7:9, 10) Vhanu hinkwavu a misaveni va ta zrandzra Xikwembu Nkulukumba va tlhela va zrandzrana. Hinkwavu va ta tizrisana hi ku zrula akuva ku yentxeka ku zrandzra ka Xikwembu Nkulukumba. Xileswo misava hinkwayu yi ta ndzruluka Paradeyisi—Amapsalma 115:16.
Ku nga ha ti va na timhangu ta ntumbuluku
Loko Mfumu wa Xikwembu Nkulukumba wu ta fuma misava, Mutumbuluxi a nga ti pfumelela ku txintxatxintxa ka maxela ku hona misava. (Amapsalma 24:1, 2) Khambi dzrimbeni, Yesu a miyete xidzedze lexikulu, a kombisa leswi a swi kotaka ku swi yentxa hi ku tizrisa ntamu lowu Xikwembu Nkulukumba a mu nyikiki wone. (Marka 4:39, 41) A hansi ka Mfumu wa Yesu, a nga kone lweyi a taka txhava timhangu ta ntumbuluku. Loko Mfumu wa Xikwembu Nkulukumba wu ta fuma misava, vhanu va ta hanya hi ku zrula ni ntumbuluku—Hošea 2:18.
Ku nga ha ti va na mavabyi nambi ndlala
Hinkwavu va ta va vatomi hi ku hetiseka. Ku nga ha ti vabya mhunu, kumbe ku duhwala, nambi ku fa. (Ezaya 35:5, 6) Hinkwavu vhanu va ta hanya ka mbangu lowu basiki wu tlhela wu xonga, wa ku fana ni lowu vatekani va ku sungula a va hanya ka wone, ku nga xizrambeni xa Edeni. A misaveni leyimpswha, masimu ma ta bindzrula swakuda swa swinyingi nakone a nga kone lweyi a taka va ni ndlala. (Genesis 2:9) Ku fana ni leswi yentxekeliki vhanu va Xikwembu Nkulukumba a nkameni lowu khalutiki, vhanu hinkwavu a Paradeyisini ‘va ta da . . . va xuzra’.—Levitika 26:4, 5.
Ku ta va ni ku zrula ka ntiyiso ni nsizrelelo
Loko Mfumu wa Xikwembu Nkulukumba wu ta fuma misava, vhanu hinkwavu va ta hanya hi ku zrula va tlhela va khomana hi ndlela ya lizrandzru. A ku nga ha ti va na tiyimpi nambi ku tizrisiwa ka wuhosi hi ndlela leyi ngeke yinene. Handle ka leswo, hinkwavu va ta va ni leswi va swi vilelaka. Bibele dzri dumbisa leswi: ‘A ta tsrhama mun’wana ni mun’wana hansi ka mvhinya wakwe, ni le hansi ka nkuwa wakwe; a nga ve kone lwa taka va txhavisa.’—Mika 4:3, 4.
Hinkwavu va ta va ni miti ni mintizro leyinene
Ndangu wun’wana ni wun’wana wu ta va ni muti wa wone na wu nga txhavi ku txhuka wu hlongoliwa. Nakone ntizro wun’wana ni wun’wana lowu hi taka wu yentxa wu ta nyonxisa. Bibele dzri hlaya leswaku lava taka hanya a misaveni leyimpswha ya Xikwembu Nkulukumba ‘va nga ka va nga tikazrateli mahala’.—Ezaya 65:21-23.
Hinkwavu va ta kuma dondzro leyinene
Bibele dzri dumbisa leswi: ‘Misava mi ta tala hi ku tiva Yehovha.’ (Ezaya 11:9) Lava taka hanya hansi ka Mfumu wa Xikwembu Nkulukumba va ta dondzra mayelanu ni wutlhazri lebyikulubya Mutumbuluxi wavu, Yehovha. Va ta tlhela va dondzra mayelanu ni mintxhumu ya ku xonga leyi a yi tumbuluxiki. Va nga ti tizrisa wutivi byavu akuva va hamba matlhazri kumbe akuva va vavisa van’wana. (Ezaya 2:4) Amatsrhan’wini ya leswo, va ta dondzra ku hanyisana hi ku zrula, va bekisa misava.—Amapsalma 37:11.
Vhanu va ta hanya hi la ku nga helikiki
Xikwembu Nkulukumba a lulamisele misava hi lizrandzru ledzrikulu, akuva hi ta hanya na hi nyonxile masiku hinkwawu. A djula leswaku vhanu va hanya hi la ku nga helikiki la misaveni. (Amapsalma 37:29; Ezaya 45:18) Akuva leswo swi koteka, Xikwembu Nkulukumba a ta ‘suvisa lifu hi la ku nga helikiki’. (Ezaya 25:8) Bibele dzri dumbisa leswaku ku fa ku nga ha ti va kone, nambi ‘nkosi, ni ku bongosa, ni ku vaviseka’. (Apfuletelo 21:4) Lava taka huluka loko ku helisiwa misava leya ku biha ni lava taka pfuxeliwa a misaveni leyimpswha ya Xikwembu Nkulukumba va ta va ni ndjombo ya ku hanya hi la ku nga helikiki.—Yohan 5:28, 29; Amintiṛo 24:15.
Swoswi magidigidi ya vhanu a misaveni hinkwayu va le ku tilulamiseleni akuva va ta hanya hansi ka Mfumu wa Xikwembu Nkulukumba lowu nga kusuhi swinene. Nambi leswi va nga hetisekangakiki, va dzringisa ku va muxaka wa vhanu lava Xikwembu Nkulukumba a va djulaka a misaveni yakwe leyimpswha. Va swi yentxisa kuyini? Va dondzra ha Yehovha Xikwembu Nkulukumba na Yesu Kriste, lweyi a mu zrumiki.—Yohan 17:3.
Dondzra leswi u faneliki ku swi yentxa akuva u kota ku huluka loko misava leyi yi helisiwa u va u hanya a misaveni leyimpswha ya Xikwembu Nkulukumba leyi nga kusuhi. Dondzra Bibele hi mahala ni mun’we wa Timboni ta Yehovha kumbe u kombela xidondzro ka jw.org.
You May Also Like
XIHONDZRO XA KU ZRINDZRA
I Yini Leswi Mfumu Wa Xikwembu Nkulukumba Wu Taka Swi Yentxa?
Yesu a a swi tiva leswaku i Mfumu wa Xikwembu Nkulukumba ntsena lowu wu nga lulamisaka swikazratu swa vhanu a misaveni. I yini leswi Mfumu lowu wu swi yentxiki akuva wu hi tiyisekisa?
