Di njunjun goonliba dë a pasi ta ko!
Gadu mbei di goonliba u bunuhati sëmbë sa libi nëën u teego (Psalöm 37:29). A bi buta di fosu womi ku di fosu mujëë, Adam ku Eva a wan hanse djai de kai Eden, nöö a bi da de ku dee bakamii u de di wooko u de sa ta seeka di goonliba, söseei u de sa ta luku dee mbeti.—Kenesesi 1:28; 2:15.
Wë di goonliba di u ta libi nëën tide, an dë di waiti kamian di Gadu bi abi a pakisei. Ma tökuseei Gadu an tooka pakisei. Unfa Gadu o du seti soni ko bunu baka kumafa a bi abi a pakisei? Kumafa u bi si a di woto di pasa, nöö Gadu an o booko di goonliba seei. A o mbei dee sëmbë dee ta piki hën buka, libi nëën. Unfa soni o dë a goonliba aki, te dee soni dee Gadu paamusi u pasa tuutuu?
Wan kodo tii da hii di goonliba
Abiti möön te Gadu o mbei di tii fëën a libi ala tii hii libisëmbë a goonliba aki, nöö sëmbë o ta libi waiwai makandi a goonliba aki, söseei de o ta du wooko di o ta mbei de fii bunu. Gadu buta Jesosi Keesitu faa tii hii di goonliba. A di ten aki sömëni tiima an ta booko de hedi ku sëmbë. Ma Jesosi hën a tooka, u di hii juu a o ta du bunu da libisëmbë. A o ta tii ku lobi, a o abi bunu fasi, a o abi tjalihati u sëmbë, söseei a o dë wan Könu di ta kuutu soni a wan leti fasi.—Jesaaja 11:4.
Sëmbë u hii së u goonliba o ta libi fiifii makandi
Köndë ku lö an o paati dee sëmbë dee o ta libi a di njunjun goonliba di o ko. Libisëmbë o ta libi fiifii ku deseei (Akoalimbo 7:9, 10). Hii sëmbë a goonliba o lobi Gadu, söseei de o lobi de na de. De o ta wooko makandi u de du dee soni dee Gadu abi a pakisei da di goonliba.—Psalöm 115:16.
Soni kuma gaan wata nasö gaan ventu an o ta ko booko kamian möön
Te di Könuköndë u Gadu o tii, nöö a o tapa gaan wata, nasö gaan ventu u de an ko booko kamian möön (Psalöm 24:1, 2). Di Jesosi bi dë a goonliba aki, a bi tapa gaan ventu ku gaan wata, nöö a sö wan fasi a bi lei andi a sa du ku di kaakiti di Gadu dëën (Maikusi 4:39, 41). Te Keesitu o tii, an o dë u sëmbë ta fëëë möön taa gaan wata, gaan ventu, nasö woto soni o ko booko kamian kii sëmbë möön. Te di Könuköndë u Gadu o tii, nöö u ku dee mbeti o ta libi fiifii, söseei wa o du soni u poi di goonliba möön.—Hosea 2:18.
Sëmbë o ta dë gösöntu, nöö de o abi soni u njan te a hia
Hii sëmbë o abi wan bunu gösöntu. Na wan sëmbë o ta suwaki möön, na wan sëmbë o ta gaandi möön, söseei na wan sëmbë o ta dëdë möön (Jesaaja 35:5, 6). Sëmbë o ta piizii u di de o sa libi a wan waiti kamian di dë limbolimbo. De o feni di soni di di fosu womi ku di fosu mujëë bi lasi a di djai u Eden. Leti kumafa soni bi dë a di djai u Eden, sö nöö a di njunjun goonliba soni u njan o dë te a hia. Hii sëmbë a goonliba o ta feni soni u njan te a hia (Kenesesi 2:9). Hii sëmbë a di njunjun goonliba di Gadu o seti o ta njan ’bëëë u te bëë u de fuu’, kumafa soni bi dë da dee Isaëli sëmbë fu awooten.—Leifitiki 26:4, 5.
Bööböö libi o dë
A di njunjun goonliba di Gadu o seti, hii sëmbë o ta libi fiifii ku deseei, söseei de o ta libi bunu ku deseei. Feti an o dë möön, sëmbë di abi taki a wotowan liba an o ta libi hogi ku wotowan möön, söseei an o dë u sëmbë ta tja sitaafu u de feni dee soni di de abi fanöudu. Di Bëibel ta piki u taa: „Hiniwan sëmbë o sindo nëën doloifi pau basu, söseei nëën figa pau basu. Na wan sëmbë o mbei de ta dë pantapanta, u di Jehovah, di Gadu di ta tii hii soni, hën taki sö.”—Mika 4:3, 4.
Woo abi hanse kamian ta libi, söseei woo ta du wooko di ta da u piizii
Hii sëmbë o abi wan tan kamian, nöö de an o ta fëëë taa de o lasi ën, söseei woo ta feni wini u hii dee wooko dee u ta du. Di Bëibel ta piki u taa dee sëmbë dee o libi a di njunjun goonliba di Gadu o seti, „an o wooko taanga u sösö”.—Jesaaja 65:21-23.
Woo feni di möön bunu lei
Di Bëibel ta piki u taa: „Hii di goonliba o fuu ku di lei u Jehovah” (Jesaaja 11:9). Dee sëmbë dee o libi a di njunjun goonliba o lei soni u di gaan köni di Jehovah abi, söseei de o ko sabi soni u dee waiti soni di a mbei. De an o wooko ku di köni u de u mbei feti lai u kii wotowan (Jesaaja 2:4). Ma de o lei unfa de musu ta libi fiifii ku deseei, söseei de o lei unfa de musu luku di goonliba.—Psalöm 37:11.
Woo feni teego libi
Gadu tei ten seeka di goonliba a sö wan fasi taa u sa ta piizii u di libi hiniwan daka. A kë taa libisëmbë musu libi u teego a goonliba aki (Psalöm 37:29; Jesaaja 45:18). U mbei dee soni aki ko pasa tuutuu, mbei Gadu o „guli dëdë u teego” (Jesaaja 25:8). Di Bëibel ta piki u taa: „Dëdë ku tjali ku kusumi an o dë a de dendu möön” (Akoalimbo 21:4). Hii dee sëmbë dee Gadu o tjubi te a poi di hogi goonliba aki, ku dee sëmbë dee a o weki ko a libi baka tuu a o da pasi u de sa libi u teego a di njunjun goonliba di a o seti.—Johanisi 5:28, 29; Tjabukama 24:15.
Nöunöu kaa milionmilion sëmbë ta seeka deseei u de sa libi a di Könuköndë u Gadu basu, di dë a pasi ta ko. Hii fa dee sëmbë aki dë zöndu libisëmbë, tökuseei de ta mbei möiti nöunöu kaa u de ko dë di pei sëmbë di Gadu kë u libi a di njunjun goonliba. Wë unfa de ta du di soni aki? Wë u di de ta lei soni u Jehovah ku Jesosi Keesitu.—Johanisi 17:3.
Ko sabi andi i musu du fii sa pasa di kaba u di goonliba aki, sö taa i sa libi a wan möön bunu goonliba di dë a pasi ta ko. I sa mbei wan Jehovah Kotoigi lei i soni u Bëibel söndö paka ku di buku I sa dë waiwai u teego!
Kandë i lobi dee woto aki tu
DI HEI WAKITIMAWOSU
Andi di Könuköndë u Gadu o du?
Jesosi bi sabi taa di Könuköndë u Gadu wanwan sa puu dee fuka u libisëmbë. Andi di Könuköndë du kaa, di ta mbei u dë seiki taa a o du dee soni dee a paamusi u?
