Tar u He u Paradiso U Se Zurum a U La!
Aôndo yange gba tar ér uumace mba perapera ve lu sha u gbem sha won. (Pasalmi 37:29) Yange ver orumace u hiihii la vea kwase na, ka Adam man Ifa je la, ken sule u doonashe, i yilan u ér Eden. Shi na ve tom ér ve sôron sule shon shi ve kuran u kpaa.—Genese 1:28; 2:15.
Tar u hegen ne ngu kposo a Paradiso u Aôndo yange wa ishima ér u lu la. Nahan kpa, Aôndo gema awashima na ga. Kpa Aôndo una gema tar ne ua hingir paradiso nena? Er ngeren mba ken ijime mbara ve tese nahan, Aôndo una nande tar u se tem sha u ne ga. Kpa, una de uumace mba civir un sha mimi vea lu sha u. Aôndo una eren akaa a a tôndo zwa u eren la cii yô, tar ua lu nena?
Tar cii ua lu sha ikyev i gomoti môm
Tartor u Aôndo ua va hiin u hemen uumace cii yô, tar cii ua hingir ijiir i saan iyol. Ior mba vea lu sha u cii vea luun imôngo shi vea eren kwagh ken mzough, shi vea eren tom u injaa u saan ve iyol. Man ica ia gba ga je tsô kwagh ne una er. Aôndo tsua Yesu Kristu ér a hemen tar cii. Nyian ne, mbahemenev mba tar ne kpishi mba we ior ikyo ga. Yesu ngu kposo a ve, sha ci u un yô, hanma shighe una eren kwagh u hemba doon sha ci u ior. Hemen na la una har sha dooshima, nahan una lu Tor u eren kwagh a ior kundu kundu man sha mimi, shi zungwen ve mhôônom.—Yesaia 11:4.
Ior mba sha tar cii vea eren kwagh ken mzough
Ken tar u he la, uumace vea kera pav ker ityar wue wue shin akuraior kposo kposo ga. Ior cii vea lu gungur môm. (Mpase 7:9, 10) Uumace mba sha tar cii, Aôndo una doo ve ishima kua mbawan ndor a ve. Shi vea lu eren tom u sôron ya ve, ka tar je la, ken mzough man ken bem; tom shon u Aôndo yange wa ishima sha hiihii je ér uumace ve eren la.—Pasalmi 115:16.
Se lu ken bem vea annyamev shi akaa a vihin ijiir aa kera lu ga
Shighe u Tartor u Aôndo ua lu hemen tar la, Aôndo ua gbe akaa cii la una na akaa a vihin ajiir, er mtenger u tar man ura u vihin akaa kua mngerem ma saren avenge nahan cii, aa kera lu ga. (Pasalmi 24:1, 2) Shighe u Yesu lu shin tar la, a venda kwagh a ahumbe man zegemnger, maa huan ving. Nahan a tese kwagh u una fatyô u eren sha tahav mbu Aôndo yô. (Marku 4:39, 41) Shighe u Kristu una lu hemen la, akaa a vihin ajiir aa kera lu ga, nahan or môm nana kera lu a mciem sha kwagh u a ga. Shi shighe u Tartor u Aôndo ua lu hemen tar la, se lu ken bem vea annyamev shi mayange or a kera er kwagh u vihin ijiir ga.—Hosea 2:18.
Ior cii vea lu gbong gbong gbem sha won shi kwaghyan una lu kpishi
Hanma or nana lu gbong gbong gbem sha won. Or môm kpa nana gbaan angev ga, shi ior vea been iyol ga shi vea kpeen kpaa ga. (Yesaia 35:5, 6) Ior vea lu sha ajiir a doonashe, a lun wang, er ijiir i orumace u hiihii la vea kwase na yange ve lu her ken sule u Eden la nahan. Ken tar u he la, inya ia doo, nahan kwaghyan una ngee, er ken sule u Eden nahan. Hanma or sha tar nana lu a kwaghyan kpishi. (Genese 2:9) Hanma or ken Paradiso nana ‘yaan kwaghyan a kuman nan,’ er ikyurior i Iserael i sha ayange a tsuaa la nahan.—Levitiku 26:4, 5.
Bem una gba, zayol môm una kera lu ga
Shighe u gomoti u Aôndo una lu hemen tar cii la, ior vea tema bem bem shi vea eren kwagh a hanma or kundu kundu man sha mimi. Ityav mbia lu ga, or a kera lu a tahav mbu nzughul a ior ga, shi ior cii vea zuan a akaa a kwagh a gbe ve a mi cii a iyol nyoon shio. Bibilo kaa ér: “Hanmô ve nana tema shin itine i kon u wain u nan, man shin itine i kon u tur u nan, ma or nana kera ta ve mciem iyol ga.”—Mika 4:3, 4.
Hanma or nana lu a ijiir i tsan i dedoo kua tom u injaa
Hanma tsombor ua lu a ya, shi ishima ia nyian or ér ya shon una va hingir u orgen ga. Shi ityom i se lu eren shighe la cii, se zuan a injar i dedoo sha mi kpishi. Mba vea lu ken tar u he u Aôndo a tôndo zwa a vese la cii, ‘vea kera eren tom u gbilinigh’ shin u saan ishe ga.—Yesaia 65:21-23.
Ityesen i hemban doon cii
Bibilo kaa ér: “Tar ua mgbough a mfe u TER.” (Yesaia 11:9) Uumace mba Tartor u Aôndo ua lu hemen ve la cii vea lu henen kwaghfan u lun a ikighir shio, u Yehova Aôndo u a gbe ve la, shi tôvon sha akaa a doonashe a a gbe la cii. Vea kera eren kwagh a mfe ve sha u varen ikyav mbi numuv shin akaa a vihin uumace mbagenev iyol ga. (Yesaia 2:4) Kpa vea hen u lun ken bem vea mbagenev man u nengen sha tar shin sôron u.—Pasalmi 37:11.
Uma u tsôron
Aôndo yange tôô shighe gba tar tsembelee sha er se fatyô u lun sha u shi a saan se iyol hanma iyange yô. Yange lu a awashima ér uumace ve lu sha tar gbem sha won. (Pasalmi 37:29; Yesaia 45:18) Nahan, Aôndo “Una tim ku sha won kera,” sha er una kure awashima na ne yô. (Yesaia 25:8) Bibilo kaa ér: “Ku ua kera lu ga, ijungwen kpa ia kera lu ga, mliam kpa ma a kera lu ga, shi mnyoon kpa una kera lu ga.” (Mpase 21:4) Aôndo una na uumace cii, mba una yima ve shighe u una lu timin mbaaferev sha tar kera la, kua mbakpenev mba i fe iyenge ve ga, mba una va nder ve shin ku ken tar u he la ian i lun uma gbem sha won.—Yohane 5:28, 29; Aerenakaa 24:15.
Hegen je kpa, ior umiliôn imôngo mba wan ago iyol sha er vea fatyô u lun sha ikyev i Tartor u Aôndo u u zurum u van la yô. Shin er ve lu a mbamshi nahan kpa, mba nôngon ér vea lu ior mba Aôndo una soo ér ve lu ken tar u he la yô. Mba nôngon nena? Mba henen kwagh u Yehova Aôndo kua un u yange tindi la, ka Yesu Kristu je la.—Yohane 17:3.
Seer fan kwagh u u er ve u fatyô u va waren mkurtar, nahan lun ken tar u hemban doon u u zurum u van la yô. Na Orshiada u Yehova ian nana hen Bibilo a we gbilin ken takeda u U Fatyô u Lun Uma Gbem sha Won shi a Saan We Iyol! la, nahan nenge kwagh u Bibilo i ôr yô.
Kwagh Ugen u Alaghga Shi Una Doo U Yô
IYOUKURA
Ka Nyi Tartor u Aôndo Ua Va Ere?
Yesu yange fa je ér ka Tartor u Aôndo tseegh u lu gomoti u una bee a mbamzeyol mba shin tar ne kera ye. Ka nyi Tartor la u vande eren sha u nan se vangertiôr?
IYOUKURA
Tartor u Aôndo
Akaa ataratar a sha kwagh u Tartor la tese ér mayange je ua a anyighe ga.
