Keem’edja, etena kayotatɛ nɔmbɔla lowandji ɔtɔi laki Nzambi l’oma l’olongo anto tshɛ, nkɛtɛ k’otondo kayonga dihole dia ɔngɛnɔngɛnɔ lɛnɛ ayokoka anto mbidjasɛ kaamɛ wa nsala kɛnɛ kele ɔlɔlɔ ndo wangɛnangɛna l’olimu awɔ. Nzambi akasɔnɛ Yeso Kristo dia mbolɛ nkɛtɛ k’otondo. Ɛlɔ kɛnɛ, ɛnɔmbɔdi efula hawoyakiyanya mɛtɛ lo dikambo di’anto, koko Yeso ntshikitana lawɔ nɛ dia nde okosalaka kɛnɛ kele ɔlɔlɔ lo dikambo di’anto. Lowandji lande layohikama lo ngandji ndo nde ayonga ɔlɔlɔ, kanga kɛtshi ndo nde ayolɛ oko nkumekanga ka losembwe.​—Isaya 11:4.

Tshunda di’anto wayonga l’andja w’oyoyo hawotonga la diatɔnelo lo ndjela wedja kana waoho. Anto tshɛ wayonga kaamɛ. (Ɛnyɛlɔ 7:9, 10) Anto tshɛ wadjasɛ la nkɛtɛ wayoka Nzambi ndo wonyawɔ onto ngandji ndo wayokambaka lo kaamɛ dia nkotsha sangwelo diaki Nzambi dia l’etatelo diendana la nkokɛ nkɛtɛ.​—Osambo 115:16.

Etena kayɔlɔmbɔla Diolelo diaki Nzambi lanɛ la nkɛtɛ, Otungi ayoshidiya mpokoso tshɛ y’oma lo diangɔ diakatongama. (Osambo 24:1, 2) Lam’akinde lanɛ la nkɛtɛ, Yeso akɛnya djembetelo ya wolo wakawosha Nzambi, etena kakandɔladia lɔpɛpɛ la wolo ndo la waale. (Makɔ 4:39, 41) L’ɛse k’ɛlɔmbwɛlɔ ka Kristo, ndooko onto layonga l’ɔkɔkɔ wa mboka mpokoso k’oma lo diangɔ diakatongama wɔma. Etena kayolɛ Diolelo diaki Nzambi, tayɔsɛna lo wɔladi kaamɛ la waa nyama ndo hatotolanya nkɛtɛ.​—Hɔsɛya 2:18.

Onto tshɛ ayɔngɛnangɛnaka la yoonge ya kokele. Ndooko onto layotata hemɔ, tshunda osombe kana mvɔ. (Isaya 35:5, 6) Anto wayɔngɛnangɛna l’ahole w’amɛna ndo wa pudipudi wele oko wanɛ wakangɛnangɛnaka la atshukanyi wa ntondo l’ekambɔ k’Ɛdɛna. Paka oko wakidiɔ l’ekambɔ k’Ɛdɛna, l’andja w’oyoyo nkɛtɛ yayotondja mbo ya ndɛ tshavutshavu ndo anto tshɛ wa lo nkɛtɛ wayonga la diangɔ efula. (Etatelo 2:9) L’ɛnyɛlɔ ka wodja w’Isariyɛlɛ w’edjedja waki Nzambi, onto tshɛ la lo Paradiso “ayɔlɛka diangɔ ndo ayolotaka.”​—Akambo w’ase Lɛwi 26:4, 5.

L’ɛse ka lowandji laki Nzambi la l’andja w’otondo, anto tshɛ wayɔngɛnangɛnaka lo wɔladi ndo wayosalanɛka akambo la ngandji ndo la losembwe. Ata hawotonga, ndooko onto layokamba la lowandji lo yoho ya kɔlɔ ndo onto tshɛ ayonga la kɛnɛ tshɛ kende la tɔ ohomba. Bible ndakaka ɔnɛ: “Vɔ wayodjasɛ onto l’onto l’ɛse k’ɔkɔdi ande wa vinyɔ ndo l’ɛse k’osongo ande wa fingo, ndo ndooko onto layowaotsha wɔma.”​—Mika 4:3, 4.

Nkumbo tshɛ kayonga la luudu lawɔ aha la mboka wɔma ɔnɛ wayolishisha ndo olimu tshɛ wayotosalaka wayotɔngɛnyangɛnyaka. Oko wadita Bible, wanɛ wayɔsɛna l’andja w’oyoyo waki Nzambi ‘hawotɛna paa wɛnɛna’.​—Isaya 65:21-23.

Bible ndakaka ɔnɛ: “Nkɛtɛ kayolola mɛtɛ la ewo ka Jehowa.” (Isaya 11:9) Anto wayɔsɛna l’ɛse k’ɛlɔmbwɛlɔ ka Diolelo diaki Nzambi, wayeka awui wendana la lomba laki Otungi awɔ, mbuta ate Jehowa laha l’ekomelo ndo awui wendana la diangɔ efula diakandatonge. Vɔ hawotokamba la diewo diawɔ dia nsala ekoma kana dia salɛ anto akina kɔlɔ. (Isaya 2:4) Koko, vɔ wayeka woho wa nsɛna lo wɔladi l’anto akina ndo woho wa nkokɛ nkɛtɛ.​—Osambo 37:11.

Nzambi akɔshi etena ka nɔngɔsɔla nkɛtɛ dia sho ngɛnangɛnaka la lɔsɛnɔ lushi tshɛ. Nde kombolaka di’anto sɛnaka pondjo pondjo la nkɛtɛ. (Osambo 37:29; Isaya 45:18) Dia nkotsha sangwelo diande di’oma l’etatelo sɔ, Nzambi “ayonya nyɔi pondjo.” (Isaya 25:8) Bible ndakaka ɔnɛ: “Nyɔi hatoyala nto, otanda hatoyala nto, delo hatoyala nto, kaanga kandji hatoyala nto.” (Ɛnyɛlɔ 21:4) Nzambi ayosha onto tshɛ, mbidja ndo wanɛ wayoka etena kayondolanya andja wa kɔlɔ ɔnɛ ndo nyemba nyemba y’anto wayolɔ dia ndjɔsɛna l’andja w’oyoyo diaaso dia nsɛna pondjo pondjo.​—Joani 5:28, 29; Etsha 24:15.

 Kaanga oma ko kakianɛ, miliyɔ y’anto wekɔ lo ndjalɔngɔsɔla dia ndjɔsɛna l’ɛse ka Diolelo diaki Nzambi diaya ka suke. Kaanga mbewɔ keema kokele, vɔ wamboshilaka mpemba monga woho w’anto wakombola Nzambi dia ndjɔsɛna l’andja ande w’oyoyo. Lo ngande? Lo mbeka awui wendana la Jehowa Nzambi ndo ɔnɛ lakandatome, mbuta ate Yeso Kristo.​—Joani 17:3.

Dia mbeya awui efula wendana la woho wakokayɛ ndjoka l’ekomelo k’andja ɔnɛ ndo dia ndjɔsɛna l’andja w’oyoyo wa dimɛna efula waya ka suke. Etawɔ dia mbeka Bible ofele kaamɛ la Ɔmɛnyi wa Jehowa ɔmɔtshi.