Mojanxa ja sgobyerno ja Dyos tey bʼa satkʼinali, yeʼnxa oj ya mandar bʼa yibʼanal ja Luʼum sok spetsanil ja kristyano gustoxta oj ajyuke, lamanxa oj ajyuke sok oj yabʼye stsamalil ja yaʼtele. Ja Dyosi stʼojunej ja Jesús bʼa oj yaʼotik mandar. Ja yeʼni mini jachukuk jastal ja gobyernoʼik ja bʼa luʼumi. Ja Jesús tolabida wa skʼana bʼa lek oj ajyuk ja tuki. Spetsanil ja jas oj skʼuluk ja sgobyerno jani yuja yajalkʼujoli, sok ja yeʼn tolabida oj kʼot jun mandaranum bʼa jel xyajtani, toj sok wa snaʼa yajulal (Isaías 11:4).

Ja ajyel pilan país ma ja rasaʼil mini oj spil ja kristyano yujni spetsanile oj ajyuke tsoman lek (Apocalipsis 7:9, 10). Spetsanil ja kristyano ja maʼ oj ajyuk sakʼan ja bʼa luʼumi oj syajtaye ja Dyosi sok oj syajta sbʼaje. Jpetsaniltik oj aʼtijukotik lajan sok laman bʼa yajel kʼotuk ja jas wa skʼana ja Dyosi: stalnajel ja lugar bʼaytiki, ja Luʼum (Salmo 115:16).

Yajni ja sGobyerno ja Dyosi yeʼnxa yamanyuj ja luʼumi, ja Kʼulumani oj xchʼaysnajel ja desgrasyaʼiki (Salmo 24:1, 2). Yajni ja Jesús ti ajyi bʼa Luʼum sok ya lamxuk jun tsatsal ikʼ jaʼ, sjeʼa ja jas wa xbʼobʼ skʼuluk sok ja yip ja Dyosi (Marcos 4:39, 41). Yajni yeʼnxa wan mandar ja Kristo, mixani ma oj xiwuk bʼa ojto ekʼ jun tsatsal ikʼ jaʼ. Chomajkil, ja sGobyerno ja Dyosi oj bʼobʼyuj bʼa lamanxa oj ajyuke ja kristyano sok ja chanteʼi sok mixa ma oj sjom ja luʼumkʼinali (Oseas 2:18).

Jpetsaniltik lekxa oj ajyukotik. Mixa maʼ oj koʼ chamel, oj awelaxuk ma oj chamuk (Isaías 35:5, 6). Oj ajyuk jsakʼaniltik bʼa jun luʼum sak sok tsamal, jastalni ajyiye ja Adán soka Eva. Ja bʼa yajkʼachil luʼumi, ja luʼumi jelxani oj bʼaʼalanuk, jastalni waj ja jardín bʼa Edén, sok mixani jas oj tekʼtik bʼa oj kabʼtik (Génesis 2:9). Ja bʼa tsamal luʼumi ojni kʼotuk ja jastal skʼapayi ja Dyos ja chonabʼ Israel: «Ojni awabyex jawa panex man oj bʼutʼanik lek» (Levítico 26:4, 5).

Ja bʼa smandaranel ja sGobyerno ja Dyosi, oj ajyuk lamanil bʼa yibʼanal ja luʼumi, ojxa kʼulaxuk ja bʼa jas stojolili sok spetsanil ja kristyano yajxta oj yil sbʼaje. Mixa oj ajyuk guerraʼik, mixa ma oj ixtalanuk yuja ipal yiʼoji sok jpetsaniltik oj ajyukujtik ja jas oj makunukujtiki. Ja Biblia wa skʼapa: «Jujune bʼa yeʼnle oj kulanuke ja bʼa yibʼel stsʼusubʼe sok ja bʼa yibʼel ja steʼil yigoʼe, sok mixa maʼ oj ajuk xiwukeyuj» (Miqueas 4:3, 4).

Spetsanil ja pamilyaʼiki ojxa ajyuk jun snaje bʼa mixa oj xiwuke xchʼayjel, sok jpetsaniltik oj kabʼtik stsamalil ja bʼa jas oj jkʼuluktiki. Ja yuj, ja Biblia wa xyala ja matik oj ajyuk sakʼan ja bʼa yajkʼachil luʼumi «mini lom oj aʼtijuke» (Isaías 65:21-23).

Ja Biblia wa skʼapa: «Ja luʼumi bʼutʼelni oj ajyuk soka snajel yiʼoj ja Jyoba» (Isaías 11:9). Ja keʼntiki wani xnebʼatik ja bʼa jitsan sbiboʼil yiʼoj ja jKʼulumantik Jyoba sok ja bʼa jastik jel tsamal skʼuluneji. Mi oj katik makunuk ja jas oj jnebʼtiki bʼa skʼulajel armaʼik ma keʼnta oj kixtalaʼuk jbʼajtik, oj katik makunuk bʼa oj ajyukotik laman sok bʼa stalnajel ja luʼumi (Salmo 37:11; Isaías 2:4).

Ja Dyosi skʼujolan bʼa xchapjel ja luʼumi yujni wa skʼana ti oj ajyukotik sakʼan tolabida tiwi sok oj kabʼtik stsamalil kada kʼakʼu ja jsakʼaniltiki (Salmo 37:29; Isaías 45:18). Bʼa oj bʼobʼyuj, ja Dyosi «oj sbʼukʼ koʼe ja chamelali bʼa tolabida» (Isaías 25:8). Sok ja Biblia wa skʼapa «jaxa chamelali mixa oj ajyuk, mini ja tristeʼili, mini okʼel, mini syajal» (Apocalipsis 21:4, TNM). Ja Dyosi ojni yayi jun sakʼanil bʼa tolabida ja matik oj ajyuk sakʼan ja bʼa yajkʼachil luʼumi, wa xkʼan alxuk, ja matik oj yakan sakʼan yajni xjak ja chʼakelali sok ja miyonik kristyano maʼ oj sakʼwukeʼi (Juan 5:28, 29; Hechos 24:15).

 Ja bʼa tyempo aytiki, miyonik kristyano bʼa tuktukil lugar wanexa xchapjel sbʼaje bʼa oj ajyuke sakʼan ja bʼa yajkʼachil luʼumkʼinal jaw, yajni ja sGobyerno ja Dyos xyaʼa mandar ja bʼa Luʼum. Anima mulanume, wane skʼujolajel oj kʼotuke ja tikʼe kristyano wa skʼana ja Dyos oj ajyuk sakʼan ja bʼa yajkʼachil luʼumi. ¿Jastal wane xchapjel sbʼaje? Snajel sbʼaja Jyoba Dyos sok ja it ma sjekakoni, ja Jesukristo (Juan 17:3).

Jelxa tʼusan skʼana bʼa oj chʼakuk ja luʼumkʼinal iti. Ta waxa kʼana oja naʼ ja jas oja kʼuluk bʼa oj kanan sakʼan sok yabʼjel stsamalil bʼa jun luʼumkʼinal masxa lek, wa xlokowatikon kʼulan aceptar jun estudio bʼa Biblia soka Libro Abʼan tsamal jawa sakʼanili, ke wa xkaʼatikon ja Testigoʼotikon bʼa Jyoba.