Nialh makgas, xTamapakgsin Dios nema wi kʼakgapun, namapakgsinan kxlikalanka Katiyatni, chu putum latamanin xatapaxuwan natawilakgo, nitu katikamakgapekualh chu nalipaxuwakgo xtaskujutkan. Dios laksakli Jesucristo xlakata nakinkamapakgsiyan. Xla ni xtachuna mapakgsinanin xalak kakilhtamaku. Jesús ankgalhin lakaskin tuku tlan xpalakata latamanin. Wa tapaxkit tuku natlawa pi tlan mapakgsina nalitaxtu, chu ankgalhin xaʼakgstitum chu xalakgalhamanina mapakgsina nawan (Isaías 11:4).

Xcolorkan chu xkachikinkan latamanin nialh katikamapapitsilh xlakata makxtum natawilakgo (Apocalipsis 7:9, 10). Putum latamanin tiku wilakgolh kKatiyatni nalapaxkikgo chatunu chatunu chu na napaxkikgo Dios. Putum makxtum naskujaw chu ni katiʼanalh tuku natlawa pi ni namakgantaxtiyaw xtalakaskin Dios: kuenta natlawayaw kimpulatamankan, Katiyatni (Salmo 115:16).

Akxni xTamapakgsin Dios namapakgsinan kKatiyatni, Malakatsukina natlawa pi nialh naʼanan tuku masputunan (Salmo 24:1, 2). Akxni Jesús xlama kKatiyatni makaksalh lanka unisen, chu chuna limasiyalh la namaklakaskin xlimakgatliwakga Dios (Marcos 4:39, 41). Akxni Cristo nakinkamapakgsiyan, nialhti katipekualh xlakata nialh katiʼanalh tuku namasputunan. Nachuna, xTamapakgsin Dios natlawa pi latamanin chu animales tlan nalatalalinkgo, chu nialh katiʼanalh tiku nalaktlawa Katiyatni (Oseas 2:18).

Nialh tiku katitatatlalh, katikgololh o katinilh (Isaías 35:5, 6). Nalatamayaw kʼakgtum xakalilakgatit katiyatni xtachuna la niku xwilakgolh Adán chu Eva. Kxasasti kakilhtamaku, katiyatni lhuwa namakgalananan, chu putum nakgalhiyaw tuku nawayaw chuna la kjardín xaʼEdén (Génesis 2:9). Anta kParaíso nakgantaxtu tuku Dios malaknunilh xamakgan kachikin Israel: «Liwana nakgalhkgasatit» (Levítico 26:4, 5).

Akxni namapakgsinan xTamapakgsin Dios, xlikalanka Katiyatni naʼanan xaxlikana takaksni, nialh katiʼanalh tuku ni xaʼakgstitum chu putum latamanin nalapaxkikgo. Nialh katiʼanalh guerras, putum nakgalhiyaw tuku namaklakaskinaw chu nialh naʼanan tiku namakgapatini achatum. Biblia malaknu: «Chatunu chatunu natawila xtampin xakiwi xʼuvas chu xtampin xhiguera, chu ni katiʼanalh tiku nakamakgapekuan» (Miqueas 4:3, 4).

Putum familias nakgalhikgo xchikkan chu ni katilakpuwankgolh pi namakgatsankgakgo, chu kimputumkan nalipaxuwayaw tuku natlawayaw. Wa xlakata, Biblia wan pi tiku nalatamakgo kxasasti kakilhtamaku «ni tuku katilitlakgwankgolh» (Isaías 65:21-23).

Biblia malaknu: «Katiyatni nalitatsama xtamasiy Jehová» (Isaías 11:9). Latamanin lhuwa tuku nakatsiniyaw xlakata xliskgalala kimalakatsukinakan, Jehová, chu xlakata xalakstlan xtamalakatsukin nema katlawanit. Tuku nakatsiniyaw ni katilimaklakaskiw xlakata nalalimakgapatinanaw, wata nalimaklakaskinaw xlakata naʼanan takaksni chu nakuenta tlawayaw Katiyatni (Salmo 37:11; Isaías 2:4).

Dios lu liskujli xlakata nalakkaxwili Katiyatni xlakata lakaskin kalipaxuwaw chu ankgalhin kalatamaw anta (Salmo 37:29; Isaías 45:18). Xlakata namakgantaxti, Dios «xliputum kilhtamaku namalakgsputu linin» (Isaías 25:8). Chu Biblia malaknu: «Nialhti katinilh, nialhti katilipuwa, nialhti katitasalh, nialhti katikatsanajwalh» (Apocalipsis 21:4). Dios nakamaxki talakaskin nalatamakgo putum kilhtamaku tiku nalatamakgo kxasasti kakilhtamaku, uma wamputum, tiku nakamalakgtaxti akxni namin lisputni chu millones latamanin tiku nalakastakwanankgo (Juan 5:28, 29; Hechos 24:15).

 La uku, millones latamanin xalak lakalhuwa kachikinin liskujmakgolha xlakata tlan nalatamakgo kxasasti kakilhtamaku, akxni xTamapakgsin Dios namapakgsinan kKatiyatni. Maski makglakgalhinanin, liskujmakgolh nalikatsikgo chuna la Dios lakaskin kalikatsikgolh tiku nalatamakgo kxasasti xkakilhtamaku. ¿La tlawamakgolh? Lakgapasmakgolh Jehová Dios chu tiku malakgachalh, Jesucristo (Juan 17:3).

Nialh lhuwa kilhtamaku tsankga xlakata nasputa uma kakilhtamaku. Komo katsiputuna la nalakgtaxtuya chu nalatapaya kxasasti kakilhtamaku, kawani chatum xtatayana Jehová pi lakaskina nalimakgalhtawakgekana libro Kalipaxuwa latamat.