Loko Mfumu wa Xikwembu wu ta sungula ku fuma misava, vanhu hinkwavu va ta hanya na va tsakile, va hanyisana hi lirhandzu ni ku va ni mintirho ya yinene. Xikwembu xi lange Yesu Kreste swaku a fuma misava, mimfumu namuntlha a yi swi koti ku yentxela vanhu minchumu ya yinene kambe Yesu a hambanile hikusa minkama hinkwayu a ta hi yentxela minchumu ya yinene. Loko a ta fuma misava a ta hi yentxela minchumu hinkwayu hi lirhandzu, wunene ni ntwelawusiwana. — Esaya 11:4.

Vanhu lava va nga ta hanya ka misava ya nyuwani a va nga ta hambanisiwa hi lixaka la vona kumbe lomu va tshamaka kona. Vanhu hinkwavu va ta hanya hi ku twanana. (Nhlawutelo 7:9, 10) Hinkwavu lava va nga ta hanya lani misaveni va ta rhandza Xikwembu va tlhela va rhandza vanhu van’wana, naswona va ta tirhisana xikan’we hi ku rhula, va yentxa leswi Xikwembu a xi swi lava ku nga ku hlayisa misava. — Tipisalema 115:16.

Loko Mfumu wa Xikwembu wu ta sungula ku fuma misava, xi ta yentxa swaku ku nga vi ni minchumu ya ku fana ni ku titimeta hintamu, ku hisa hintamu kumbe tinpfula ta tikulu. (Tipisalema 24:1, 2) Nkama Yesu na a li lani misaveni a yentxe swaku magandlati ya lwandle ma rhula, hi ku yentxa leswo a kombise matimba lawa Xikwembu xi nga mu nyika wona. (Marku 4:39, 41) Naswona loko a ta sungula ku fuma a ta yentxa swaku minchumu leyi karhataka vanhu namuntlha ya ku fana ni ma ciclone ni swidzedze swi nga ha li kona. Xin’wana hi leswaku Mfumu wa Xikwembu wu ta tlhela wu yentxa swaku vanhu va hanyisana hi ku rhula ni swiharhi. — Hosiya 2:18.

Vanhu va ta hanya wutomi la ku tsakisa hikusa a ku na lweyi a ta vabyaka, ku guga kumbe ku fa. (Esaya 35:5, 6) Hinkwavu va ta tshama ka ndhawu ya ku saseka yi tlhela yi basa ya ku fana ni jaradi la Edeni. Ka misava ya nyuwani ku ta va ni swakudla swa swinyigi ku fana ni ka jaradi la Edeni. (Genesa 2:9) Naswona ku fana ni Vaisrayele va khale, vanhu hinkwavu a Paradesi va ta “dla swakudla [swa vona] na va rhulile.” — Levhitika 26:4, 5.

Ka Mfumu wa Xikwembu vanhu hinkwavu va ta hanya hi ku rhula va tlhela va hanyisana kahle. Ku nga ha ta va ni tinyimpi, vanhu lava va lavaka ku fuma van’wana, naswona vanhu va ta va ni hinkwaswu leswi va swi lavaka. Bibele li tshembisa swaku: “Mun’wana ni mun’wana, a ta tshama hansi ka nsinya wa yena wa mawuvha ni ka nsinya wa yena wa makuwa, naswona a nga kona lweyi a nga ta va chavisa”. — Mikiya 4:3, 4.

Vanhu hinkwavu va ta va ni munti naswona a va nga ta tekeliwa hi munhu, hinkwavu va ta va ni mintirho ya ku tsakisa hi lani Bibele li vulaka hi kona, lava va nga ta hanya ka misava ya nyuwani “a va nga ta tirha va balha nyuku wa mahala.” — Esaya 65:21-23.

Bibele li li: “Misava yi ta tala hi wutivi la Yehovha.” (Esaya 11:9) Vanhu lava va nga ta hanya ka Mfumu wa Xikwembu va ta djondza minchumu ya yinyingi hi wutivi leli xi nga na lona, ni minchumu ya ku saseka leyi xi nga yi yentxa, a va nga ta tirhisa wutivi la vona swaku va yentxa minchumu ya ku fana ni swibamu kumbe ku vavisa vanhu van’wana. (Esaya 2:4) Ku hambana ni leswo va ta djondza swaku va nga hanyisa ku yini hi ku rhula ni leswi va nga swi yentxaka swaku va hlayisa misava. — Tipisalema 37:11.

Xikwembu xi yi lunghiseleli kahle misava swaku hi hanya ka yona na hi tsakile siku ni siku. Xi lava swaku vanhu va hanya wutomi la ku kala li nga heli lani misaveni. (Tipisalema 37:29; Esaya 45:18) Leswaku swoleswo swi koteka Xikwembu xi “ta li helisa swawugamu” lifu. (Esaya 25:8) Bibele li tlhela li ku: “Lifu a li nga ha ta va kona, hambi ku keta, ku rila ni ku twa ku vava a swi nge he vi kona.” (Nhlawutelo 21:4) Xikwembu xi ta yentxa swaku vanhu hinkwavu lava va nga ta pona loko misava leyi ya ku biha yi helisiwa, ni lava va nga ta pfuxiwa, va kota ku hanya na va nga fi ka misava ya nyuwani. — Yohani 5:28, 29; Mintirho 24:15.

 Vanhu va vanyingi se va sungule ku tilunghiselela swaku va ta hanya ka Mfumu wa Xikwembu. Hambileswi va nga ni xidjoho va zama ku va vanhu lava Xikwembu xi va lavaka swaku va hanya ka misava ya nyuwani. Va swi yentxisa ku yini? Va yentxa leswo hi ku djondza hi Yehovha ni lweyi a nga mu rhuma Yesu Kreste. — Yohani 17:3.

Vona swaku u nga yentxa yini leswaku u pona loko misava leyi yi helisawa u tlhela u hanya ka misava ya yinene leyi yi nga kusuhi. Djondza Bibele hi mahala ni Timboni ta Yehovha.