¡Nopolix ya xkuxinotik ta achʼ balumilal!
Te Dios la spas te Balumilal yuʼun ya xnainik ta sbajtelkʼinal tey-a te ants winiketik te jun yoʼtan ya yakʼ sbaik (Salmo 37:29). Jaʼ yuʼun la yakʼ te Adán sok te Eva ta tsʼunbil kʼinal Edén sok altiklanbotik soknix te stsʼumbalik te yakuk stuuntesik sok te yakuk skanantayik te lumkʼinale (Génesis 1:28; 2:15).
Te balumilal ta ora ini ma jichukix te bin-utʼil snopoj-a te Diose, pero ma jelonem te snopojibal yuʼun. ¿Bin ya xbajt spas yuʼun ya skʼatpʼun ta nichimal kʼinal te Balumilale? Jich bitʼil la kiltikix, te Dios ma slajin te Balumilal, jaʼ ya yakʼ kuxinuk tey-a te ants winiketik te ya schʼuunik kʼop. ¿Binwan yilel te kuxlejalil liʼ ta Balumilal te kʼalal la spasix-a te bin yaloj te Diose?
Jun ajwalil ta swolol Balumilal
Nopolix te Wentainel yuʼun Dios te ay ta chʼulchan, ya swentain te ants winiketik te ay ta Balumilal sok spisilik tseʼelnax yoʼtan ya xkuxinik, ay lamalkʼinal sok ya smulan te yaʼtelike. Te Dios la stsa te Jesucristo yuʼun jaʼ ya xwentainwan. Ma jichuk stukel te bin-utʼil te ajwaliletik yuʼun te balumilale. Te Jesús jaʼ ya skʼan te lekuk ya xkuxinik te ants winiketik sok ya yakʼ ta ilel skʼuxul yoʼtan, toj bin ya spas sok ya snaʼ yoʼbolil jbatik (Isaías 11:4).
Jun-nax ya xkuxinotik ta swolol Balumilal
Te banti talemotik sok te jtsʼumbaltik ma xbajt xat te ants winiketik, melel jun-nax ya x-ayinotik ta jpisiltik (Apocalipsis 7:9, 10). Spisil te ants winiketik te ya xnainik ta Balumilal kʼux ya xbajt yaʼiyik te Dios sok talel kʼaxel kʼux ya xbajt yaʼiy sbaik. Jpisiltik jun-nax ya x-aʼtejotik yuʼun ya jpasbeytik te skʼanojel yoʼtan te Dios, te jaʼ te skanantayel te Balumilal (Salmo 115:16).
Jun-nax ya x-ayin te ants winik sok spisil te bintik ay
Kʼalal ya xwentainwan te Wentainel yuʼun Dios ta Balumilal, ma xyakʼ te ya xkʼaxix spisil te bintik ya xjinawan jilel (Salmo 24:1, 2). Kʼalal xtaluk ta Balumilal te Jesús la slamantes te tulan yikʼal jaʼal, jich la yakʼ ta ilel te spisil bin ya xjuʼ yuʼun spasel ta swenta te yuʼel te Dios (Marcos 4:39, 41). Te kʼalal ya swentainotik te Jesucristo maʼyukix machʼa ya xiʼ te ya xkʼax spisil te bintik ya sjin jilel. Jaʼnix jich te Wentainel yuʼun Dios ya yakʼ te ants winiketik sok te chambalametik jun-nax ya x-ayinik sok maʼyukix machʼa ya stsʼilajtes te lumkʼinale (Oseas 2:18).
Maʼyukix chamel sok ya x-ayin bayal weʼelil
Jpisiltik leknax ya xbajt kaʼiy jbatik. Maʼyuk machʼa ya stsakotix ta chamel, ya xmeʼel mamalub o ya xlaj (Isaías 35:5, 6). Ya xkuxinotik ta jun Balumilal te maʼyuk yabakul, te tʼujbilnax ta ilel jich bitʼil te banti kuxinik te Adán sok te Eva. Te lumkʼinal ya xbajt yakʼ bayal weʼelil jichnix te bin-utʼil ta tsʼunbil kʼinal Edén (Génesis 2:9). Ta Nichimal Kʼinal ya xkʼot ta pasel te bin la yalbey Dios te lum yuʼun Israel: «Ay me aweʼelic asta jaʼ to teme buen ya xnoj achʼujtʼique» (Levítico 26:4, 5, TZOXCH).
Ya x-ayin lamalkʼinal
Te Wentainel yuʼun Dios ya yakʼ lamalkʼinal ta swolol Balumilal, ma xyichʼix pasel te bin ma stojiluk sok talel kʼaxel kʼux ya yaʼiy sbaik te ants winiketik. Maʼyukix guerra, j-utsʼinwanejetik sok ya jtatik te bin ya xtuun kuʼuntik. Te Biblia jich ya yal: «Jujutuhl ya shuhcan sbahic ta yeʼtal te stsʼusubil soc ta yeʼtal te higuera yuʼune, mayuc machʼa ya xiwtesotic yuʼun» (Miqueas 4:3, 4).
Ya yichʼ pasel naetik sok ya jmulan te kaʼteltik
Spisil te familiaetik ya xbajt spas snaik sok maʼyuk machʼa ya xpojbotik sok jpisiltik ya xbajt jmulantik te bin ya jpastik. Jaʼ yuʼun te Biblia ya yal te machʼatik ya xbajt ayinuk ta achʼ balumilal «ma ba tojol nax ya xʼaʼtejic» (Isaías 65:21-23).
Lekil nojptesel
Te Biblia jich ya yal: «Hich ya xnaʼbot sba te Jehová ta spahmal qʼuinal» (Isaías 11:9). Te joʼotik bayal bin ya xbajt jnoptik ta swenta te spʼijilal te Jehová sok te bintik tʼujbil spasoje. Spisil te bintik ya jnoptik spasel ma jaʼuk ya xbajt jtuuntestik ta spasel tujkʼetik yuʼun ya kutsʼintik te yantik, jaʼ ya xbajt jtuuntestik yuʼun ayuk lamalkʼinal sok te yakuk jkanantaytik te lumkʼinale (Isaías 2:4; Salmo 37:11).
Kuxlejalil te ma xlaj skʼoplal
Te Jehová la schajpan te Balumilal yuʼun ya skʼan te yakuk xkuxinotik ta sbajtelkʼinal tey-a sok te yakuk jmulanbeytik yutsilal te kuxlejalil ta jujun kʼajkʼal (Salmo 37:29; Isaías 45:18). Yuʼun jich ya xkʼot ta pasel-a, te Dios «ya me slajin scuenta sbahtel qʼuinal te lajele» (Isaías 25:8). Te Biblia jaʼnix jich ya yal te «maʼyukix lajel, maʼyukix mel-oʼtan, okʼel sok te bin kʼux» (Apocalipsis 21:4). Te Dios ya yakʼ kuxinuk ta sbajtelkʼinal ta achʼ balumilal te ants winiketik te ya xkolik jilel sok te bayal millón ta tul ants winiketik te ya xchaʼkuxajike (Juan 5:28, 29; Hechos 24:15).
Ta ora ini bayal millón ta tul ants winiketik ta swolol Balumilal, yakix ta schajpanel sbaik yuʼun ya xkuxinik ta achʼ balumilal kʼalal ya xwentainwan te Wentainel yuʼun Dios. Manchukme maba tojik, yakik ta spasel tulan yuʼun yakuk spasik te bin ya smulan te Dios. ¿Bin-utʼil? Jaʼ te ya snaʼbeyik sba te Jehová sok te sNichʼan Jesucristo (Juan 17:3).
Nopolix ya xlaj skʼoplal te chopol balumilal ini. Teme ya akʼan ya anaʼ bin ya xjuʼ ya apas yuʼun kuxul ya xjilat sok ya xkuxinat ta achʼ balumilal. Kʼanbeya jtul testigo yuʼun Jehová te akʼa yakʼbat nojptesel ta Biblia te maba tojbil sok te libro Mulana.
Yaniwan amulan-euk sk'oponel ini
TE J-ILKʼINAL TA TOYOL
¿Bin ya xbajt spas te Wentainel yuʼun te Diose?
Te Jesús snaʼoj te jaʼnax te Wentainel yuʼun Dios ya schajpan te kʼopetik te ay ta Balumilal. ¿Bin spasojix te Wentainel yuʼun Dios yuʼun ya kakʼ smukʼul koʼtantik ta stojol?
