¡Poʼot xa xijkuxi ta jun achʼ balumil!
¿Kʼu yuʼun la spas balumil li Diose? Jaʼ sventa te xnakiik ta sbatel osil li buchʼutik tukʼike (Salmo 37:29). Jaʼ yuʼun, li Diose te laj yakʼ ta nichimaltik Eden li Adan xchiʼuk Evae, albatik ti akʼo sventainik xchiʼuk xabtelanik balumil xchiʼuk li snitilulalike (Jenesis 1:28; 2:15).
Li balumil avie mi jsetʼuk xkoʼolaj ta jun paraiso ti kʼuchaʼal snopoj toʼox li Diose. Pe li Diose muʼyuk sjeloj-o li kʼusi tsnope. ¿Kʼusi tspas sventa xkʼataj ta paraiso li balumile? Jech kʼuchaʼal laj xa jchantik tale, li Diose muʼyuk tslajes li balumile, yuʼun jaʼ sventa te xnakiik li buchʼutik chchʼunik mantale. ¿Kʼu van yelan li kuxlejal ta balumil mi kʼot xa ox ta pasel li kʼusi tskʼan yoʼonton Diose?
Jun noʼox ajvalil ta spʼejel balumil
Jutuk xa skʼan sventain tal balumil li Ajvalilal yuʼun Dios ti te oy ta vinajele, vaʼun skotol li krixchanoetike xmuyubajik noʼox, jun noʼox yoʼonton chkuxiik xchiʼuk tskʼupinik li yabtel yok skʼobike. Li Diose la svaʼan Jesukristo sventa sventainutik, pe mu xkoʼolaj xchiʼuk li ajvaliletik liʼ ta balumile, yuʼun tskʼan ti lekuk oyutike. Ta kʼanelal tspas skotol li kʼusitike, yuʼun jaʼ jun ajvalil ti chkʼanvane, ti tukʼ xchiʼuk ti oy slekil yoʼontone (Isaias 11:4).
Muʼyuk xa chchʼak sba li krixchanoetike
Akʼo mi yan-o jlumaltik o jtsʼunbaltik, muʼyuk bu ta jchʼak jbatik, jmoj xa tsobol oyutik (Apokalipsis 7:9, 10). Skotol li buchʼutik chkuxiik ta paraisoe tskʼanik li Diose xchiʼuk tskʼan sbaik ta jujuntal. Jmoj tsobol chij-abtejutik xchiʼuk ta sjunul koʼonton ta jkolta jbatik yoʼ xkʼot ta pasel li kʼusi tskʼan yoʼonton Diose, ti jchabitik li balumile (Salmo 115:16).
Muʼyuk xa kʼusi tsokes li balumile
Kʼalal mi tsventain xa ox tal balumil li Ajvalilal yuʼun Diose, li Jpasvaneje jaʼ tskʼel ti mu toj kʼixinuk o mu toj sikuk li balumile xchiʼuk ti ta yutsil noʼox oyuke (Salmo 24:1, 2). Kʼalaluk ay ta balumil li Jesuse, la spajes li xibal sba tsatsal ikʼe, jaʼ jech laj yakʼ ta ilel ti xuʼ yuʼun kʼusitik tspas ta skoj ti akʼbil sjuʼel yuʼun Diose (Markos 4:39, 41). Kʼalaluk mi tsventainutik xa ox tal li Kristoe, muʼyuk xa buchʼu chiʼ mi chtal tsatsal nikel, nojelal ta voʼ o yan kʼusitik. Jech xtok, li Ajvalilal yuʼun Diose chakʼ kʼotuk ta pasel ti junuk noʼox yoʼonton xkuxiik li krixchanoetik xchiʼuk li chonbolometike xchiʼuk ti muʼyuk xa buchʼu tsokes li osil balumile (Oseas 2:18).
Muʼyuk xa buchʼu ch-ipaj xchiʼuk ch-epaj veʼlil
Lek xa noʼox jbekʼtal jtakopaltik jkotoltik, yuʼun muʼyuk xa chij-ipaj, chijmalub o chijchamutik (Isaias 35:5, 6). Lek sak ti bu chijnakiutike xchiʼuk jun yutsil, jech kʼuchaʼal ti bu toʼox nakalik li Adan xchiʼuk Evae. Li ta achʼ balumile, ch-epaj li veʼliletike xchiʼuk jkotoltik ta jta jveʼeltik jech kʼuchaʼal toʼox li ta nichimaltik Edene (Jenesis 2:9). Te chkʼot ta pasel ta paraiso li kʼusi albatik yuʼun Dios li j-israeletik ta voʼnee. Xi albatike: «Chalajes apanik jaʼ ti kʼu yepal skʼan avoʼontonike» (Levitiko 26:4, 5).
Jun koʼontontik xchiʼuk muʼyuk kʼusi chijxiʼo
Kʼalal mi tal xa ox li Ajvalilaj yuʼun Diose, ch-ayan jun oʼontonal ta spʼejel balumil, muʼyuk xa choplejal xchiʼuk lek xa chil sbaik li krixchanoetike, muʼyuk xa paskʼop, muʼyuk xa buchʼu tstoy sba ta skoj ti oy kʼusi tsots xuʼ yuʼun spasele xchiʼuk muʼyuk xa kʼusi tspas palta kuʼuntik. Xi jamal chal li Vivliae: «Ta jujuntal te chchoti ta yolon steʼel s-uvaik xchiʼuk ta yolon steʼel s-igoik, muʼyuk buchʼu tsibtasatik» (Mikeas 4:3, 4).
Oy jnatik xchiʼuk ta jkʼupin kabteltik
Chlik jvaʼan jnatik sventa te xijnakiutik xchiʼuk jkotoltik ta jkʼupintik li kʼusi ta jpastike. Li Vivliae chal ti buchʼutik chkuxiik li ta achʼ balumile «mu jecheʼuk noʼox ti tsots ch-abtejike» (Isaias 65:21-23).
Lekil chanubtasel
Xi chal li Vivliae: «Li balumile jpʼel skʼoplal chnoj ta krixchanoetik ti xojtikinik li Jeovae» (Isaias 11:9). Chlik kojtikintik li spʼijil Jeovae ti jaʼ Jpasvanej kuʼuntike xchiʼuk li kʼusitik kʼupilik sba spasoje. Li kʼusitik ta jchantik spasele maʼuk ta jtunestik sventa jpastik tukʼetik o yan kʼusitik sventa xkakʼbe jba jvokoltik. Yuʼun jaʼ ta jtunestik sventa junuk noʼox koʼontontik xchiʼuk ti jchabitik li jbalumiltike (Salmo 37:11; Isaias 2:4).
Kuxlejal sbatel osil
Li Diose lek tajek ti kʼu yelan la smeltsan li balumile, yuʼun jaʼ sventa teuk xijkuxi sbatel osil xchiʼuk ti jkʼupintik leke (Salmo 37:29; Isaias 45:18). Pe sventa jech xkʼot ta pasele, li Diose «ta slajesbe skʼoplal ta sbatel osil li lajelale» (Isaias 25:8). Xchiʼuk xi jamal yaloj li Vivliae: «Muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik» (Apokalipsis 21:4). Li Diose chakʼ akʼo xkuxiik sbatel osil li buchʼutik kuxul chkomik mi laj yichʼ lajesel li chopol balumile xchiʼuk li buchʼutik ta smiyonal xa noʼox chchaʼkuxiik tale (Juan 5:28, 29; Echos 24:15).
Li avie, yakal xa chchapan sbaik ta smiyonal xa noʼox krixchanoetik ta spʼejel balumil sventa xkuxiik li ta achʼ balumil kʼalal mi lik ventainvanuk tal li Ajvalilal yuʼun Diose. Akʼo mi maʼuk tukʼil krixchanoetik, pe chakʼik persa ti jechuk stalelalik kʼuchaʼal tskʼan Diose. ¿Kʼuxi chutik? Jaʼ ti chojtikinik li Diose xchiʼuk ti chojtikinik li buchʼu la stak tale ti jaʼ li Jesukristoe (Juan 17:3).
Jutuk xa skʼan xlaj li balumile. Mi chakʼan chanaʼ kʼusi xuʼ xapas yoʼ kuxul xakome xchiʼuk ti xakʼupin li achʼ balumile, kʼanbo junuk stestigo Jeova sventa xakʼbot chanubtasel ta Vivlia ta moton, ti jaʼ chichʼ tunesel li livro ¡Kʼupino akuxlejal ta sbatel osil!
Xuʼ van chakʼupin skʼelel xtok liʼe
LI JKʼEL˗OSIL TA TOYOLE
¿Kʼusi tspas ta jtojolaltik li Ajvalilal yuʼun Diose?
Li Jesuse snaʼoj xa onoʼox ti jaʼ noʼox li Ajvalilal yuʼun Dios xuʼ xakʼbe slajeb li vokoliletik oy ta balumile. ¿Kʼusi xa spasoj li Ajvalil taje sventa jpat koʼontontik ta stojolale?
LI JKʼEL˗OSIL TA TOYOLE
Li Ajvalilal yuʼun Diose: jaʼ jun ajvalil ti mu xchon sba ta takʼine
Chano vaktos srasonal ti kʼu yuʼun xuʼ jpat koʼontontik ti mu xchon sba ta takʼin li Ajvalilal yuʼun Diose.
