Maʼ kun xáantaleʼ le u Reino Dios yaan teʼ kaʼanoʼ yaan u gobernartik tuláakal le Luʼumaʼ. Teʼ kʼiinoʼoboʼ tuláakal máak kun kuxtal ich kiʼimak óolal, ich jeetsʼelil yéetel yaan u disfrutartik u meyajoʼob. Dioseʼ tsʼoʼok u tsʼáaik Jesucristo utiaʼal ka u gobernartoʼon. Letiʼeʼ maʼ jeʼex le máakoʼob ku gobernaroʼob teʼ kʼiinoʼobaʼ. Jesúseʼ mantatsʼ ken u kaxt u yutsil máak. Le yaabilajoʼ letiʼe baʼax péeksik u beet wa baʼaxoʼ, le oʼolal mantatsʼ yaan u chʼaʼik óotsilil yéetel yaan u yeʼesik u yutsil (Isaías 11:4).

Maʼ ken u jatsuba máak tu yoʼolal u raza wa yoʼolal u kaajal, baʼaxeʼ yaan u biskubaʼob (Apocalipsis 7:9, 10). Tuláakal máak yaan u yaabiltik Dios, yaan u paklan yaabiltikubaʼob yéetel yaan u múul meyajoʼob utiaʼal u kanáantkoʼob le Luʼum jeʼex u tukultmil Diosoʼ (Salmo 115:16).

Le kéen gobernartaʼak tuláakal le Luʼum tumen u Reino Diosoʼ yaan u xuʼulul u yantal ciclónoʼob, terremotoʼob yéetel uláakʼ baʼaloʼob beyoʼ (Salmo 24:1, 2). Le ka taal Jesús way Luʼumeʼ tu jeʼelsaj junpʼéel kʼaʼamkach iikʼ, leloʼ tu yeʼesaj baʼax jeʼel u páajtal u beetik yéetel le poder tsʼaʼantiʼ tumen Diosoʼ (Marcos 4:39, 41). Le kéen u gobernartoʼon Jesucristoeʼ mix máak kun sajaktal u taal junpʼéel ciclón, u yúuchul junpʼéel terremoto wa uláakʼ wa baʼax. Le wíinikoʼob xanoʼ yaan u kanáantkoʼob le baʼalcheʼoboʼ yéetel mix máak kun kaʼa kʼaskúuntik le Luʼumaʼ (Oseas 2:18).

Mix máak kun kʼojaʼantal, kun chʼíijil mix kun kíimil (Isaías 35:5, 6). Yaan k-kajtal tiʼ junpʼéel lugar jach jatsʼuts jeʼex le tuʼux tsʼaʼab kaʼach Adán yéetel Evaoʼ. Teʼ túumben luʼumoʼ jach yaan u yantal yaʼab baʼal jaantbil (Génesis 2:9). Teʼ Paraísooʼ yaan u béeytal le baʼax tu prometertaj Dios tiʼ u kaajil Israel úuchjeakiloʼ: «Yaan u yantal baʼal a jaanteʼex hasta ken naʼajchajkeʼex» (Levítico 26:4, 5).

U gobierno Dioseʼ yaan u beetik u yantal jeetsʼelil tiʼ tuláakal yóokʼol kaab. Mix máak ken u beet injusticia, tuláakal máak ken u yeʼes yaabilaj, maʼ kun antal guerraʼob, mix máak ken u mixbaʼalkúunt u maasil yéetel yaan u yantal tuláakal baʼax kʼaʼabéettoʼon. Le Bibliaoʼ ku yaʼalik: «Cada juntúuleʼ yaan u kutal yáanal u boʼoy u pakʼal uva yéetel yáanal u boʼoy u pakʼal higo, mix máak kun beetik u sajaktaloʼob» (Miqueas 4:3, 4).

Mix máak kun sajaktal u perdert u yotoch, yéetel tuláakal máakeʼ yaan u yantaltiʼ junpʼéel maʼalob meyaj. Le Bibliaoʼ ku yaʼalikeʼ teʼ túumben luʼumoʼ le máakoʼoboʼ «maʼ chéen kunel ken u tsʼáa u yóoloʼob meyajiʼ» (Isaías 65:21-23).

Le Bibliaoʼ ku yaʼalik: «Le luʼumaʼ yaan u chuʼupul yéetel le naʼat ku taal tiʼ Jéeobaoʼ» (Isaías 11:9). Teʼ túumben luʼumoʼ yaan k-kaanbal tiʼ le bukaʼaj naʼat yaan tiʼ Jéeobaoʼ bey xan tiʼ le jatsʼuts baʼaloʼob u beetmoʼ. Le naʼat kun antaltoʼonoʼ maʼ kun meyaj utiaʼal k-beetik kʼaas tiʼ u maasil baʼaxeʼ utiaʼal k-ilik ka yanak jeetsʼelil yéetel utiaʼal k-kanáantik le Luʼumaʼ (Salmo 37:11; Isaías 2:4).

Dioseʼ tu beetaj maʼalob le Luʼumaʼ tumen u kʼáat ka kuxlak wíinik utiaʼal mantatsʼiʼ yéetel ka u disfrutart u kuxtal (Salmo 37:29; Isaías 45:18). Utiaʼal u béeytal le baʼax u tukultmoʼ «letiʼeʼ yaan u xuʼulsik le kíimil utiaʼal mantatsʼoʼ» (Isaías 25:8). Le Bibliaoʼ ku yaʼalikeʼ teʼ kʼiinoʼoboʼ «maʼ tun yantal kíimil, mix okʼol, mix kʼiʼinamil yéetel mix máak kun muʼyaj» (Apocalipsis 21:4). Dioseʼ u kʼáat ka kuxlak teʼ túumben luʼum tuláakal le máaxoʼob ken u salvartubaʼob kéen xuʼulsaʼak tiʼ le kʼasaʼan yóokʼol kaabaʼ bey xan le u millonesil máakoʼob kun kaʼa kuxtaloʼoboʼ (Juan 5:28, 29; Hechos 24:15).

 Bejlaʼeʼ u millonesil máakoʼob tiʼ tuláakal yóokʼol kaabeʼ táan u prepararkubaʼob utiaʼal u kuxtaloʼob teʼ túumben luʼum kun gobernarbil tumen Diosoʼ. Kex kʼeban máakoʼobeʼ táan u yilik u kuxtaloʼob jeʼex uts tu tʼaan Diosoʼ. ¿Bix u beetkoʼob? Táan u yilik u kʼaj óoltikoʼob Jéeoba Dios bey xan Jesucristo, u Hijo (Juan 17:3).

Jach taʼaytak u xuʼulsaʼal tiʼ le kʼasaʼan yóokʼol kaabaʼ. Wa a kʼáat a wojéelt baʼax unaj a beetik utiaʼal a salvarkaba yéetel utiaʼal a kuxtal tiʼ junpʼéel luʼum maas maʼalobeʼ, kʼáat tiʼ juntúul u testigo Jéeoba ka u kaʼansech yéetel le Bibliaoʼ bey xan yéetel le libro ¡Disfrutart le kuxtal mantatsʼoʼ!.