Edi ediwak owo ẹsụk ẹkere ke n̄kpọ idifọnke mmimọ ke ini iso sia edi eyo esiere n̄kpọ ọtọ etịmede ke ererimbot. Ke uwụtn̄kpọ, udọn̄ọ COVID-19 abiat n̄kpọ aka anyan, anam n̄kpọ ọsọn̄ ye mme owo, onyụn̄ owot ata ediwak owo. Emi anam ndusụk owo ẹkere ke n̄kpọ idifọnke ke ini iso.

Nte ererimbot emi etiede anam mme owo ẹsịn ibuot ẹsịn itọn̄ ẹyom n̄kpọ emi mmọ ẹdinamde man n̄kpọ ọfọn mmọ ke ini iso. Ndusụk owo ẹkere ke n̄kpọ ọyọfọn mmimọ edieke inyenede mfọniso. Ediwak owo ẹka akamba ufọkn̄wed ẹnyụn̄ ẹyom okụk sia ẹkere ke emi ayanam inyene se iyomde ke ini iso. Mbon en̄wen ẹkere ke ndidi eti owo edi n̄kukụre se anade inam man n̄kpọ ọfọn mmimọ ke ini iso.

Ndi emekere ke ekededi ke otu emi ekeme ndinam n̄kpọ ọfọn fi ke ini iso? Man ọdiọn̄ọ, kere ban̄a mme mbụme emi ise:

• Nso idinam n̄kpọ ọfọn fi ke ini iso?

• Ndi ifiọkn̄wed ye okụk ayanam n̄kpọ ọfọn fi?

• Ndi ndidi eti owo ayanam n̄kpọ ọfọn fi ke ini iso?

• Nso idin̄wam fi ọfiọk se akpanamde man n̄kpọ ọfọn fi ke ini iso?

Enyọn̄-Ukpeme emi ayanam ọdiọn̄ọ ibọrọ mme mbụme emi.